Mahabharata · Chapter 5.92

taṃ bhuktavantamāśvastaṃ niśāyāṃ viduro'bravīt /
nedaṃ samyagvyavasitaṃ keśavāgamanaṃ tava //

arthadharmātigo mandaḥ saṃrambhī ca janārdana /
mānaghno mānakāmaśca vṛddhānāṃ śāsanātigaḥ //

dharmaśāstrātigo mūḍho durātmā pragrahaṃ gataḥ /
aneyaḥ śreyasāṃ mando dhārtarāṣṭro janārdana //

kāmātmā prājñamānī ca mitradhruksarvaśaṅkitā /
akartā cākṛtajñaśca tyaktadharmā priyānṛtaḥ //

mūḍhaśvākṛtabuddhiśca indriyāṇāmanīśvaraḥ /
kāmānusārī kṛtyeṣu sarveṣvakṛtaniścayaḥ //

etaiścānyaiśca bahubhirdoṣaireva samanvitaḥ /
tvayocyamānaḥ śreyo'pi saṃrambhānna grahīṣyati //

bhīṣme droṇe kṛpe karṇe droṇaputre jayadrathe /
bhūyasīṃ vartate vṛttiṃ na śame kurute manaḥ //

niścitaṃ dhārtarāṣṭrāṇāṃ sakarṇānāṃ janārdana /
bhīṣmadroṇamukhānpārthā na śaktāḥ prativīkṣitum //

senāsamudayaṃ kṛtvā pārthivaṃ madhusūdana /
kṛtārthaṃ manyate bāla ātmānamavicakṣaṇāḥ //

ekaḥ karṇaḥ parāñjetuṃ samartha iti niścitam /
dhārtarāṣṭrasya durbuddheḥ sa śamaṃ nopayāsyati //

saṃvicca dhārtarāṣṭrāṇāṃ sarveṣāmeva keśava /
śame prayatamānasya tava saubhrātrakāṅkṣiṇaḥ //

na pāṇḍavānāmasmābhiḥ pratideyaṃ yathocitam /
iti vyavasitāsteṣu vacanaṃ syānnirarthakam //

yatra sūktaṃ duruktaṃ ca samaṃ syānmadhusūdana /
na tatra pralapetprājño badhireṣviva gāyanaḥ //

avijānatsu mūḍheṣu nirmaryādeṣu mādhava /
tattvaṃ vākyaṃ bruvannindyaścaṇḍāleṣu dvijo yathā //

so'yaṃ balastho mūḍhaścana kariṣyati te vacaḥ /
tasminnirarthakaṃ vākyamuktaṃ sampatsyate tava //

teṣāṃ samupaviṣṭānāṃ sarveṣāṃ pāpacetasām /
tava madhyāvataraṇaṃ mama kṛṣṇa na rocate //

durbuddhīnāmaśiṣṭānāṃ bahūnāṃ duṣṭacetasām /
pratīpaṃ vacanaṃ madhye tava kṛṣṇa na rocate //

anupāsitavṛddhatvācchriyo darpācca mohitaḥ /
vayodarpādamarṣācca na te śreyo grahīṣyati //

balaṃ balavadapyasya yadi vakṣyasi mādhava /
tvayyasya mahatī śaṅkā na kariṣyati te vacaḥ //

nedamadya yudhā śakyamindreṇāpi sahāmaraiḥ /
iti vyavasitāḥ sarve dhārtarāṣṭrā janārdana //

teṣvevamupapanneṣu kāmakrodhānuvartiṣu /
samarthamapi te vākyamasamarthaṃ bhaviṣyati //

madhye tiṣṭhanhastyanīkasya mando rathāśvayuktasya balasya mūḍhaḥ /
duryodhano manyate bītabhītiḥ kṛtsnā mayeyaṃ pṛthivī jiteti //

āśaṃsate vai dhṛtarāṣṭrasya putro mahārājyamasapatnaṃ pṛthivyām /
tasmiñśamaḥ kevalo nopalabhyo baddhaṃ santaṃ manyate labdhamartham //

paryasteyaṃ pṛthivī kālapakvā duryodhanārthe pāṇḍavānyoddhukāmāḥ /
samāgatāḥ sarvayodhāḥ pṛthivyāṃ rājānaśca kṣitipālaiḥ sametāḥ //

sarve caite kṛtavairāḥ purastā- ttvayā rājāno hṛtasārāśca kṛṣṇa /
tavodvegātsaṃśritā dhārtarāṣṭrā- nsusaṃhatāḥ saha karṇena vīrāḥ //

tyaktātmānaḥ saha duryodhanena hṛṣṭā yoddhuṃ pāṇḍavānsarvayodhāḥ /
mṛtyurjayo veti kṛtaikabhāvāḥ kāmātmāno manyuvaśāvinītāḥ // teṣāṃ madhye praviśethā yadi tvaṃ na tanmataṃ mama dāśārhavīra //

teṣāṃ samupaviṣṭānāṃ bahūnāṃ duṣṭacetasām /
kathaṃ madhyaṃ prapadyethāḥ śatrūṇāṃ śatrukarśana //

sarvathā tvaṃ mahābāho devairapi durutsahaḥ /
prabhāvaṃ pauruṣaṃ buddhiṃ jānāmi tava śatruhan //

yā me prītiḥ pāṇḍaveṣu bhūyaḥka sā tvayi mādhava /
premṇā ca bahumānācca sauhṛdācca bravīmyaham //

yā me prītiḥ puṣkarākṣa tvaddarśanasamudbhavā /
sā kimākhyāyate tubhyamantarātmā'si dehināṃ //