Mahabharata · Chapter 5.55

na bhetavyaṃ mahārāja na śocyā bhavatāṃ vayam /
samarthāḥ sma parāñjetuṃ balinaḥ samare vibho //

vane pravrājitānpārthānyadāyānmadhusūdanaḥ /
mahatā balacakreṇa pararāṣṭrāvamardinā //

kekayā dhṛṣṭaketuśca dhṛṣṭadyumnaśca pārṣata /
rājānaścānvayuḥ pārthānbahavo'nye'nuyāyinaḥ //

indraprasthasya cādūrātsamājagmurmahārathāḥ /
vyagarhayaṃśca sangamya bhavantaṃ kurubhiḥ saha //

te yudhiṣṭhiramāsīnamajinaiḥ prativāsitam /
kṛṣṇapradhānāḥ saṃhatya paryupāsanta bhārata //

pratyādanaṃ ca rājyasya kāryamūcurnarādhipāḥ /
bhavataḥ sānubandhasya samucchedaṃ cikīrṣavaḥ //

śrutvā caivaṃ mayostāstu bhīṣmadroṇakṛpāstadā /
jñātikṣayabhayādrājanbhītena bharatarṣabha //

tataḥ sthāsyanti samaye pāṇḍavā iti me matiḥ /
samucchedaṃ hi naḥ kṛtsnaṃ vāsudevaścikīrṣati //

ṛte ca vidurātsarve yūyaṃ vadhyā matā mama /
dhṛtarāṣṭrastu dharmajño na vadhyaḥ kurusattamaḥ //

samucchedaṃ ca kṛtsnaṃ naḥ kṛtvā tāta janārdanaḥ /
ekarājyaṃ kurūṇāṃ sma cikīrṣati yudhiṣṭhire //

tatra kiṃ prāptakālaṃ naḥ praṇipātaḥ palāyanam /
prāṇānvā samparityajya pratiyudhyāmāhe parān //

pratiyuddhe tu niyataḥ syādasmākaṃ parājayaḥ /
yudhiṣṭhirasya sarve hi pārthivā vaśavartinaḥ //

viraktarāṣṭrāśca vayaṃ mitrāṇi kupitāni naḥ /
dhikkṛtāḥ pārthivaiḥ sarvaiḥ svajanena ca sarvaśaḥ //

praṇipāte na doṣosti sandhirnaḥ śāśvatīḥ samāḥ /
pitaraṃ tveva śocāmi prajñānetraṃ janādhipam //

matkṛte duḥkhamāpannaṃ kleśaṃ prāptamanantakam / kṛtaṃ hi tava putraiśca pareṣāmavarodhanam /
matprayārthaṃ puraivaitadviditaṃ te narottama //

te rājño dhṛtarāṣṭrasya sāmātyasya mahārathāḥ /
vairaṃ pratikariṣyanti kulocchedena pāṇḍavāḥ //

tato droṇo'bravīdbhīṣmaḥ kṛpo drauṇiśca bhārata /
matvā māṃ mahatīṃ cintāmāsthitaṃvyathitendriyaṃ //

abhidrugdhāḥ pare cenno na bhetavyaṃ parantapa /
asamarthāḥ pare jetumasmānyudhi samāsthitān //

ekaikaśaḥ samarthāḥ smo vijetuṃ sarvapārthivān /
āgacchantu vineṣyāmo darpameṣāṃ śitaiḥ śaraiḥ //

puraikena hi bhīṣmeṇa vijitāḥ sarvapārthivāḥ /
mṛte pitaryatikruddho rathenaikena bhārata //

jaghāna subahūṃsteṣāṃ saṃrabdhaḥ kurusattamaḥ /
tataste śaraṇaṃ jagmurdevavratamimaṃ bhayāt //

sa bhīṣmaḥ susamartho'yamasmābhiḥ sahito raṇe /
parānvijetuṃ tasmātte vyetu bhīrbharatarṣabha //

