Mahabharata · Chapter 5.196

tathaiva rājā kaunteyo dharmaputro yudhiṣṭhiraḥ /
dhṛṣṭadyumnamukhānvīrāṃścodayāmāsa bhārata //

cedikāśikarūśānāṃ netāraṃ dṛḍhavikramam /
senāpatimamitraghnaṃ dhṛṣṭaketumathādiśat //

virāṭaṃ drupadaṃ caiva yuyudhānaṃ śikhaṇḍinam /
pāñcālyau ca maheṣvāsau yudhāmanyūttamaujasau //

te śūrāścitravarmāṇastaptakuṇḍaladhāriṇaḥ /
ājyāvasiktā jvalitā dhiṣṇyeṣviva hutāśanāḥ //

aśobhanta maheṣvāsā grahāḥ prajvalitā iva /
atha sainyaṃ yathāyogaṃ pūjayitvā nararṣabhaḥ //

dideśa tānyanīkāni prayāṇāya mahīpatiḥ /
teṣāṃ yudhiṣṭhiro rājā sasainyānāṃ mahātmanām //

vyādideśa sabāhyānāṃ bhakṣyabhojyamanuttamam /
sa gajāśvamanuṣyāṇāṃ ye ca śilpopajīvinaḥ //

abhimanyuṃ bṛhantaṃ ca draupadeyāṃśca sarvaśaḥ /
dhṛṣṭadyumnamukhānetānprāhiṇotpāṇḍunandanaḥ //

bhīmaṃ ca yuyudhānaṃ ca pāṇḍavaṃ ca dhanañjayam /
dvitīyaṃ preṣayāmāsa balaskandhaṃ yudhiṣṭiraḥ //

bhāṇḍaṃ samāropayatāṃ caratāṃ sampradhāvatām /
hṛṣṭānāṃ tatra yodhānāṃ śabdo divamivāspaśat //

svayameva tataḥ paścādvirāṭadrapadānvitaḥ /
athāparairmahīpālaiḥ saha prāyānmahīpatiḥ //

bhīmadhanvāyatī senā dhṛṣṭadyumnena pālitā /
gaṅgeva pūrṇā stimitā syandamānā vyadṛśyata //

tataḥ punaranīkāni nyayojayata buddhimān /
mohayandhṛtarāṣṭrasya putrāṇāṃ buddhiniścayam //

draupadeyānmaheṣvāsānabhimanyuṃ ca pāṇḍavaḥ /
nakulaṃ sahadevaṃ ca sarvāṃścaiva prabhadrakān //

daśa cāśvasahasrāṇi dvisahastrāṇi dantinām /
ayutaṃ ca padātīnāṃ rathāḥ pañcaśataṃ tathā //

bhīmasenasya durdharṣaṃ prathamaṃ prādiśadbalam /
madhyame ca virāṭaṃ ca jayatsenaṃ ca pāṇḍavaḥ //

mahārathau ca pāñcālyau yudhāmanyūttamaujasau /
vīryavantau mahātmānau yudhāmanyūttamaujasau //

anvayātāṃ tadā madhye vāsudevadhanañjayau . tau dṛṣṭvā pṛthivīpālā naṣṭamityeva menire /
antarikṣagatāḥ sarve devāḥ sendrapurogamāḥ //

babhūvuratisaṃrabdhāḥ kṛtapraharaṇā narāḥ / teṣāṃ viṃśatisāhasrā hayāḥ śūrairadhiṣṭhitāḥ /
pañca nāgasahasrāṇi rathavaṃśāśca sarvaśaḥ //

padātayaśca ye śūrāḥ kārmukāsigadādharāḥ /
sahasraśo'nvayuḥ paścādagrataśca sahasraśaḥ //

yudhiṣṭhiro yatra sainye svayameva balārṇave /
tatra te pṛthivīpālā bhūyiṣṭhaṃ paryavasthitāḥ //

tatra nāgasahasrāṇi hayānāmayutāni ca /
tathā rathasahasrāṇi padātīnāṃ ca bhārata //

cekitānaḥ svasainyena mahatā pārthivarṣabha /
dhṛṣṭaketuśca cedīnāṃ praṇetā pārthivo yayau //

sātyakiśca maheṣvāso vṛṣṇīnāṃ pravaro rathaḥ /
vṛtaḥ śatasahasreṇa rathānāṃ pramudanbalī //

kṣatradevabrahmadevau rathasthau puruṣarṣabhau /
jaghanaṃ pālayantau ca pṛṣṭhato'nuprajagmatuḥ //

śakaṭāpaṇaveśāśca yānaṃ yugyaṃ ca sarvaśaḥ . tatra nāgasahasrāṇi hayānāmayutāni ca /
phalgu sarvaṃ kalatraṃ ca yatkiñcitkṛśadurbalam //

kośasañcayavāhāṃśca koṣṭhāgāraṃ tathaiva ca /
gajānīkena sangṛhya śanaiḥ prāyādyudhiṣṭhiraḥ //

tamanvayātsatyadhṛtiḥ saucittiryuddhadurmadaḥ /
śreṇimānvasudānaśca putraḥ kāśyasya vā vibhuḥ //

rathā viṃśatisāhasrā ye teṣāmanuyāyinaḥ /
hayānāṃ daśa koṭyaśca mahatāṃ kinkiṇīkinām //

gajā viṃśatisāhasrā īṣādantāḥ prahāriṇaḥ /
kulīnā bhinnakaraṭā meghā iva visarpiṇaḥ //

ṣaṣṭirnāgasahasrāṇi daśānyāni ca bhārata /
yudhiṣṭhirasya yānyāsanyudhi senā mahātmanaḥ //

kṣaranta iva jīmūtāḥ prabhinnakaraṭāmukhāḥ /
rājānamanvayuḥ paścāccalanta iva parvatāḥ //

evaṃ tasya balaṃ bhīmaṃ kuntīputrasya dhīmataḥ /
yadāśrityātha yuyudhe dhārtarāṣṭraṃ suyodhanam //

tato'nye śataśaḥ paścātsahasrāyutaśo narāḥ /
nardantaḥ prayayusteṣāṇanīkāni sahasraśaḥ //

tatra bherīsahasrāṇi śaṅkhānāmayutāni ca /
nyavādayanta saṃhṛṣṭāḥ sahasrāyutaśo narāḥ //