Mahabharata · Chapter 5.3

yādṛśaḥ puruṣasyātmā tādṛśaṃ samprabhāṣate /
yathārūpo'ntarātmā te tathārūpaṃ prabhāṣate //

santi vai puruṣāḥ śūrāḥ santi kāpuruṣāstathā /
ubhāvetau dṛḍhau pakṣau dṛśyete puruṣānprati //

ekasminneva jāyete kule klībamahābalau /
phalāphalavatī śākhe yathaikasminvanaspatau //

nābhyasūyāmi te vākyaṃ bruvato lāṅgaladhvaja /
ye tu śṛṇvanti te vākyaṃ tānasūyāmi mādhava //

kathaṃ hi dharmarājasya doṣamalpamapi bruvan /
labhate pariṣanmadhye vyāhartumakutobhayaḥ //

samāhūya mahātmānaṃ jitavanto'kṣakovidāḥ / anakṣajñaṃ yathā'śraddhaṃ teṣu dharmajayaḥ kutaḥ /

yadi kuntīsutaṃ gehe krīḍantaṃ bhrātṛbhiḥ saha /
abhigamya jayeyuste tatteṣāṃ dharmato bhavet //

samāhūya tu rājānaṃ kṣatradharmarataṃ sadā /
nikṛtyā jitavantaste kiṃ nu teṣāṃ paraṃ śubham //

kathaṃ praṇipateccāyamiha kṛtvā paṇaṃ param /
vanavāsādvimuktaratu prāptaḥ paitāmahaṃ padam //

yadyayaṃ paravittāni kāmayeta yudhiṣṭhiraḥ /
evamapyayamatyantaṃ parānnārhati yācitum //

kathaṃ ca dharmayuktāste na ca rājyaṃ jihīrṣavaḥ /
nivṛttavanavāsāṃstānya āhurviditā iti //

anunītā hi bhīṣmeṇa droṇena vidureṇa ca /
na vyavasyanti pāṇḍūnāṃ pradātuṃ paitṛkaṃ vasu //

ahaṃ tu tāñchitairbāṇairanunīya raṇe balāt /
pādayoḥ pātayiṣyāmi kaunteyasya mahātmanaḥ //

atha te na vyavasyanti praṇipātāya dhīmataḥ /
gamiṣyanti sahāmātyā yamasya sadanaṃ prati //

na hi te yuyudhānasya saṃrabdhasya yuyutsataḥ /
vegaṃ samarthāḥ saṃsoddhuṃ vajrasyeva mahīdharāḥ //

ko hi gāṇḍīvadhanvānaṃ kaśca cakrāyudhaṃ yudhi /
māṃ cāpi viṣahetkruddhaṃ kaśca bhīmaṃ durāsadam //

yamau ca dṛḍhadhanvānau yamakalpau mahādyutī /
virāṭadrupadau vīrau yamakālopamadyutī //

ko jijīviṣurāsādeddhṛṣṭadyumnaṃ ca pārṣatam /
pañcaitānpāṇḍaveyāṃstu draupadyāḥ kīrtivardhanān //

samapramāṇānpāṇḍūnāṃ samavīryānmadotkaṭān /
saubhadraṃ ca maheṣvāsamamarairapi duḥsaham //

gadapradyumnasāmbāṃśca kālasūryānalopamān /
te vayaṃ dhṛtarāṣṭrasya putraṃ śakuninā saha //

karṇaṃ caiva nihatyājāvabhiṣekṣyāma pāṇḍavam /
nādharmo vidyate kaścicchatrūnhatvā'tatāyinaḥ //

adharmyamayaśasyaṃ ca śātravāṇāṃ prayācanam /
hṛdbhatastasya yaḥ kāmastaṃ kurudhvamatandritāḥ //

dhārtarāṣṭro hyayuddhena na rājyaṃ dātumicchati / adya pāṇḍusuto rājyaṃ labhatāṃ vā yudhiṣṭhiraḥ /
nihatā vā raṇe sarve svapsyanti vasudhātale //