Mahabharata · Chapter 5.6

bhūtānāṃ prāṇinaḥ śreṣṭhāḥ prāṇināṃ buddhijīvinaḥ /
buddhimatsu narāḥ śreṣṭhā nareṣvapi dvijātayaḥ //

dvijeṣu vaidyāḥ śreyāṃso vaidyeṣu kṛtabuddhayaḥ /
kṛtabuddhiṣu kartāraḥ kartṛṣu brahmavādinaḥ //

sa bhavānkṛbuddhīnāṃ pradhāna iti me matiḥ . kulena ca viśiṣṭo'si vayasā ca śrutena ca /
prajñayā sadṛśaścāsi śukreṇāṅgirasena ca //

viditaṃ cāpi te sarvaṃ yathāvṛttaḥ sa kauravaḥ /
pāṇḍavaśca yathāvṛttaḥ kuntīputro yudhiṣṭhiraḥ //

dhṛtarāṣṭrasya vidite vañcitāḥ pāṇḍavāḥ paraiḥ /
vidureṇānunīto'pi putramevānuvartate //

śakunirbuddhipūrvaṃ hi kuntīputraṃ samāhvayat /
anakṣajñaṃ matākṣaḥ sankṣatravṛtte sthitaṃ śucim //

te tathā vañcayitvā tu dharmarājaṃ yudhiṣṭhiram /
na kasyāñcidavasthāyāṃ rājyaṃ dāsyanti vai svayam //

bhavāṃstu dharmasaṃyuktaṃ dhṛtarāṣṭraṃ bruvanvacaḥ /
manāṃsi tasya yodhānāṃ dhruvamāvartayiṣyati //

viduraścāpi tadvākyaṃ sādhayiṣyati tāvakam /
bhīṣmadroṇakṛpādīnāṃ bhedaṃ sañjanayiṣyati //

amātyeṣu ca bhinneṣu yodheṣu vimukheṣu ca /
punarekatra karaṇaṃ teṣāṃ karma bhaviṣyati //

etasminnantare pārthāḥ sukhamekāgrabuddhayaḥ /
senākarma kariṣyanti dravyāṇāṃ caiva sañcayam //

bhidyamāneṣu ca sveṣu lambamāne tathā tvayi /
na tathā te kariṣyanti senākarma na saṃśayaḥ //

etatprayojanaṃ cātra prādhānyenopalabhyate /
sangatyā dhṛtarāṣṭraśca kuryāddharmyaṃ vacastava //

sa bhavāndharmayuktaśca dharmyaṃ teṣu samācaran /
kṛpāluṣu parikleśānpāṇḍavīyānprakīrtayan //

vṛddheṣu kuladharmaṃ ca bruvanpūrvairanuṣṭhitam /
vibhetsyati manāṃsyeṣamiti me nātra saṃśayaḥ //

na ca tebhyo bhayaṃ te'sti brāhmaṇo hyasi vedavit /
dūtakarmaṇi yuktaśca sthaviraśca viśeṣataḥ //

sa bhavānpuṣyayogena muhūrtena jayena ca /
kauraveyānprayātvāśu kaunteyasyārthasiddhaye //
vaiśampāyana uvāca /

tathā'nuśiṣṭaḥ prayayau drupadena mahātmanā /
purodhā vṛttasampanno nagaraṃ nāgasāhvayam //

śiṣyaiḥ parivṛto vidvānnītiśāstrārthakovidaḥ /
pāṇḍavānāṃ hitārthāya kauravānpratijagmivān //