Mahabharata · Chapter 5.91

pṛthāmāmantrya govindaḥ kṛtvā cābhipradakṣiṇam /
duryodhanagṛhaṃ śaurirabhyagacchadarindamaḥ //

lakṣmyā paramayā yuktaṃ purandaragṛhopamam /
vicitrairāsanairyuktaṃ praviveśa janārdanaḥ //

tasya kakṣyā vyatikramya tisro dvāḥsthairavāritaḥ /
tato'bhraghanasaṅkāśaṃ girikūṭamivocchritam //

śriyā jvalantaṃ prāsādamāruroha mahāyaśāḥ /
tatra rājasahasraiśca kurubhiścābhisaṃvṛtam //

dhārtarāṣṭraṃ mahābāhuṃ dadarśāsīnamāsane /
duḥśāsanaṃ ca karṇaṃ ca śakuniṃ cāpi saubalam //

duryodhanasamīpe tānāsanasthāndadarśa saḥ /
abhyāgacchati dāśārhe dhārtarāṣṭro mahāyaśāḥ //

udatiṣṭhatsahāmātyaḥ pūjayanmadhusūdanam /
sametya dhārtarāṣṭreṇa mahāmātyena keśavaḥ //

rājabhistatra vārṣṇeyaḥ samāgacchadyathāvayaḥ /
tatra jāmbūnadamayaṃ paryaṅkaṃ supariṣkṛtam //

vividhāstaraṇāstīrṇamabhyupāviśadacyutaḥ /
tasmingāṃ madhuparkaṃ cāpyudakaṃ ca janārdane //

nivedayāmāsa tadā gṛhānrājyaṃ ca kauravaḥ . 5-91-10b āsanaṃ sarvatobhadraṃ sarvaratnavibhūṣitam //

kṛṣṇārthamevaṃ saṃsiddhaṃ dhārtarāṣṭrasya śāsanāt / tatra govindamāsīnaṃ prasannādityavarcasam //

upāsāñcakrire sarve kuravo rājabhiḥ saha /
tato duryodhano rājā vārṣṇeyaṃ jayatāṃ varam //

nyamantrayadbhojanena nābhyanandacca keśavaḥ /
tato duryodhanaḥ kṛṣṇamabravītkurusaṃsadi //

mṛdupūrvaṃ śaṭhodarkaṃ karṇamābhāṣya kauravaḥ /
kasmādannāni pāpāni vāsāṃsi śayanāni ca //

tvadarthamupanītāni nāgrahīstvaṃ janārdana /
ubhayośca dadatsāhyamubhayośca hite rataḥ //

sambandhī dayitaścāsi dhṛtarāṣṭrasya mādhava . tvaṃ hi govinda dharmārthau vettha tattvena sarvaśaḥ /
tatra kāraṇamicchāmi śrotuṃ cakragadādhara //
vaiśampāyana uvāca /

sa evamukto govindaḥ pratyuvāca mahāmanāḥ /
udyanmeghasvanaḥka kāle pragṛhya vipulaṃ bhujam //

alaghūkṛtamagrastamanirastamasankulam /
rājīvanetro rājānaṃ hetumadvākyamuttamam //

kṛtārthā bhuñjate dūtāḥ pūjāṃ gṛhṇanti caiva ha /
kṛtarthaṃ māṃ sahāmātyaṃ samarciṣyasi bhārata //

evamuktaḥ pratyuvāca dhārtarāṣṭro janārdanam /
na yuktaṃ bhavatā'smāsu pratipattumasāmptam //

kṛtārthaṃ vā'kṛtārthaṃ vā tvāṃ vayaṃ madhusūdana /
yatāmahe pūjayituṃ dāśārha na ca śaknumaḥ //

na ca tatkāraṇaṃ vidmo yasmānno madhusūdana /
pūjāṃ kṛtāṃ prīyamāṇo nāmaṃsthāḥ puruṣottama //

vairaṃ no nāsti bhavatā govinda na ca vigrahaḥ /
sa bhavānprasamīkṣyaitannedṛśaṃ vaktumarhati //
vaiśampāyana uvāca /

