મહાભારત · અધ્યાય 5.5

દ્રુપદેનૈવમુક્તે તુ વાક્યે વાક્યવિદાં વરઃ ।
વસુદેવસુતસ્તત્ર પૃષ્ણિસિંહોઽબ્રવીદિદમ્ ॥

ઉપપન્નમિદં વાક્યં સોમકાનાં ધુરન્ધરે ।
અર્થસિદ્ધિકરં રાજ્ઞઃ પાણ્ડવસ્યામિતૌજસઃ ॥

એતચ્ચ પૂર્વં કાર્યં નઃ સુનીતિમભિકાઙ્ક્ષતામ્ ।
અન્યથા હ્યાચરન્કર્મ પુરુષઃ સ્યાત્સુબાલિશઃ ॥

કિં તુ સમ્બન્ધકં તુલ્યમસ્માકં કુરુપાણ્ડુષુ ।
યથેષ્ટં વર્તમાનેષુ પાણ્ડવેષુ ચ તેષુ ચ ॥

તે વિવાહાર્થમાનીતા વયં સર્વે તથા ભવાન્ ।
કૃતે વિવાહે મુદિતા ગમિષ્યામો ગૃહાન્પ્રતિ ॥

ભવાન્વૃદ્ધતમો રાજ્ઞાં વયસા ચ શ્રુતેન ચ ।
શિષ્યવત્તે વયં સર્વે ભવામેહ ન સંશયઃ ॥

ભવન્તં ધૃતરાષ્ટ્રશ્ચ સતતં બહુ મન્યતે ।
આચાર્યયોઃ સખા ચાસિ દ્રોણસ્ય ચ કૃપસ્વ ચ ॥

સ ભવાન્પ્રેષયત્વદ્ય પાણ્ડવાર્થકરં વચઃ ।
સર્વેષાં નિશ્ચિતં તન્નઃ પ્રેષયિષ્યતિ યદ્ભવાન્ ॥

યદિ તાવચ્છમં કુર્યન્ન્યાયેન કુરુપુઙ્ગવઃ ।
ન ભવેત્કુરુપાણ્ડૂનાં સૌભ્રાત્રેણ મહાન્ક્ષયઃ ॥

અથ દર્પાન્વિતો મોહાન્ન કુર્યાદ્ધૃતરાષ્ટ્રજઃ ।
અન્યેષાં પ્રેષયિત્વા ચ પશ્ચાદસ્માન્સભાહ્વયે ॥

તતો દુર્યોધનો મન્દઃ સહામાત્યઃ સબાન્ધવઃ ।
નિષ્ઠામાપત્સ્યતે મૂઢઃ ક્રુદ્ધે ગાણ્ડીવધન્વનિ ॥
વૈશમ્પાયન ઉવાચ ।

તતઃ સત્કૃત્ય વાર્ષ્ણેયં વિરાટઃ પૃથિવીપતિઃ ।
ગૃહાન્પ્રસ્થાપયામાસ સગણં સહબાન્ધવમ્ ॥

દ્વારકં તુ ગતે કૃષ્ણે યુધિષ્ઠિરપુરોગમાઃ ।
ચક્રુઃ સાઙ્ઘ્રામિકં સર્વં વિરાટશ્ચ મહીપતિઃ ॥

તતઃ સમ્પ્રેષયામાસ વિરાટઃ સહ બાન્ધવૈઃ ।
સર્વેષાં ભૂમિપાલાનાં દ્રુપદશ્ચ મહીપતિઃ ॥

વચનાત્કુરુસિંહાનાં મત્સ્યપાઞ્ચાલયોશ્ચ તે ।
સમાજગ્મુર્મહીપાલાઃ સમ્પ્રહૃષ્ટા મહાબલાઃ ॥

તચ્છ્રુત્વા પાણ્ડુપુત્રાણાં સમાગચ્છન્મહદ્બલમ્ ।
ધૃતરાષ્ટ્રસુતાશ્ચાપિ સમાનિન્યુર્મહીપતીન્ ॥

સમાકુલા મહી રાજન્કુરુપાણ્ડવકારણાત્ ।
તદા સમભવત્કૃત્સ્ના સમ્પ્રયાણે મહીક્ષિતામ્ ॥

સન્કુલા ચ તદા ભૂમિશ્ચતુરઙ્ગવલાન્વિતા ।
બલાનિ તેષાં વીરાણામાગચ્છન્તિ તતસ્તતઃ ॥

ચાલયન્તીવ ગાં દેવીં સપર્વતવનામિમામ્ । તતઃ પ્રજ્ઞાવયોવૃદ્ધં પાઞ્ચાલ્યઃ સ્વપુરોહિતમ્ ।
કુરુભ્યઃ પ્રેષયામાસ યુધિષ્ઠિરમતે સ્થિતઃ ॥