Mahabharata · Chapter 5.53

yathaiva pāṇḍavāḥ sarve parākrāntā jigīṣavaḥ /
tathaubhisarāsteṣāṃ tyaktātmāno jaye dhṛtāḥ //

// hi parākrāntānācakṣīthāḥ parānmama /
pāñcālānkekayānmatsyānmāgadhānvatsabhūmipān //

yaśca sendrānimām̐llokānicchankuryādvaśe balī /
sa sraṣṭā jagataḥ kṛṣṇaḥ pāṇḍavānāṃ jaye dhṛtaḥ //

samastāmarjunādvidyāṃ sātyakiḥ kṣipramāptavān /
śaineyaḥ samare sthātā bījavatpravapañśarān //

dhṛṣṭadyumnaśca pāñcālyaḥ krūrakarmā mahārathaḥ /
māmakeṣu raṇaṃ kartā baleṣu paramāstravit //

yudhiṣṭhirasya ca krodhādarjunasya ca vikramāt /
mayābhyāṃ bhīmasenācca bhayaṃ me tāta jāyate //

amānuṣaṃ manuṣyendrairjālaṃ vitatamantarā /
na me sainyāstariṣyanti tataḥ krośāmi sañjaya //

darśanīyo manasvī ca lakṣmīvānbrahmavarcasī /
medhāvī sukṛtaprajño dharmātmā pāṇḍunandanaḥ //

mitrāmātyaiḥ susampannaḥ sampanno yuddhayojakaiḥ /
bhrātṛbhiḥ śvaśurairvīrairupapanno mahārathaiḥ //

dhṛtyā ca puruṣavyāghro naibhṛtyena ca pāṇḍavaḥ /
anuśaṃso vadānyaśca hīmānsatyaparākramaḥ //

bahuśrutaḥ kṛtātmā ca vṛddhasevī jitendriyaḥ /
taṃ sarvaguṇasampannaṃ samiddhamiva pāvakam //

tapantamabhi ko mandaḥ patiṣyati pataṅgavat /
pāṇḍavāgnimanāvāryaṃ mumūrṣurnaṣṭacetanaḥ //

tanuruccaḥ śikhī rājā mithyopacarito mayā /
mandānāṃ mama putrāṇāṃ yuddhenāntaṃ kariṣyati //

tairayuddhaṃ sādhu manye kuravastannibodhata /
yuddhe vināśaḥ kṛtsnasya kulasya bhavitā dhruvam //

eṣā me paramā buddhiryayā śāmyati me manaḥ /
yadi tvayuddhamiṣṭaṃ vo vayaṃ śāntyai yatāmahe //

na tu naḥ kliśyamānānāmupekṣeta yudhiṣṭhiraḥ /
jugupsati hyadharmeṇa māmevoddiśya kāraṇam //