Mahabharata · Chapter 5.54

evametanmahārāja yathāvadasi bhārata /
yuddhe vināśaḥ kṣatrasya gāṇḍīvena pradṛśyate //

idaṃ tu nābhijānāmi tava dhīrasya nityaśaḥ /
yatputravaśamāgacchestattvajñaḥ savyasācinaḥ //

naiṣa kālo mahārāja tava śaśvatkṛtāgasaḥ /
tvayā hyevāditaḥ pārthā nikṛtā bharatarṣabha //

pitā śreṣṭhaḥ suhṛdyaśca samyakpraṇihitātmavān /
āstheyaṃ hi hitaṃ tena na drogdhā gururucyate //

idaṃ jitamidaṃ labdhamiti śrutvā parājitān /
dyūtakāle mahārāja smarase sma kumāravat //

paruṣāṇyucyamānāṃśca purā pārthānupekṣase /
kṛtsnaṃ rājyaṃ jayantīti prapātaṃ nānupaśyasi //

pitryaṃ rājyaṃ mahārāja kuravaste sajāṅgalāḥ /
atha vīrairjitāmurvīmakhilāṃ pratyapadyathāḥ //

bāhuvīryārjitā bhūmistava pārthairniveditā /
mayedaṃ kṛtamityeva manyase rājasattama //

grastāngandharvarājena majjato hyaplave'mbhasi /
ānināya punaḥ pārthaḥ putrāṃste rājasattama //

kumāravacca smayase dyūte vinikṛteṣu yat /
pāṇḍaveṣu vane rājanpravrajatsu punaḥpunaḥ //

pravarṣataḥ śaravrātānarjunasya śitānbahūn /
apyarṇavā viśuṣyeyuḥ kiṃ punarmāsayonayaḥ //

asyatāṃ phālgunaḥ śreṣṭho gāṇḍīvaṃ dhanuṣāṃ varam / keśavaḥ sarvabhūtānāmāyudhānāṃ sudarśanam /
vānaro rocamānaśca ketuḥ ketumatāṃ varaḥ //

evametāni sa ratho vahate saha yo raṇe /
kṣapayiṣyati no rājankālacakramivodyatam //

tasyādya vasudhā rājannikhilā bharatarṣabha /
yasya bhīmārjinau yodhau sa rājā rājasattama //

tathā bhīmahataprāyāṃ mañjantīṃ tava vāhinīm /
duryodhanamukhā dṛṣṭvā kṣayaṃ yāsyanti kauravāḥ //

na bhīmārjunayorbhītā lapsyante vijayaṃ vibho /
tava putrā mahārāja rājānaścānusāriṇaḥ //

matsyāstvāmadya nārcanti pañcālāśca sakekayāḥ /
sālveyāḥ śūrasenāśca sarve tvāmavajānate //

pārthaṃ hyete gatāḥ sarve vīryajñāstasya dhīmataḥ /
bhaktyā hyasya virudhyante tava putraiḥ sadaiva te //

anarhāneva tu vadhe dharmayuktānvikarmaṇā /
yo'kleśayatpāṇḍuputrānyo vidveṣṭyadhunāpi vai //

sarvopāyairniyantavyaḥ sānugaḥ pāpapuruṣaḥ /
tava putro mahārāja nānuśocitumarhasi //

aparohaṃ mahārāja sākṣāccainaṃ bravīmyaham /
dyūtakāle mayā coktaṃ vidureṇa ca dhīmatā //

yadidaṃ te vilapitaṃ pāṇḍavānprati bhārata /
anīśenaiva rājendra sarvametannirarthakam //