evamuktaḥ pratyuvāca dhārtarāṣṭraṃ janārdanaḥ /
abhivīkṣya sahāmātyaṃ dāśārhaḥ prahasanniva //

nāhaṃ kāmānna saṃrambhānna dveṣānnārthakāraṇāt /
na hetuvādāllobhādvā dharmaṃ jahyāṃ kathañcana //

samprītibhojyānyannāni āpadbhojyāni vā punaḥ /
na ca samprīyate rājanna caivāpadgatā vayam //

dviṣadannaṃ na bhoktavyaṃ dviṣantaṃ naiva bhojayet . pāṇḍavāndviṣase rājanmama prāṇā hi pāṇḍavāḥ //

akasmāddviṣase rājañjanmaprabhṛti pāṇḍavān /
priyānuvartino bhrātṝnsarvaiḥ samuditānguṇaiḥ //

akasmāccaiva pārthānāṃ dveṣaṇaṃ nopapadyate /
dharme sthitāḥ pāṇḍaveyāḥ kastānkiṃ vaktumarhati //

yastāndveṣṭi sa māṃ dveṣṭi yastānanu samāmanu /
aikātmyaṃ māṃ gataṃ viddhi pāṇḍavairdharmacāribhiḥ //

kāmakrodhānuvartī hi yo mohādvirurutsati /
guṇavantaṃ ca yo dveṣṭi tamāhuḥ puruṣādhamam //

yaḥ kalyāṇaguṇāñjñātīnmohāllobhāddidṛkṣate /
sojitātmā'jitakrodho na ciraṃ tiṣṭhati śriyā //

atha yo guṇasampannānhṛdayasyāpriyānapi /
priyeṇa kurute vaśyāṃściraṃ yaśasi tiṣṭhati //

sarvametanna bhoktavyamannaṃ duṣṭābhisaṃhitam /
kṣutturekasya bhoktavyamiti me dhīyate matiḥ //

evamuktvā mahābāhurduryodhanamamarṣaṇam /
niścakrāma tataḥ śubhrāddhārtarāṣṭraniveśanāt //

niryāya ca mahābāhurvāsudevo mahāmanāḥ /
niveśāya yayau veśya vidurasya mahātmanaḥ //

tamabhyagacchaddroṇaśca kṛpo bhīṣmo'tha bāhlikaḥ /
kuravaśca mahābāhuṃ vidurasya gṛhe sthitam //

ta ūcurmādhavaṃ vīraṃ kuravo madhusūdanam /
nivedayāmo vārṣṇeya saratnāṃste gṛhānvayam //

tānuvāca mahātejāḥ kauravānmadhusūdanaḥ /
sarve bhavante gacchantu sarvā me'pacitiḥ kṛtā //
vaiśampāyana uvāca /

yāteṣu kuruṣu kṣattā dāśārhamaparājitam /
abhyarcayāmāsa tadā sarvakāmaiḥ prayatnavān //

tataḥ kṣatrā'nnapānāni śucīni guṇavanti ca /
upāharadanekāni keśavāya mahātmane //

taitarpayitvā prathamaṃ brāhmaṇānmadhusūdanaḥ /
vedavidbhyo dadau kṛṣṇaḥ paramadraviṇānyapi //

bhuktavatsu dvijāgryeṣu niṣaṇṇeṣu varāsane /
śuciḥ suprayato bhūnvā viduro'nnamupārat //

śraddhayā parayā yukta idaṃ vacanamabravīt / saṃvṛtaistuṣya govinda etannaḥ dhanam /
anyathā hi viśeṣeṇa kastvāmarcitumarhati //
vaiśampāyana uvāca /

tato'nuyāyibhiḥ sārdhaṃ marudbhiriva vāsavaḥ /
vidurānnāni bubhuje śucīni guṇavanti ca //

taṃ bhuktavantaṃ vividhāḥ suśabdāḥ sūtamāgadhāḥ /
abhituṣṭuvurāsīnaṃ dāśārhamaparājitam //