Mahabharata · Chapter 5.4

evametanmahābāho bhaviṣyati na saṃśayaḥ /
na hi duryodhano rājyaṃ madhureṇa pradāsyati //

anuvartsyati taṃ cāpi dhṛtarāṣṭraḥ sutapriyaḥ /
bhīṣmadroṇau ca kārpaṇyānmaurkhyādrādheyasaubalau //

baladevasya vākyaṃ tu mama jñāne na yujyate /
etaddhi puruṣeṇāgre kāryaṃ sunayamicchatā //

na tu vācyo mṛduvaco dhārtarāṣṭraḥ kathañcana /
nahi mārdavasādhyo'sau pāpabuddhirmato mama //

gardabhe mārdavaṃ kuryādgoṣu tīkṣṇaṃ samācaret /
mṛdu duryodhane vākyaṃ yo brūyātpāpacetasi //

mṛduṃ vai manyate pāpo bhāṣamāṇamaśaktikam /
hitamarthaṃ na jānīyādabuddhirmārdave sati //

etaccaiva kariṣyāmo yatnaśca kriyatāmiha /
prasthāpayāma mitrebhyo balānyudyojayantu naḥ //

śalyasya dhṛṣṭaketośca jayatsenasya vā vibho /
kekayānāṃ ca sarveṣāṃ dūtā gacchantu śīghragāḥ //

sa ca duryodhano nūnaṃ preṣayiṣyati sarvaśaḥ /
pūrvābhipannāḥ santaśca bhajante pūrvacodanam //

tatvaradhvaṃ narendrāṇāṃ pūrvameva pracodane /
mahaddhi kāryaṃ voḍhavyamiti me vartate matiḥ //

śalyasya preṣyatāṃ śīghraṃ ye ca tasyānugā nṛpāḥ /
bhagadattāya rājñe ca pūrvasāgaravāsine //

amitaujase tathogrāya hārdikyāyāndhakāya ca /
dīrghaprajñāya śūrāya rocamānāya vā vibho //

ānīyatāṃ bṛhantaśca senābinduśca pārthivaḥ /
senajitpratibindhyaśca citravarmā suvāstukaḥ //

bāhlīko muñjakeśaśca caidyādhipatireva ca /
supārśvaśca subāhuśca pauravaśca mahārathaḥ //

śakānāṃ pahlavānāṃ karṇaveṣṭaśca pārthivaḥ //
surāriśca nadījaśca karṇaveṣṭaśca pārthivaḥ //

nīlaśca vīradharmā ca bhūmipālaśca vīryavān /
durjayo dantavakraśca rukmī ca janamejayaḥ //

āṣāḍho vāyuvegaśca pūrvapālī ca pārthivaḥ /
bhūritejā devakaśca ekalavyaḥ sahātmajaiḥ //

kārūṣakāśca rājānaḥ kṣemadhūrtiśca vīryavān /
kāmbhojā ṛṣikā ye ca paścimānūpakāśca ye //

jayatsenaśca kāśyaśca tathā pañcanadā nṛpāḥ //
jānakiśca durdharṣaḥ pārvatīyāśca ye nṛpāḥ //

jānakiśca suśarmā ca maṇimānyotimatsakaḥ /
pāṃśurāṣṭrādhipaścaiva dhṛṣṭaketuśca vīryavān //

tuṇḍaśca daṇḍadhāraśca bṛhatsenaśca vīryavān /
aparājito niṣādaśca śreṇimānvasumānapi //

bṛhadbalo mahaujāśca bāhuḥ parapurañjayaḥ /
samudraseno rājā ca saha putreṇa vīryavān //

udbhavaḥ kṣemakaścaiva vāṭadhānaśca pārthivaḥ /
śrutāyuśca dṛḍhāyuśca sālvaputraśca vīryavān //

kumāraśca kaliṅgānāmīśvaro yuddhadurmadaḥ /
eteṣāṃ preṣyatāṃ śīghrametaddhi mama rocate //

ayaṃ ca brāhmaṇo vidvānmama rājanpurohitaḥ /
preṣyatāṃ dhṛtarāṣṭrāya vākyamasmai pradīyatām //

yathā duryodhano vācyo yathā sāntanavo nṛpaḥ /
dhṛtarāṣṭro yathā vācyo droṇaśca rathināṃ varaḥ //