Mahabharata · Chapter 5.188

kathaṃ śikhaṇḍī gāṅgeya kanyāṃ bhūtvā purā tadā /
puruṣo'bhūdyudhiśreṣṭha tanme brūhi pitāmaha //
bhīṣma uvāca /

bhāryā tu tasya rājendra drupadasya mahīpateḥ /
mahiṣī dayitā hyāsīdaputrā ca viśāmpate //

etasminneva kāle tu drupado vai mahīpatiḥ /
apatyārthe mahārāja toṣayāmāsa śaṅkaram //

asmādvadhārthaṃ niścitya tapo ghoraṃ samāsthitaḥ /
ṛte kanyāṃ mahādeva putro mesyāditi bruvan //

bhagavanputramicchāmi bhīṣmaṃ praticikīrṣayā /
ityukto devadevena strīpumāṃste bhaviṣyati //

nivartasva mahīpāla naitañjātvanyathā bhavet /
sa tu gatvā ca nagaraṃ bhāryāmidamuvāca ha //

kṛto yatno mahādevastapasā'rādhito mayā /
kanyā bhūtvā pumānbhāvī iti coktosmi śambhunā //

punaḥ punaryācyamāno diṣṭamityabravīcchivaḥ /
natadanyacca bhavitā bhavitavyaṃ hi tattathā //

tataḥ sā niyatā bhūtvā ṛtukāle manasvinī /
patnī drupadarājasya drupadaṃ praviveśa ha //

lebhe garbhaṃ yathākālaṃ vidhidṛṣṭena karmaṇā /
pārṣatasya mahīpāla yathā māṃ nārado'bravīt //

tato dadhāra sā devī garbhaṃ rājīvalocanā /
tāṃ sa rājā priyāṃ bhāryāṃ drupadaḥ kurunandana //

putrasnehānmahābāhuḥ mukhaṃ paryacarattadā /
sarvānabhiprāyakṛtānbhāryā'labhata kaurava //

aputrasya sato rājño drupadasya mahīpateḥ /
yathākālaṃ tu sā devī mahiṣī drupadasya ha //

kanyāṃ pravararūpāṃ tu prājāyata narādhipa /
aputrasya tu rājñaḥ sā drupadasya manasvinī //

khyāpayāmāsa rājendra putro hyeṣa mameti vai /
tataḥ sa rājā drupada pracchannāyā narādhipa //

putravatputrakāryāṇi sarvāṇi samakārayat /
rakṣaṇaṃ caiva mantrasya mahiṣī drupadasya sā //

cakāra sarvayatnena bruvaṇā putra ityuta /
na ca tāṃ vedaka nagare kaścidanyatra pārṣatāt //

śraddadhāno hi tadvākyaṃ devasyācyutatejasaḥ /
chādayāmāsa tāṃ kanyāṃ pumāniti ca sobravīt //

jātakarmāṇi sarvāṇi kārayāmāsa pārthivaḥ /
puṃvadvidhānayuktāni śikhaṇḍīti ca tāṃ viduḥ //

ahamekastu cāreṇa vacanānnāradasya ca /
jñātavāndevavākyena ambāyāstapasā tathā //