Mahabharata · Chapter 5.190

evamuktasya dūtena drupadasya tadā nṛpa /
corasyeva gṛhītasya na prāvartata bhāratī //

sa yatnamakarottīvraṃ sambandhinyunumānane /
dūtairmadhurasambhāṣairna tadastīti sandiśan //

sa rājā bhūya evātha jñātvā tattvamathāgamat /
kanyeti pāñcālasutāṃ tvaramāṇo viniryayau //

tataḥ sampreṣakayāmāsa mitrāṇṇāmamitaujasām /
duhiturvipralambhaṃ taṃ dhātrīṇāṃ vacanāttadā //

tataḥ samudayaṃ kṛtvā balānāṃ rājasattamaḥ /
abhiyāne matiṃ cakre drupadaṃ prati bhārata //

tataḥ sammantrayāmāsa mantribhiḥ sa mahīpatiḥ /
hiraṇyavarmā rājendra pāñcālyaṃ pārthivaṃ prati //

tatra vai niścitaṃ teṣāmabhūdrājñāṃ mahātmanām /
tathyaṃ bhavati cedetatkanyā rājañśikhaṇḍinī //

baddhvā pāñcālarājānamānayiṣyāmahe gṛham /
anyaṃ rājānamādhāya pāñcāleṣu nareśvaram //

ghātayiṣyāma nṛpatiṃ pāñcālaṃ saśikhaṇḍinam //

sa tadā drutamājñāya punardūtānnarādhipaḥ /
prāsthāpayatpārṣatayā nihanmīti sthiro bhava //
bhīṣma uvāca /

sa hi prakṛtyā vai bhītaḥ kilbiṣī ca narādhipaḥ /
bhayaṃ tīvramanuprāpto drupadaḥ pṛthivīpatiḥ //

visṛjya dūtāndāśārṇe drupadaḥ śokamūrcchitaḥ /
sametya bhāryāṃ rahite vākyamāha narādhipaḥ //

bhayena mahatā'viṣṭo hṛdi śokena cāhataḥ /
pāñcālarājo dayitāṃ mātaraṃ vai śikhaṇḍinaḥ //

abhiyāsyati māṃ kopātsambandhī sumahābalaḥ /
hiraṇyavarmā nṛpatiḥ karṣamāṇo varūthinīm //

kimidānīṃ kariṣyāvo mūḍhau kanyāmimāṃ prati /
śikhaṇḍī kila putraste kanyeti pariśaṅkitaḥ //

iti sañcintya yatnena samitraḥ sabalānugaḥ /
vañcito'smīti manvāno māṃ kiloddhartumicchati //

kimatra tathyaṃ suśroṇi mithyā kiṃ brūhi śobhane /
śrutvā tvattaḥ śubhaṃ vākyaṃ saṃvidhāsyāmyahaṃ tathā //

ahaṃ hi saṃśayaprāpto bālā ceyaṃ śikhaṇḍinī /
tvaṃ ca rājñi mahatkṛcchraṃ samprāptā varavarṇini //

sā tvaṃ sarvavimokṣāya tattvamākhyāhi pṛcchataḥ /
tathā vidadhyāṃ suśroṇi kṛtyamāśu śucismite //

śikhaṇḍini ca mā bhaistvaṃ vidhāsye tatra tattvataḥ /
kṛpayāhaṃ varārohe vañcitaḥ putradharmataḥ //

mayā dāśārṇako rājā vañcitaḥ sa mahīpatiḥ /
tadācakṣva mahābhāge vidhāsye tatra yaddhitam //

janātā ha narendreṇa khyāpanārthaṃ parasya vai /
prakāśaṃ coditā devī pratyuvāca mahīpatim //