Mahabharata · Chapter 6.2

tataḥ pūrvāpare sainye samīkṣya bhagavānṛṣiḥ /
sarvavedavidāṃ śreṣṭho vyāsaḥ satyavatīsutaḥ //

bhaviṣyati raṇe ghore bharatānāṃ pitāmahaḥ /
pratyakṣadarśī bhagavānbhūtabhavyabhaviṣyavit //

vaicitravīryaṃ rājānaṃ rahassthamidamabravīt /
śocantamārtaṃ dhyāyantaṃ putrāṇāmanayaṃ tadā //
vyāsa uvāca /

rājanparikālāste putrāścānye ca pārthivāḥ /
te hiṃsantīva saṅgrāme samāsādyetaretaram //

teṣu kālaparīteṣu vinaśyatsveva bhārata /
kālaparyāyamāhāya mā sma śoke manaḥ kṛthā //

yadi cecchasi sangrāmaṃ druṣṭumenaṃ viśāmpate /
cakṣurdadāni te putra yuddhametanniśāmayā //
dhṛtarāṣṭra uvāca /

na rocaye jñātivadhaṃ draṣṭuṃ brahmarṣisattama /

yuddhametattvaśeṣeṇa śrṛṇuyāṃ tava tejasā //
vaiśampāyana uvāca /

tasminnanicchati draṣṭuṃ sangrāmaṃ śrotumicchati /
varāṇāmīśvaro vyāsaḥ sañjayāya varaṃ dadau //
vyāsa uvāca /

eṣa te sañjayo rājanyuddhametadvadiṣyati /
etasya sarvaṃ sangrāme na parokṣaṃ bhaviṣyati //

cakṣuṣā sañjayo rājandivyenaiva samanvitaḥ /
kathayiṣyati te yuddhaṃ sarvajñaśca bhaviṣyati //

prakāśaṃ vā'prakāśaṃ vā divā vā yadi vā niśi /
manasā cintitamapi sarvaṃ vetsyati sañjayaḥ //

nainaṃ śastrāṇi bhetsyanti nainaṃ bādhiṣyate śramaḥ /
gāvalgaṇirayaṃ jīvanyuddhādasmādvimokṣyate //

ahaṃ tu kīrtimeteṣāṃ karūṇāṃ bharatarṣabha /
pāṇḍavānāṃ ca sarveṣāṃ prathayiṣyāmi mā śucaḥ //

diṣṭametannaravyāghra nābhiśocitumarhasi /
na caiva śakyaṃ saṃyantuṃ yato dharmastato jayaḥ //
vaiśampāyana uvāca /

evamuktvā sa bhagavānkurūṇāṃ pratitāmahaḥ /
punareva mahābhāgo dhṛtarāṣṭramuvāca ha //

iha yuddhe mahārāja bhaviṣyati mahānkṣayaḥ /
tatheha ca nimittāni bhayadānyupalakṣaye //

śyenā gṛdhrāśca kākāśca kāṅkāśca sahitā bakaiḥ /
sampatanti dhvajāgreṣu samavāyāṃśca kurvate //

abhyagraṃ ca prapaśyanti yuddhamānandino dvijāḥ /
kravyādā bhakṣayiṣyanti māṃsāni gajavājināṃ //

kaṭākaṭeti vāśanto bhairavā bhayavedinaḥ /
kaṅkāḥ krośanti madhyāhne dakṣiṇāmabhito diśaṃ //

ubhe pūrvāpare sandhye nityaṃ paśyāmi bhārata /
udayāstamane sūryaṃ kabandhaiḥ parivāritam //

śvetalohitaparyantāḥ kṛṣṇāgrīvāḥ savidyutaḥ /
trivarṇāḥ parighāḥ sandhau bhānumāvārayantyuta //

jvalitārke // .traṃ nirviśeṣadinakṣapam . candro'bhūtagnivarṇaśca padmavarṇe nabhastale /

ālakṣe prabhayā hīnāṃ paurṇamāsīṃ ca kīrtikīm /
candro'bhūdagnivarṇaśca padmavarṇe nabhastale //

svapsyanti nihatā vīrā bhūmimāvṛtya pārthivāḥ /
rājāno rājaputrāśca śūrāḥ parighabāhavaḥ //

antarikṣe varāhasya pṛṣadaṃśakasya cobhayoḥ /
praṇādaṃ yudhyato rātrau raudraṃ nityaṃ pralakṣaye //

devatāpratimāścaiva kampanti ca hasanti ca /
vamanti rudhiraṃ cāsyaiḥ svidyanti prapatanti ca //

anāhatā dundubhayaḥ praṇadanti viśāmpate /
ayuktāśca pravartante kṣatriyāṇāṃ mahārathāḥ //

kokilāḥ śatapatrāśca cāṣā bhāsāḥ śukāstathā /
sārasāśca mayūrāśca vāco muñcanti dāruṇāḥ //

gṛhītaśastrāḥ krośanti carmiṇo vājipṛṣṭhagāḥ /
aruṇodaye pradṛśyante śataśaḥ śalabhavrajāḥ //

ubhe sandhye prakāśante diśo dāhasamanvite /
parjanyaḥ pāṃsuvarṣī ca māṃsavarṣī ca bhārata //

yā caiṣā viśrutā rājaṃstrailokye sādhusammatā /
arundhatī tayāpyeṣa vasiṣṭhaḥ pṛṣṭhataḥ kṛtaḥ //

rohiṇīṃ pīḍayanneṣa sthito rājañśanaiścaraḥ /
vyāvṛttaṃ lakṣma somasya bhaviṣyati mahadbhayam //

anabhre ca mahāghorastanitaṃ śrūyate bhṛśam /
vāhanānāṃ ca rudatāṃ nipatantyuśrubindavaḥ //