Mahabharata · Chapter 5.184
tato rātrau vyatītāyāṃ pratibuddho'smi bhārata /
tataḥ sañcintya vai svapnamavāpaṃ harṣamuttamam //
tataḥ samabhavadyuddhaṃ mama tasya ca bhārata /
tumulaṃ sarvabhūtānāṃ romaharṣaṇamadbhutam //
tato bāṇamayaṃ varṣaṃ vavarṣa mayi bhārgavaḥ /
nyavārayamahaṃ tacca śarajālena bhārata //
tataḥ paramasankruddhaḥ punareva mahātapāḥ /
hyastanena ca kopena śaktiṃ vai prāhiṇonmayi //
indrāśanisamasparśāṃ yamadaṇḍasamaprabhām /
jvalantīmagnivatsaṅkhye lelihānāṃ samantataḥ //
tato bharataśārdūla dhiṣṇyamākāśagaṃ yathā /
sā mamābhyavadhīttūrṇaṃ jatrudeśe kurūdvaha //
athāsramasravaddhoraṃ girergairikadhātuvāt /
rāmeṇa sumahābāho kṣatasya kṣatajekṣaṇa //
tato'haṃ jāmadagnyāya bhṛśaṃ krodhasamanvitaḥ /
cikṣepa mṛtyusankāśaṃ bāṇaṃ sarpaviṣopamam //
sa tenābhihato vīro lalāṭe dvijasattamaḥ /
aśobhata mahārāja śaśrṛṅga iva parvataḥ //
sa saṃrabdhaḥ samāvṛtya śaraṃ kālāntakopamam /
sandadhe balavatkṛṣya ghoraṃ śatranibarhaṇam //
sa vakṣasi pāpatograḥ śaro vyāla iva śvasan /
mahīṃ rājaṃstataścāhamagamaṃ rudhirāvilaḥ //
samprāpya tu punaḥ sañjñāṃ jāmadaghnyāya dhīmate /
prāhiṇvaṃ vimalāṃ śaktiṃ jvalantīmaśanīmiva //
sā tasya dvijamukhyasya nipapāta bhujāntare /
vihvalaścābhavadrājanvepathuścainamāviśat //
tata enaṃ pariṣvajya sakhā vipro mahātapāḥ /
akṛtavraṇaḥ śubhairvākyairāśvāsayadanekadhā //
samāśvastastato rāmaḥ krodhāmarṣasamanvitaḥ /
prāduścakre tadā brāhmaṃ paramāstraṃ mahāvrataḥ //
tatastatpratighātārthaṃ brāhmamevāstramuttamam /
mayā prayuktaṃ jajvāla yugāntamiva darśayat //
tayorbrahmāstrayorāsīdantarā vai samāgamaḥ /
asamprāpyaiva rāmaṃ ca māṃ ca bhāratasattama //
tato vyomni prādurabhūtteja eva hi kevalam /
bhūtāni caiva sarvāṇi jagmurārtiṃ viśāmpate //
ṛṣayaśca sagandharvā devatāścaiva bhārata /
santāpaṃ paramaṃ jagmurastratejobhipīḍitāḥ //
tataścacāla pṛthivī saparvatavanadrumā /
santaptāni ca bhūtāni viṣādanka jagmuruttamam //
prajajvāla nabho rājandhūmāyante diśo daśa /
na sthātumantarikṣe ca śekurākāśagāstadā //
tato hāhākṛte loke sadevāsurarākṣase /
idamantaramityevaṃ moktukāmo'smi bhārata //
prasvāpamastraṃ tvarito vacanādbrahmavādinām /
cintitaṃ ca tadastraṃ me manasi pratyabhāttadā //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0