Mahabharata · Chapter 5.189

cakāra yatnaṃ drupadaḥ sutāyāḥ sarvakarmasu /
tato lekhyādiṣu tathā śilpeṣu ca parantapa //

iṣvastre caiva rājendra droṇaśiṣyo babhūva ha /
tasya mātā mahārāja rājānaṃ varavarṇinī //

codayāmāsa bhāryārthaṃ kanyāyāḥ putravattadā . tatastāṃ pārṣato dṛṣṭvā kanyāṃ samprāptayauvanām /
striyaṃ matvā tataścintāṃ prapede saha bhāryayā //
drupada uvāca /

kanyā mameyaṃ samprāptā yauvanaṃ śokavardhinī /
mayā pracchāditā ceyaṃ vacanācchūlapāṇinaḥ //
bhāryovāca /

na tanmithyā mahārāja bhaviṣyati kathañcana /
trailokyakartā kasmāddhi vṛthā vaktumihārhati //

yadi te rocate rājanvakṣyāmi śrṛṇu me vacaḥ /
śrutvedānīṃ prapadyethāḥ svāṃ matiṃ pṛṣatātmaja //

kriyatāmasya yatnena vidhivaddārasangrahaḥ /
bhavitā tadvacaḥ satyamiti me niścitā matiḥ //

tatastau niścayaṃ kṛtvā tasminkārye'tha dampatī /
varayāñcakratuḥ kanyāṃ daśārṇādhipateḥ sutām //

tato rājā drupado rājasiṃhaḥ sarvānrājñaḥ kulataḥ sanniśāmya /
dāśārṇakasya nṛpatestanūjāṃ śikhaṇḍine varayāmāsa dārān //

hiraṇyavarmeti nṛpo yo'sau dāśārṇakaḥ smṛtaḥ /
sa ca prādānmahīpālaḥ kanyāṃ tasmai śikhaṇḍine //

sa ca rājā daśārṇeṣu mahānāsītsudurjayaḥ /
hiraṇyavarmā durdharṣo mahāseno mahāmanāḥ //

kṛte vivāhe tu tadā sā kanyā rājasattama /
yauvanaṃ samanuprāptā sā ca kanyā śikhaṇḍinī //

kṛtadāraḥ śikhaṇḍī ca kāmpilyaṃ punarāgamat / na ca sā veda tāṃ kanyāṃ kañcitkālaṃ striyaṃ kila /
yadā tvenāmajānātsā striyameva nṛpātmajā //

dhātrīṇāṃ ca sakhīnāṃ ca vrīḍayānā nyavedayat /
kanyāṃ pāñcālarājasya sutāṃ tāṃ vai śikhaṇḍinīm //

tatastā rājaśārdūla dhātryo dāśārṇikāstadā /
jagmurārti parāṃ preṣyāḥ preṣayāmāsureva ca //

tato daśārṇādhipateḥ preṣyāḥ sarvā nyavedayan /
vipralambhaṃ yathāvṛttaṃ sa ca cukrodha pārthivaḥ //

śikhaṇḍyapi mahārāja puṃvadrājakule tadā /
vijahāra mrudā yuktaḥ strītvaṃ naivātirocayan //

tataḥ katipayāhasya tacchrutvā bharatarṣabha /
hiraṇyavarmā rājendra roṣādartiṃ jagāma ha //

tato dāśārṇako rājā tīvrakopasamanvitaḥ /
dūtaṃ prasthāpayāmāsa drupadasya niveśanam //

tato drupadamāsādya dūtaḥ kāñcanavarmaṇaḥ /
eka ekāntasutsārya raho vacanamabravīt //

dāśārṇarājo rājaṃstvāmidaṃ vacanamabravīt /
abhiṣgātprakupito vipralabdhastvayā'nagha //

avamanyase māṃ nṛpate nūnaṃ durmantritaṃ tava /
yanme kanyāṃ svakanyārthe mohādyācitavānasi //

tasyādya vipralambhasya phalaṃ prāpnuhi durmate /
eṣa tvaṃ sajanāmātyamuddharāmi sthiro bhava //

avamatya ca vīryaṃ me kulaṃ cāritrameva ca /
vipralambhastvayāpūrvo manuṣyeṣu pravartitaḥ //

kuru sarvāṇi kāryāṇi bhuṅkṣva kabhogānanuttamān /
abhiyāsyāmi śīghraṃ tvāṃ samuddhartuṃ sabāndhavam //