Mahabharata · Chapter 6.122

tataste pārthivāḥ sarve jagmuḥ svānālayānpunaḥ /
tūṣṇīmbhūte mahārāja bhīṣme śantanunandane //

śrutvā tu nihataṃ bhīṣmaṃ rādheyaḥ puruṣarṣabhaḥ /
īṣadāgatasantrāsastvarayopajagāma ha //

sa dadarśa mahātmānaṃ śaratalpagataṃ tadā /
janmaśayyāgataṃ vīraṃ kārtikeyamiva prabhum //

nimīlitākṣaṃ taṃ vīraṃ sāśrukaṇṭhastadā vṛṣā /
abhyetya pādayostasya nipapāta mahādyutiḥ //

rādheyo'haṃ kuruśreṣṭha nityamakṣigatastava /
dvebhyo'tyantamanāgāḥ sanniti cainamuvāca ha //

tacchrutvā kuruvṛddho hi śaraiḥ saṃvṛtalocanaḥ /
rahitaṃ dhiṣṇyamālokya samutsārya ca rakṣiṇaḥ //

piteva putraṃ gāṅgeyaḥ parirabhyaikapāṇinā /
śanairudvīkṣya sasnehamidaṃ vacanamabravīt //

na vipriyaṃ mamaiveha yatspardhethā mayā saha /
yadi māṃ nādhigacchethā na te śreyo dhruvaṃ bhavet //

kaunteyastvaṃ na rādheyo na tavādhirathaḥ pitā /
sūryajastvaṃ mahābāho vidito nāradānmayā //

kṛṣṇadvaipāyanāccaiva tejasā ca na saṃśayaḥ /
na ca dveṣosti me tāta tvayi satyaṃ bravīmi te //

tejovadhanimittaṃ tu paruṣaṃ tvāhamabruvam /
akasmātpāṇḍavānhi tvaṃ dviṣasīti matirmama //

yenāsi bahuśo rājñā coditaḥ sūtanandana /
jāto'si dharmalopena tataste buddhirīdṛśī //

nīcāśrayānmatsareṇa dveṣiṇī gumināmapi /
tenāsi bahuśo rūkṣaṃ śrāvitaḥ kurusaṃsadi //

jānāmi samare vīryaṃ śatrubhirduḥsahaṃ bhuvi /
brahmaṇyatāṃ ca śauryaṃ ca dāne ca paramāṃ sthitim //

na tvayā sadṛśaḥ kaścitpuruṣeṣvamaropama /
kulabhedabhayāccāhaṃ sadā paruṣamuktavān //

iṣvastre bhārasandhāne lāghave'strabale tathā /
sadṛśaḥ phalgunenāsi kṛṣṇena ca mahātmanā //

karṇa kāśipuraṃ gatvā tvayaikena dhanuṣmatā /
kanyārthe kururājasya rājāno mṛditā yudhi //

tathā ca balavānrājā jarāsandho durāsadaḥ /
samare samaraślāghinna tvayā sadṛśo'bhavat //

brahmaṇyaḥ sattvayodhī ca tejasā ca balena ca /
devagarbhasamaḥ saṅkhye manuṣyairadhiko yudhi //

vyapanīto'dya manyurme yastvāṃ prati purā kṛtaḥ /
daivaṃ puruṣakāreṇa na śakyamativartitum //

sodaryāḥ pāṇḍavā vīrā bhrātaraste'risūdana /
sangaccha tairmahābāho mama cedicchasi priyam //

mayā bhavatu nirvṛttaṃ vairamādityanandana /
pṛthivyāṃ sarvarājāno bhavantvadya nirāmayāḥ //
karṇa uvāca /

jānāmyeva mahābāho sarvametanna saṃśayaḥ /
yathā vadasi me bhīṣma kaunteyo'haṃ na sūtajaḥ //

avakīrṇastvahaṃ kuntyā sūtena ca vivardhitaḥ /
bhuktvā duryodhanaiśvaryaṃ na mithyā kartumutsahe //

vasudevasuto yadvatpāṇḍavāya dṛḍhavrataḥ /
vamu caiva śarīraṃ ca putradāraṃ tathā yaśaḥ //

sarvaṃ duryodhanasyārthe tyaktaṃ me bhūridakṣiṇa /
mā caitadvyādhimaraṇaṃ kṣatraṃ syāditi kaurava //

kopitāḥ pāṇḍavā nityaṃ mayā'śritya suyodhanam /
avaśyabhāvī hyartho'yaṃ yo na śakyo nivartitum //

daivaṃ puruṣakāreṇa ko vivartitumutsahet /
pṛthivīkṣayasaṃśīni nimittāni pitāmaha //

bhavadbhirupalabdhāni kathitāni ca saṃsadi /
pāṇḍavā vāsudevaśca viditā mama sarvaśaḥ //

ajeyāḥ puruṣairanyairiti taṃścotsahāmahe /
vijayiṣye raṇe pāṇḍūniti me niścitaḥ manaḥ //

na ca śakyamavasraṣṭuṃ vairametatsudāruṇam /
dhanañjayena yotsye'haṃ svadharmaprītamānasaḥ //

anujānīṣva māṃ tāta yuddhāya kṛtaniścayam /
anujñātastvayā vīra yudhyeyamiti me matiḥ //

duruktaṃ vipratīpaṃ vā rabhasāccāpalāttathā /
yanmayeha kṛtaṃ kiñcittanme tvaṃ kṣantumarhasi //
bhīṣma uvāca /

na cecchakyamavasraṣṭuṃ vairametatsudāruṇam /
anujānāmi karṇa tvāṃ yudhyasva svargakāmyayā //

nirmanyurgatasaṃrambhaḥ kṛtakarmā raṇe sma ha /
yathāśakti yathotsāhaṃ satāṃ vṛtteṣu vṛttavān //

ahaṃ tvāmanujānāmi yadicchasi tadāpnuhi /
kṣatradharmajitām̐llokānavāpsyasi dhanañjayāt //

yudhyasva nirahankāro balavīryavyapāśrayaḥ /
dharmyāddhi yuddhādadhikaṃ kṣatriyasya na vidyate //

praśame hi kṛto yatnaḥ sumahānsuciraṃ mayā /
na caiva śakitaḥ kartuṃ yato dharmastato jayaḥ //
sañjaya uvāca /

ityuktavati gāṅgeye abhivādyopamantrya ca /
rādheyo rathamāruhya prāyāttava sutaṃ prati //
vaiśampāyana uvāca /

ityetadbahuvṛttāntaṃ bhīṣmaparvākhilaṃ mayā /
śṛṇvate te mahārāja proktaṃ pāpaharaṃ śubham //

yaḥ śrāvayetsadā rājanbrāhmaṇānvedapāragān /
śraddhāvantaśca ye cāpi śroṣyanti manujā bhuvi //

vidhūya sarvapāpāni vihāyānte kalevaram /
prayānti tatpadaṃ viṣṇoryatprāpya na nivartate //

tasmātsarvaprayatnena bhārataṃ bharatarṣabha /
śṛṇuyātsiddhimanvicchanniha vāmutra mānavaḥ //

bhojanaṃ bhojayedviprāngandhamālyairalaṅkṛtān . bhīṣmaparvaṇi rājendra dadyātpānīyamuttamam //