Mahabharata · Chapter 6.5

nadīnāṃ parvatānāṃ ca nāmadheyāni sañjaya /
tathā janapadānāṃ ca ye cānye bhūmimāśritāḥ //

pramāṇaṃ ca pramāṇajña pṛthivyā mama sarvataḥ /
nikhilena samācakṣva kānanāni ca sañjaya //
sañjaya uvāca /

pañcemāni mahārāja mahābhūtāni sangrahāt /
jagatīsthāni sarvāṇi samānyāhurmanīṣiṇaḥ //

bhūmirāpastathā vāyuragnirākāśameva ca /
guṇottarāṇi sarvāṇi teṣāṃ bhūmiḥ pradhānataḥ //

śabdaḥ sparśaśca rūpaṃ ca raso gandhaśca pañcamaḥ /
bhūmerete guṇāḥ proktā ṛṣibhistattvavedibhiḥka //

catvāro'psu guṇā rājangandhastatra na vidyate / śabdaḥ sparśaśca rūpaṃ ca tejaso'tha guṇāstrayaḥ /
śabdaḥ sparśaśca vāyau dvau akāśe śabda eva tu //

ete pañca guṇā rājanmahābhūteṣu pañcasu /
vartante sarvalokeṣu yeṣu bhūtāḥ pratiṣṭhitāḥ //

anyonyaṃ nābhivartante sāmyaṃ bhavati vai yadā //

yadā tu viṣamībhāvamāviśanti parasparam /
tadā dehairdehavanto vyatirohanti nānyathā //

ānupūrvyā vinaśyanti jāyante cānupūrvaśaḥ /
sarvāmyaparimeyāṇi tadeṣāṃ rūpamaiśvaram //

tatratatra hi dṛśyante dhātavaḥ pāñcabhautikāḥ /
teṣāṃ manuṣyāstarkeṇa pramāṇāni pracakṣate //

acintyāḥ khalu ye bhāvā na tāṃstarkeṇa sādhayet /
prakṛtibhyaḥ paraṃ yattu tadacintyasya lakṣaṇam //

sudarśanaṃ pravakṣyāmi dvīpaṃ tu kurunandana /
parimaṇḍalo mahārāja dvīpo'sau cakrasaṃsthitaḥ //

nadījālapraticchannaḥ parvataiścābhrasannibhaiḥ /
puraiśca vividhākārai ramyairjanapadaistathā //

vṛkṣaiḥ puṣpaphalopetaiḥ sampannadhanadhānyavān /
lavaṇena samudreṇa samantātparivāritaḥ //

yathā hi puruṣaḥ paśyedādarśe mukhamātmanaḥ /
evaṃ sudarśanadvīpo dṛśyate candramaṇḍale //

dviraśastu tataḥ plakṣo dviraṃśaḥ śālmalirmahān . dviraṃśaḥ pippalastasya dviraṃśaśca kuśo mahān /
sarvauṣadhisamāpannaḥ parvataiḥ parivāritaḥ //

āpastato'nyā vijñeyāḥ śeṣaḥ sankṣepa ucyate /
tato'nya ucyate cāyamenaṃ sankṣepataḥ śrṛṇu //