Mahabharata · Chapter 5.185

tato halahalāśabdo divi rājanmahānabhūt /
prasvāpaṃ bhīṣma mā srākṣīriti kauravanandana //

ayuñjameva caivāhaṃ tadastraṃ bhṛgunandane /
prasvāpaṃ māṃ prayujjānaṃ nārado vākayamabravīt //

ete viyati karavya divi devagaṇāḥ sthitāḥ /
te tvāṃ nivārayantyadya prasvāpaṃ mā prayojaya //

rāmastapasvī brahmaṇyo brāhmaṇaśca guruśca te /
tasyavamānaṃ kauravya māsma kārṣīḥ kathañcana //

tato'paśyaṃ diviṣṭhānvai tānaṣṭau brahmavādinaḥ /
te māṃ smayanto rājendra śanakairidamabruvan //

yathā'ha bharataśreṣṭha nāradastattathā kuru /
etaddhi paramaṃ śreyo lokānāṃ bharatarṣabha //

tataśca pratisaṃhṛtya tadastraṃ svāpanaṃ mahat /
brahmāstraṃ dīpayāñcakre tasminyudhi yathāvidhi //

tato rāmo hṛṣito rājasiṃha dṛṣṭvā tadastraṃ vinivartitaṃ vai /
jito'smi bhīṣmeṇa sumandabuddhi- rityeva vākyaṃ sahasā vyamuñcat //

tato'paśyatpitaraṃ jāmadagnyaḥ pitustathā pitaraṃ cāsya mānyam /
te tatra cainaṃ parivārya tasthu- rūcuścainaṃ sāntvapūrvaṃ tadanīm //
pitara ūcuḥ /

mā smaivaṃ sāhasaṃ tāta punaḥ kārṣīḥ kathañcana /
bhīṣmeṇa saṃyugaṃ gantuṃ kṣatriyeṇa viśeṣataḥ //

kṣatriyasya tu dharmo'yaṃ yadyuddhaṃ bhṛgunandana /
svādhyāyo vratacaryā'tha brāhmaṇānāṃ paraṃ dhanam //

idaṃ nimitte kasmiṃścidasmābhiḥ prāgudāhṛtam /
śastradhāraṇamatyugraṃ taccākāryaṃ kṛtaṃ tvayā //

vatsa paryāptametāvadbhīṣmeṇa saha saṃyuge /
vimardaste mahābāho vyapayāhi raṇāditaḥ //

paryāptametadbhadraṃ te tava kārmukadhāraṇam /
visarjayaitaddurdharṣa tapastapyasva bhārgava //

eṣa bhīṣmaḥ śāntanavo devaiḥ sarvairnivāritaḥ /
nivartasva raṇādasmāditi caiva prasāditaḥ //

rāmeṇa saha māyotsīrguruṇeti punaḥ punaḥ /
na hi rāmo raṇe jetuṃ tvayā nyāyyaḥ kurūdvaha //

mānaṃ kuruṣva gāṅgeya brāhmaṇasya raṇājire /
vayaṃ tu guravastubhyaṃ tasmāttvāṃ vārayāmahe //

bhīṣmo vasūnāmanyatamo diṣṭyā jīvasi putraka /
gāṅgeyaḥ śantanoḥ putro vasureṣa mahāyaśāḥ //

kathaṃ śakyastvayā jetuṃ nivartasveha bhārgava /
arjunaḥ pāṇḍavaśreṣṭhaḥ purandarasuto balī //

naraḥ prajāpatirvīraḥ pūrvadevaḥ sanātanaḥ / savyasācīti vikhyātastriṣu lokeṣu vīryavān /
bhīṣmamṛtyuryathākālaṃ vihito vai svayambhuvā //
bhīṣma uvāca /

evamuktaḥ sa pitṛbhiḥ pitṝnrāmo'bravīdidam / nāhaṃ yudhi nivarteyamiti me vratamāhitam /
na nivartitapūrvaśca kadācidraṇamūrdhani //

nivartyatāmāpageyaḥ kāmaṃ yuddhātpitāmahāḥ /
na tvahaṃ vinivartiṣye yuddhādasmātkathañcana //

tataste munayo rājannṛcīkapramukhāstadā /
nāradenaiva sahitāḥ samāgamyedamabruvan //

nivartasva raṇāttāta mānayasva dvijottamam /
ityavocamahaṃ tāṃśca kṣatradharmavyapekṣayā //

mama vratamidaṃ loke nāhaṃ yuddhātkadācana /
vimukho vinivarteyaṃ pṛṣṭhato'bhyāhataḥ śaraiḥ //

nāhaṃ lobhānna kārpaṇyānna bhayānnārthakāraṇāt /
tyajeyaṃ śāśvataṃ dharmamiti me niścitā matiḥ //

tataste munayaḥ sarve nāradapramukhā nṛpa /
bhāgīrathī ca me mātā raṇamadhyaṃ prapedire //

tathaivāttaśaro dhanvī tathaiva dṛḍhaniścayaḥ /
sthito'hamāhave yoddhuṃ tataste rāmamabruvan //

sametya sahitā bhūyaḥ samare bhṛgunandanam /
nāvanītaṃ hi hṛdayaṃ viprāṇāṃ śāmya bhārgava //

rāma rāma nivartasva yuddhādasmāddvijottama /
avadhyo vai tvayā bhīṣmastvaṃ ca bhīṣmasya bhārgava //

evaṃ bruvantaste sarve pratiruddhya raṇājiram /
nyāsayāñcakrire śastraṃ pitaro bhṛgunandanam //

tato'haṃ punarevātha tānaṣṭau brahmavādinaḥ /
adrākṣaṃ dīpyamānānvai grahānaṣṭāvivoditān //

te māṃ sapraṇayaṃ vākyamabruvansamare sthitam /
praihi rāmaṃ mahābāho guruṃ lokahitaṃ kuru //

dṛṣṭvā nivartitaṃ rāmaṃ suhṛdvākyena tena vai /
lokānāṃ ca hitaṃ kurvannahamapyādade vacaḥ //

tato'haṃ rāmamāsādya vavande bhṛśavikṣataḥ /
rāmaścābhyutsmayanpremṇā māmuvāca mahātapāḥ //

tvatsamo nāsti loke'sminkṣatriyaḥ pṛthivīcaraḥ /
gamyatāṃ bhīṣma yuddhe'smiṃstoṣito'haṃ bhṛśaṃ tvayā //

mama caiva samakṣaṃ tāṃ kanyāmāhūya bhārgavaḥ /
uktavāndīnayā vācā madhye teṣāṃ mahātmanām //