ityeṣāṃ niścayo hyāsīttatkāle'mitatejasām /
purā teṣāṃ pṛthivī kṛtsnāsīdvaśavartinī //

asmānpunaramī nādya samarthā jetumāhave /
chinnapakṣāḥ pare hyadya vīryahīnāśca pāṇḍavāḥ //

asmatsaṃsthā ca pṛthivī vartate bharatarṣabha /
ekārthāḥ sukhaduḥkheṣu samānītāśca pārthivāḥ //

apyagniṃ praviśeyuste samudraṃ vā parantapa /
madarthaṃ pārthivāḥ sarve tadviddhi kurusattama //

unmattamiva cāpi tvāṃ prahasantīha duḥkhitam /
vilapantaṃ bahuvidhaṃ bhītaṃ paravikatthane //

eṣāṃ hyekaikaśo rājñāṃ samarthaṃ pāṇḍavānprati /
ātmānaṃ manyate sarvo vyetu te bhayamāgatam //

jetuṃ samagrāṃ senāṃ me vāsavo'pi na śaknuyāt /
hantumakṣayyarūpeyaṃ brahmaṇo'pi svayambhuvaḥ //

yudhiṣṭhiraḥ puraṃ hitvā pañcagrāmānsa yācate /
bhīto hi māmakātsainyātprabhāvāccaiva me vibho //

samarthaṃ manyase yacca kuntīputraṃ vṛkodaram /
tanmithyā na hi me kṛtsnaṃ prabhāvaṃ vetsi bhārata //

matsamo hi gadāyuddhe pṛthivyāṃ nāsti kaścana /
nāsītkaścidatikrānto bhavitā na ca kaścana //

yukto duḥkhoṣitaścāhaṃ vidyāpāragatastathā /
tasmānna bhīmānnānyebhyo bhayaṃ me vidyate kvacit //

duryodhanasamo nāsti gadāyāmiti niścayaḥ / saṅkarṣaṇasya bhavane yattadainamupāvasam /

yuddhe saṅkarṣaṇasamo balenābhyadhiko bhuvi /
gadāprahāraṃ bhīmo me na jātu viṣahedyudhi //

ekaṃ prahāraṃ yaṃ dadyāṃ bhīmāya ruṣito nṛpa /
sa evainaṃ nayoddhoraḥ kṣipraṃ vaivasvatakṣayam //

iccheyaṃ ca gadāhastaṃ rājandraṣṭuṃ vṛkodaram /
suciraṃ prārthito hyeṣa mama nityaṃ manorathaḥ //

gadayā nihato hyājau mayā pārtho vṛkodaraḥ /
viśīrṇagāvaḥ pṛthivīṃ parāsuḥ prapatiṣyati //

gadāprahārābhihato himavānapi parvataḥ /
sakṛnmayā vidīryeta giriḥ śatasahasradhā //

sa cāpyetadvijānāti vāsudevārjunau tathā /
duryodhanasamo nāsti gadāyāmiti niścayaḥ //

tatte vṛkodaramayaṃ bhayaṃ vyetu mahāhave /
vyapaneṣyāmyahaṃ hyenaṃ mā rājanvimanā bhava //

tasminmayā hate kṣipramarjunaṃ bahavo rathāḥ /
tulyarūpā viśiṣṭāśca kṣepsyanti bharatarṣabha //

bhīṣmo droṇaḥ kṛpo drauṇiḥ karṇo bhūriśravāstathā /
prāgjyotiṣādhipaḥ śalyaḥ sindhurājo jayadrathaḥ //

ekaika eṣāṃ śaktastu hantuṃ bhārata pāṇḍavān /
sametāstu kṣaṇenaitānneṣyanti yamasādanam //

samagrā pārthivī senā pārthamekaṃ dhanañjayam /
kasmādaśaktā nirjetumiti heturna vidyate //

