Mahabharata · Chapter 5.7

purohitaṃ te prasthāpya nagaraṃ nāgasāhvayam /
dūtānprasthāpayāmāsuḥ pārthivebhyastatastataḥ //

prasthāpya dūtānanyatra dvārakāṃ puruṣarṣabhaḥ /
svayaṃ jagāma kauravyaḥ kuntīputro dhanañjayaḥ //

gate dvāravatīṃ kṛṣṇa baladeve ca mādhave /
saha vṛṣṇyandhakaiḥ sarvairbhojaiśca śataśastadā //

sarvamāgamayāmāsa pāṇḍavānāṃ viceṣṭitam /
dhṛtarāṣṭrātmajo rājā gūḍhaiḥ praṇihitaiścaraiḥ //

sa śrutvā mādhavaṃ yāntaṃ sadaśvairanilopamaiḥ /
balena nātimahatā dvārakāmabhyayātpurīm //

tameva divasaṃ cāpi kaunteyaḥ pāṇḍunandanaḥ /
ānanratanagarīṃ ramyāṃ jagāmāśu dhanañjayaḥ //

tau yātvā puruṣavyāghrau dvārakāṃ kurunandanau /
suptaṃ dadṛśatuḥ kṛṣṇaṃ śayānaṃ cābhijagmatuḥ //

duryodhanastu prathamaṃ vāsudevamupāśrayat /
ucchīrṣataśca kṛṣṇasya niṣasāda varāsane //

tataḥ kirīṭī tasyānu praviveśa mahāmanāḥ /
paścārdhe tu sa kṛṣṇasya prahvo'tiṣṭhatkṛtāñjaliḥ //

pratibuddhaḥ sa vārṣṇeyo dadarśāgre kirīṭinām /
siṃhāsanagataṃ paścātparivṛtya ca dṛṣṭavān //

sa tayoḥ svāgataṃ kṛtvā yathāvatpratipūjya tau /
tadāgamanajaṃ hetuṃ papraccha madhusūdanaḥ //

tato duryodhanaḥ kṛṣṇāmuvāca prahasanniva /
vigrahe'sminbhavānsāhyaṃ mama dātumihārhati //

samaṃ hi bhavataḥ sakhyaṃ mama caivārjune'pi ca /
tathā sambandhakaṃ tulyamasmākaṃ tvayi mādhava //

ahaṃ cābhigataṃ santo bhajante pūrvasāriṇaḥ // tvaṃ ca śreṣṭhatamo loke satāmadya janārdana /

satataṃ sammataścaiva sadvṛttamanupālaya //
kṛṣṇa uvāca /

bhavānabhigataḥ pūrvamatra me nāsti saṃśayaḥ /
dṛṣṭastu prathamaṃ rājanmayā pārtho dhanañjayaḥ //

tava pūrvābhigamanātpūrvaṃ cāpyasya darśanāt /
sāhāyyamubhayoreva kariṣyāmi suyodhana //

pravāraṇaṃ tu bālānāṃ pūrvaṃ kāryamiti śrutiḥ /
tasmātpravāraṇaṃ pūrvamarhaḥ pārtho dhanañjayaḥ //

matsaṃhananatulyānāṃ gopānāmarbudaṃ mahat /
nārāyaṇā iti khyātāḥ sarve sangrāmayodhinaḥ //

te vā yudhi durādharṣā bhavantvekasya sainikāḥ /
ayudhyamānaḥ sangrāme nyastaśastro'hamekataḥ //

ābhyāmanyataraṃ pārtha yatte hṛdyataraṃ matam /
tadvṛṇītāṃ bhavānagre pravāryastvaṃ hi dharmataḥ //

etadviditvā kaunteya vicārya ca punaḥ punaḥ . tānvā varaya sāhāyye māṃ sācivye'thavā punaḥ
vaiśampāyana uvāca /

evamuktastu kṛṣṇena kuntīputre dhanañjayaḥ /
ayudhyamānaṃ sangrāme varayāmāsa keśavam //

nārāyaṇamamighnaṃ kāmājjātamajaṃ nṛṣu /
sarvakṣatrasya purato devadānavayorapi //

duryodhanastu tatsainyaṃ sarvamāvarayattadā /
sahasrāṇāṃ mahasraṃ tu yodhānāṃ prāpya bhārata //

kṛṣṇaṃ cāpahṛtaṃ jñātvā samprāpa paramāṃ mudam /
duryodhanastu tatsainyaṃ sarvamādāya pārthivaḥ //

tato'bhyayādbhīmabalo rauhiṇeyaṃ mahābalam . sarvaṃ cāgamane hetuṃ sa tasmai sannyavedayat /
pratyuvāca tataḥ śaurirdhārtarāṣṭramidaṃ vacaḥ //
baladeva uvāca /

viditaṃ te naravyāghra sarvaṃ bhavitumarhati /
yanmayoktaṃ virāṭasya purā vaivāhike tadā //

nigṛhyokto hṛṣīkeśastvadarthaṃ kurunandana /
mayā sambandhakaṃ tulyamiti rājanpunaḥpunaḥ //

na ca tadvākyamuktaṃ vai keśavaṃ pratyapadyata /
na cāhamutsahe kṛṣṇaṃ vinā sthātumapi kṣaṇam //

nāhaṃ sahāyaḥ pārthasya nāpi duryodhanasya vai /
iti me niścitā buddhirvāsudevamavekṣya ha //

jāto'si bhārate vaṃśe sarvapārthivapūjite /
gaccha yudhyasva dharmeṇa kṣātreṇa puruṣarṣabha //
vaiśampāyana uvāca /

ityevamuktastu tadā pariṣvajya halāyudham /
kṛṣṇaṃ cāpi mahābāhumāmantrya bharatarṣabha //

so'bhyayātkṛtavarmāṇaṃ dhṛtarāṣṭrasuto nṛpaḥ /
kṛtavarmā dadau tasya senāmakṣauhiṇīṃ tadā //

sa tena sarvasainyena bhīmena kurunandanaḥ /
vṛtaḥ pariyayau hṛṣṭaḥ suhṛdaḥ sampraharṣayan //

tataḥ pītāmbaradharo jagatsraṣṭā janārdanaḥ /
gate duryodhane kṛṣṇaḥ kirīṭinamathābravīt //

ayudhyamānaḥ kāṃ bṛddhimāsthāyāhaṃ vṛtastvayā /
arjuna uvāca /
bhavānsamarthastānsarvānnihantuṃ nātra saṃśayaḥ /
nihantumahamaṣyekaḥ samarthaḥ puruṣarṣabhaḥ //

bhavāṃstu kīrtimām̐lloke tadyaśastvāṃ gamiṣyati /
yaśasāṃ cāhamapyarthī tasmādasi mayā vṛtaḥ //

sārathyaṃ tu tvayā kāryamiti me mānasaṃ sadā /
cirarātrepsitaṃ kāmaṃ tadbhavānkartumarhati //
vāsudeva uvāca /

upapannamidaṃ pārtha yatspardhasi mayā saha /
sārathyaṃ te kariṣyāmi kāmaḥ sampadyatāṃ tava //
vaiśampāyana uvāca /

evaṃ pramuditaḥ pārthaḥ kuṣṇena sahitastadā /
vṛto dāśārhapravaraiḥ punarāyādyudhiṣṭhiram //