Mahabharata · Chapter 6.1

ekasthāḥ sarvavarṇāste maṇḍalaṃ bahuyojanam /
paryākrāmanta deśāṃśca nadīḥ śailānvanāni ca //

teṣāṃ yudhiṣṭhiro rājā sarveṣāṃ puruṣarṣabha /
vyādideśa savāhānāṃ bhakṣyabhojyamanuttamam //

sañjñāya vividhāstāta teṣāṃ cakre yudhiṣṭhiraḥ /
evaṃvādī veditavyaḥ pāṇḍaveyo'yamityuta //

abhijñānāni sarveṣāṃ sañjñāścābharaṇāni ca /
yojayāmāsa kauravyo yuddhakāla upasthite //

dṛṣṭvā dhvajāgraṃ pārthasya dhārtarāṣṭro mahāmanāḥ /
saha sarvairmahīpālaiḥ pratyavyūhata pāṇḍavam //

pāṇḍureṇātapatreṇa dhriyamāṇena mūrdhani /
madhye nāgasahasrasya bhrātṛbhiḥ parivāritaḥ //

dṛṣṭvā duryodhanaṃ hṛṣṭāḥ pāñcālā yuddhanandinaḥ /
dadhmuḥ prītā mahāśaṅkhānbherīrjaghnuḥ sahasraśaḥ //

tataḥ prahṛṣṭāṃ svāṃ senāmabhivīkṣyātha pāṇḍavāḥ /
babhūvurhṛṣṭamanaso vāsudevaśca vīryavān //

svayodhānharṣayantau ca vāsudevadhanañjayau /
dadhmatuḥ puruṣavyāghrau divyau śaṅkhau rathe sthitau //

pāñcajanyasya śaṅkhasya devadattasya cobhayoḥ /
śrutvā tu ninadaṃ yodhāḥ śakṛnmūtraṃ prasusruvuḥ //

yathā siṃhasya nadataḥ svanaṃ śrutvetare mṛgāḥ /
trayeyurninadaṃ śrutvā tathā'sīdata tadbalam //

udatiṣṭhadrajo bhaumaṃ na prājñāyata kiñcana /
astaṃ gata ivādityaḥ sainyena rajasā vṛtaḥ //

savarṣa tatra parjanyo māṃsaśoṇitavṛṣṭimān /
vyukṣansarvāṇi sainyāni tadadbhutamivābhavat //

vāyustataḥ prādūrabhūnnīcaiḥ śarkarakarṣaṇaḥ /
vinighnaṃstānyanīkāni śataśo'tha sahasraśaḥ //

ubhe sainye ca rājendra yuddhāya mudite bhṛśam /
kurukṣetre sthite yatte sāgarakṣubhitopame //

tayostu senayorāsīdadbhutaḥ sa tu sangamaḥ /
yugānte samanuprāpte dvayoḥ sāgarayoriva //

śūnyā'sītpṛthivī sarvā vṛddhabālāvaśeṣitā / niraśvapuruṣevāsīdrathakuñjaravarjitā /
tena senāsamūhena samānītena kauravaiḥ //

tataste samayaṃ cakruḥ kurupāṇḍavasomakāḥ /
dharmānsaṃsthāpayāmāsuryuddhānāṃ bharatarṣabha //

nivṛtte vihite yuddhe syātprītirnaḥ parasparam /
yathāparaṃ yathāyogaṃ na ca syātkasyacitpunaḥ //

vācā yuddhe pravṛttānāṃ vācaiva pratiyodhanam /
niṣkrāntāḥ pṛtanāmadhyānna hantavyāḥ kadācana //

rathī ca rathinā yodhyo gajena gajadhūrgataḥ /
aśvenāśvī padātiśca pādātenaiva bhārata //

yathāyogaṃ yathākāmaṃ yathotsāhaṃ yathābalam /
samābhāṣya prahartavyaṃ na viśvaste na vihvale //

pareṇa saha saṃyuktaḥ pramatto vimukhastathā /
kṣīṇaśastro vivarmā ca na hantavyaḥ kadācana //

na sūteṣu na dhuryeṣu na ca śastropanāyiṣu /
na bherīśaṅkhavādeṣu prahartavyaṃ kathañcana //

evaṃ te samayaṃ kṛtvā kurupāṇḍavasomakāḥ /
vismayaṃ paramaṃ jagmuḥ prekṣamāṇāḥ parasparam //

niviśya ca mahātmānastataste puruṣarṣabhāḥ /
hṛṣṭarūpāḥ samunaso babhūvuḥ sahasainikāḥ //