Mahabharata · Chapter 5.181

samāgatasya rāmeṇa punarevātidāruṇam /
anyedyustumulaṃ yuddhaṃ tadā bharatasattama //

tato divyāstravicchūro divyānyastrāṇyanekaśaḥka /
ayojayatsa dharmātmā divase divase vibhuḥ //

tānyahaṃ tatpratīghātairastrairastrāṇi bhārata /
vyadhamaṃ tumuleyuddheprāṇāṃstyaktvāsudustyajān //

astrairastreṣu bahudhā hateṣveva ca bhārata /
akrudhyata mahātejāstyaktaprāṇaḥ sa saṃyuge //

tataḥ śaktiṃ prāhiṇoddhorarūpā- mastre ruddhe jāmadagnyo mahātmā /
kālotsṛṣṭāṃ prajvalitāmivolkāṃ sandīptāgrāṃ tejasā vyāpya lokam //

tato'haṃ tāmiṣubhirdīpyamānāṃ samāyāntīmantakālārkadīptām /
chittvā tridhā pātayāmāsa bhūmau tato vavau pavanaḥ puṇyagandhiḥ //

tasyāṃ chinnāyāṃ krodhadīpto'tha rāmaḥ śaktīrghorāḥ prāhiṇod्dvādaśānyāḥ /
tāsāṃ rūpaṃ bhārata nota śakyaṃ tejasvitvāllāghavāccaiva vaktum //

kintvevāhaṃ vihvalaḥ sampradṛśya digbhyaḥ sarvāstā mahotkā ivāgneḥ /
nānārūpāstejasogreṇa dīptā yathā'dityā dvādaśa lokasankṣaye //

tato jālaṃ bāṇamayaṃ vivṛttaṃ sandṛśya bhittvā śarajālena rājan /
dvādaśeṣūnprāhiṇavaṃ raṇe'haṃ tataḥ śaktīrapyadhamaṃ ghorarūpāḥ //

tato rājañjāmadagnyo mahātmā śaktīrghorā vyākṣipaddhemadaṇḍāḥ /
vicitritāḥ kāñcanapaṭṭananddhā yathā maholkā jvalitāstathā tāḥ //

tāścāpyugrāścarmaṇā vārayitvā khaṅgenājau pātayitvā narendra /
bāṇairdivyairjāmadagnyasya saṅkhye divyānaśvānabhyavarṣaṃ sasūtān //

nirmiktānāṃ pannagānāṃ sarūpā dṛṣṭvā śaktīrhemacitrā nikṛttāḥ /
prāduścakre divyamastraṃ mahātmā krodhāviṣṭo haihayeśamamāthī //

tataḥ śreṇyaḥ śalabhānāmivogrāḥ samāpeturviśikhānāṃ pradīptāḥ /
samācinoccāpi bhṛśaṃ śarīraṃ hayānsūtaṃ sarathaṃ caiva mahyam //

rathaḥ śarairme nicitaḥ sarvato'bhū- ttathā vāhāḥ sārathiścaiva rājan /
yugaṃ ratheṣāṃ ca tathaiva cakre tathaivākṣaḥ śarakṛtto'tha bhagnaḥ //

tatastasminbāṇavarṣe vyatīte śaraugheṇa pratyavarṣaṃ guruṃ tam /
sa vikṣato mārgaṇairbrahmarāśi- rdehādasaktaṃ mumuce bhūri raktam //

yathā rāmo bāṇajālābhitapta- stathaivāhaṃ subhṛśaṃ gāḍhaviddhaḥ /
tato yuddhaṃ vyaramaccāparāhṇe bhānāvastaṃ pratiyāte mahīdhram //