Mahabharata · Chapter 5.5

drupadenaivamukte tu vākye vākyavidāṃ varaḥ /
vasudevasutastatra pṛṣṇisiṃho'bravīdidam //

upapannamidaṃ vākyaṃ somakānāṃ dhurandhare /
arthasiddhikaraṃ rājñaḥ pāṇḍavasyāmitaujasaḥ //

etacca pūrvaṃ kāryaṃ naḥ sunītimabhikāṅkṣatām /
anyathā hyācarankarma puruṣaḥ syātsubāliśaḥ //

kiṃ tu sambandhakaṃ tulyamasmākaṃ kurupāṇḍuṣu /
yatheṣṭaṃ vartamāneṣu pāṇḍaveṣu ca teṣu ca //

te vivāhārthamānītā vayaṃ sarve tathā bhavān /
kṛte vivāhe muditā gamiṣyāmo gṛhānprati //

bhavānvṛddhatamo rājñāṃ vayasā ca śrutena ca /
śiṣyavatte vayaṃ sarve bhavāmeha na saṃśayaḥ //

bhavantaṃ dhṛtarāṣṭraśca satataṃ bahu manyate /
ācāryayoḥ sakhā cāsi droṇasya ca kṛpasva ca //

sa bhavānpreṣayatvadya pāṇḍavārthakaraṃ vacaḥ /
sarveṣāṃ niścitaṃ tannaḥ preṣayiṣyati yadbhavān //

yadi tāvacchamaṃ kuryannyāyena kurupuṅgavaḥ /
na bhavetkurupāṇḍūnāṃ saubhrātreṇa mahānkṣayaḥ //

atha darpānvito mohānna kuryāddhṛtarāṣṭrajaḥ /
anyeṣāṃ preṣayitvā ca paścādasmānsabhāhvaye //

tato duryodhano mandaḥ sahāmātyaḥ sabāndhavaḥ /
niṣṭhāmāpatsyate mūḍhaḥ kruddhe gāṇḍīvadhanvani //
vaiśampāyana uvāca /

tataḥ satkṛtya vārṣṇeyaṃ virāṭaḥ pṛthivīpatiḥ /
gṛhānprasthāpayāmāsa sagaṇaṃ sahabāndhavam //

dvārakaṃ tu gate kṛṣṇe yudhiṣṭhirapurogamāḥ /
cakruḥ sāṅghrāmikaṃ sarvaṃ virāṭaśca mahīpatiḥ //

tataḥ sampreṣayāmāsa virāṭaḥ saha bāndhavaiḥ /
sarveṣāṃ bhūmipālānāṃ drupadaśca mahīpatiḥ //

vacanātkurusiṃhānāṃ matsyapāñcālayośca te /
samājagmurmahīpālāḥ samprahṛṣṭā mahābalāḥ //

tacchrutvā pāṇḍuputrāṇāṃ samāgacchanmahadbalam /
dhṛtarāṣṭrasutāścāpi samāninyurmahīpatīn //

samākulā mahī rājankurupāṇḍavakāraṇāt /
tadā samabhavatkṛtsnā samprayāṇe mahīkṣitām //

sankulā ca tadā bhūmiścaturaṅgavalānvitā /
balāni teṣāṃ vīrāṇāmāgacchanti tatastataḥ //

cālayantīva gāṃ devīṃ saparvatavanāmimām / tataḥ prajñāvayovṛddhaṃ pāñcālyaḥ svapurohitam /
kurubhyaḥ preṣayāmāsa yudhiṣṭhiramate sthitaḥ //