śaravrātaistu bhīṣmeṇa śataśo nicito'vaśaḥ /
droṇadrauṇikṛpaiścaiva gantā pārtho yamakṣayam //

pitāmaho'pi gāṅgeyaḥ śāntanoradhi bhārata /
brahmarpisadṛśo jajñe devairapi suduḥsahaḥ //

na hantā vidyate cāpi rājanbhīṣmasya kaścana /
pitrā hyuktaḥ prasannena nākāmastvaṃ mariṣyasi //

brahmarṣeśca bharadvājāddroṇo droṇyāmajāyata /
droṇājjajñe mahārāja drauṇiśca paramāśtravit //

kṛpaścācāryamukhyoyaṃ maharṣergautamādapi /
śarastambodbhavaḥ śrīmānavadhya iti me matiḥ //

ayonijāstrayo hyete pitā mātā ca mātulaḥ /
aśvatthāmno mahārāta sa ca śūraḥ sthito mama //

sarva ete mahārāja devakalpā mahārathāḥ /
śakrasyāpi vyathāṃ kuryuḥ saṃyuge bharatarṣabha //

naiteṣāmarjunaḥ śakta ekaikaṃ prativīkṣitum /
sahitāstu naravyāghrā haniṣyanti dhanañjayam //

bhīṣmādroṇakṛpāṇāṃ ca tulyaḥ karṇo mato mama /
anujñātaśca rāmeṇa matsamo'sīti bhārata //

kuṇḍale rucire cāstāṃ karṇasya sahaje śubhe /
te śacyarthaṃ mahendreṇa yācitaḥ sa parantapaḥ //

amoghayā mahārāja śaktyā paramabhīmayā /
tasya śaktyopagūḍhasya kasmājjīveddhanañjayaḥ //

vijayo me dhruvaṃ rājanphalaṃ pāṇāvivāhitam / abhivyaktaḥ pareṣāṃ ca kṛtsno bhuvi parājayaḥ /

ahnā hyekena bhīṣmoyaṃ prayutaṃ hanti bhārata /
tatsamāśca maheṣvāsā droṇadrauṇikṛpā api //

saṃśaptakānāṃ vṛndāni kṣatriyāṇāṃ parantapa /
arjunaṃ vayamasmānvā nihanyātkapiketanaḥ //

tāṃścālamiti manyante savyasācivadhe dhṛtāḥ /
pārthivāḥ sa bhavāṃstebhyo hyakasmādvyathate katham //

bhīmasene ca nihate ko'nyo yudhyeta bhārata /
pareṣāṃ tanmamācakṣva yadi vettha parantapa //

pañca te bhrātaraḥ sarve dhṛṣṭadyumno'tha sātyakiḥ /
pareṣāṃ sapta ye rājanyodhāḥ sāraṃ balaṃ matam //

asmākaṃ tu viśiṣṭā ye bhīṣmadroṇakṛpādayaḥ /
drauṇirvikartanaḥ karṇaḥ somadattotha bāhlikaḥ //

prāgjyotiṣādhipaḥ śalya āvantyau ca jayadrathaḥ /
duḥśāsano durmakhaśca duḥsahaśca viśāmpate //

śrutāyuścitrasenaśca purumitro viviṃśatiḥ /
śalo bhūriśravāścaiva vikarṇaśca tavātmajaḥ //

akṣauhiṇyo hi me rājandaśaikā ca samāhṛtāḥ /
nyūnā pareṣāṃ saptaiva kasmānme syātparājayaḥ //

balaṃ triguṇato hīnaṃ yodhyaṃ prāha bṛhaspatiḥ /
parebhyastriguṇā ceyaṃ mama rājannanīkinī //

guṇahīnaṃ pareṣāṃ ca bahu paśyāmi bhārata /
guṇodayaṃ bahuguṇamātmanaśca viśāmpate //

etatsarvaṃ samājñāya balāgryaṃ mama bhārata /
nyūnatāṃ pāṇḍavānāṃ ca na mohaṃ gantumarhasi //

ityuktvā sañjayaṃ bhūyaḥ paryapṛcchata bhārata /
vivitsuḥ prāptakālāni jñātvā parapurañjayaḥ //