Mahabharata · Chapter 5.182

tataḥ prabhāte rājendra sūrye vimalatāṃ gate /
bhārgavasya mayā sārdhaṃ punaryuddhamavartata //

tato'bhrānte rathe tiṣṭhanrāmaḥ praharatāṃ varaḥ /
vavarṣa śarajālāni mayi medha ivācale //

tataḥ sūto mama suhṛccharavarṣeṇa tāḍitaḥ /
apayāto rathopasthānmano mama viṣādayan //

tataḥ sūto mamātyarthaṃ kaśmalaṃ prāviśanmahat /
pṛthivyāṃ ca śarāghātānnipapāta mumoha ca //

tataḥ sūto jahātprāṇānrāmabāṇaprapīḍitaḥ /
muhūrtādiva rājendra māṃ ca bhīrāviśattadā //

tataḥ sūte hate tasminkṣipatastasya me śarān /
pramattamanaso rāmaḥ prāhiṇonmṛtyusammitam //

tataḥ sūtavyasaninaṃ viplutaṃ māṃ sa bhārgavaḥ /
śareṇābhyahanadgāḍhaṃ vikṛṣya balavaddhanuḥ //

sa me bhujāntare rājannipatya rudhirāśanaḥ /
mayaiva saha rājendra jagāma vasudhātalam //

matvā tu nihataṃ rāmastato māṃ bharatarṣabha /
meghavadvinanādoccairjahṛṣe ca punaḥ punaḥ //

tathā tu patite rājanmayi rāmo mudā yutaḥ /
udakrośanmahānādaṃ saha tairanuyāyibhiḥ //

mama tatrābhavanye tu kuravaḥ pārśvataḥ sthitāḥ . āgatā api yuddhaṃ tañjanāstatra didṛkṣavaḥ /
ārtiṃ paramikāṃ jagmuste tadā patite mayi //

tato'paśyaṃ patito rājasiṃha dvijānaṣṭau sūryahutāśanābhān /
te māṃ samantātparirvāya tasthuḥ svabāhubhiḥ paridhāryājimadhye //

rakṣyamāṇaśca tairviprairnāhaṃ bhūmimupāspṛśam /
antarikṣe dhṛto hyasmi tairviprairbāndhavairiva //

śvasannivāntarikṣe ca jalabindubhirukṣitaḥ /
tataste brāhmaṇā rājannabruvanparigṛhya mām //

mā bhairiti samaṃ sarve svasti te'stviti cāsakṛt / tatasteṣāmahaṃ vāgbhistarpitaḥ sahasotthitaḥ /
mātaraṃ saritāṃ śreṣṭhāmapaśyaṃ rathamāsthitām //

hayāśca me sangṛhītāstayā'sa- nmahānadyā saṃyati kauravendra /
pādau jananyāḥ pratigṛhya cāhaṃ tathā pitṝṇāṃ rathamabhyaroham //

rarakṣa sā māṃ sarathaṃ hayāṃścopaskārāṇi ca /
tāmahaṃ prāñjalirbhūtvā punareva vyasarjayam //

tato'haṃ svayamudyamya hayāṃstānvātaraṃhasaḥ /
ayudhyaṃ jāmadagnyena nivṛtte'hani bhārata //

tato'haṃ bharataśreṣṭha vegavantaṃ mahābalam /
amuñcaṃ samare bāṇaṃ rāmāya hṛdayacchidam //

tato jagāma vasudhāṃ mama bāṇaprapīḍitaḥ /
jānubhyāṃ dhanurutsṛjya rāmo mohavaśaṃ gataḥ //

tatastasminnipatite rāme bhūrisahasrade /
āvavrurjaladā vyoma kṣaranto rudhiraṃ bahu //

ulkāśca śataśaḥ petuḥ sanirghātāḥ sakampanāḥ / 5-182-22barkaṃ ca sahasā dīptaṃ svarbhānurabhisaṃvṛṇot //

vavuśca vātāḥ paruṣāścalitā ca vasundharā /
gṛdhrā balāśca kaṅkāśca paripeturgudā yutāḥ //

dīptāyāṃ diśi gomāyurdāruṇaṃ muhurunnadat /
anāhatā dundubhayo vinedurbhṛśaniḥsvanāḥ //

etadautpātikaṃ sarvaṃ ghoramāsīdbhayankaram /
visañjñakalpe dharaṇīṃ gate rāme mahātmani //

tato vai sahasotthāya rāmo māmabhyavartata /
punaryuddhāya kauravya vihvalaḥ krodhamūrchitaḥ //

ādadāno mahābāhuḥ kārmukaṃ tālasannibham /
tato mayyādadānaṃ taṃ rāmameva nyavārayan //

maharṣayaḥ kṛpāyuktāḥ krodhāviṣṭo'pi bhārgavaḥ /
samāharadameyātmā śaraṃ kālānalopamam //

sato ravirmandamarīcimaṇḍalo jagāmāstaṃ pāṃsupuñjāvagūḍhaḥ
niśā vyagāhatsukhaśītamārutā tato yuddhaṃ pratyavahārayāva- //

evaṃ rājannavahāro babhūva tataḥ punarvimale'bhūtsughoram /
kalyankalyaṃ viṃśatiṃ vai dināni tathaiva cānyāni dināni trīṇi //