Mahabharata · Chapter 5.158

etasminnaiva kāle tu bhīṣmakasya mahātmanaḥ /
hiraṇyaromṇo nṛpateḥ sākṣādindrasakhasya vai //

ākūtīnāmadhipatirbhojasyātiyaśasvinaḥ /
dākṣiṇātyapateḥ putro dikṣu rukmīti viśrutaḥ //

yaḥ kimpuruṣasiṃhasya gandhamādanavāsinaḥ /
kṛtsnaṃ śiṣyo dhanurvedaṃ catuṣpādamavāptavān //

yo māhendraṃ dhanurlebhe tulyaṃ gāṇḍīvatejasā /
śārṅgeṇa ca mahābāhuḥ sammitaṃ divyalakṣaṇam //

trīṇyevaitāni divyāni dhanūṃṣi divicāriṇām . vāruṇaṃ gāṇḍivaṃ tatra māhendraṃ vijayaṃ dhanuḥ /
śārṅga tu vaiṣṇavaṃ prāhurdivyaṃ tejomayaṃ dhanuḥ //

dhārayāmāsa tatkṛṣṇaḥ parasenābhayāvaham /
gāṇḍīvaṃ pāvakāllebhe khāṇḍave pākaśāsaniḥ //

drumādrukmī mahātejā vijayaṃ pratyapadyata /
sañchidya mauravānpāśānnihatya muramojasā //

nirjitya narakaṃ bhaumamāhṛtya maṇikuṇḍale /
ṣoḍaśa strīsahasrāṇi ratnāni vividhāni ca //

pratipede hṛṣīkeśaḥ śārṅgaṃ ca dhanuruttamam /
rukmī tu vijayaṃ labdhvā dhanurmeghanibhasvanam //

vibhīṣayanniva jagatpāṇḍavānabhyavartata /
nāmṛṣyata purā yo'sau svabāhulagarvitaḥ //

rukmiṇyā haraṇaṃ vīro vāsudevena dhīmatā /
kṛtvā pratijñāṃ nāhatvā nivartiṣye janārdanam //

tato'nvadhāvadvārṣṇeyaṃ sarvaśastrabhṛtāṃ varaḥ /
senayā caturaṅgiṇyā mahatyā dūrapātayā //

vicitrāyudhavarmiṇyā gaṅgyeva pravṛddhayā /
sa samāsādya vārṣṇeyaṃ yogānāmīśvaraṃ prabhum //

vyaṃsito vrīḍito rājannājagāma sa kuṇḍinam /
yatraiva kṛṣṇena raṇe nirjitaḥ paravīrahā //

tatra bhojakaṭaṃ nāma kṛtaṃ nagaramuttamam /
sainyena mahatā tena prabhūtagajavājinā //

puraṃ tadbhuvi vikhyātaṃ nāmnā bhojakaṭaṃ nṛpa /
sa bhojarājaḥ sainyena mahatā parivāritaḥ //

akṣauhiṇyā mahāvīryaḥ pāṇḍavānkṣipramāgamat /
tataḥ sa kavacī dhanvī talī khaṅgī śarāsanī //

rathenādityavarṇena praviveśa mahācamūm /
viditaḥ pāṇḍaveyānāṃ vāsudevapriyepsayā //

yudhiṣṭhirastu taṃ rājā pratyudgamyābhyapūjayat /
sa pūjitaḥ pāṇḍuputrairyathānyāyaṃ susaṃstutaḥ //

pratigṛhya tu tānsarvānviśrāntaḥ sahasainikaḥ /
uvāca madhye vīrāṇāṃ kuntīputraṃ dhanañjayam //

sahāyosmi sthito yuddhe yadi bhītosi pāṇḍava /
kariṣyāmi raṇe sāhyamasahyaṃ tava śatrubhiḥ //

na hi me vikrame tulyaḥ pumānastīha kaścana /
haniṣyāmiraṇe bhāgaṃ yanme dāsyasi pāṇḍava //

api droṇakṛpau vīrau bhīṣmakarṇāvatho punaḥ /
athavā sarva evaite tiṣṭhantu vasudhādhipāḥ //

nihatya samare śatrūṃstava dāsyāmi medinīm /
ityukto dharmarājasya keśavasya ca sannidhau //

śrṛṇvatāṃ pārthivendrāṇāmanyeṣāṃ caiva sarvaśaḥ . vāsudevamabhiprekṣya dharmarājaṃ ca pāṇḍavam /
uvāca dhīmānkaunteyaḥ prahasya sakhipūrvakam //

yudhyamānasya me vīra gandharvaiḥ sumahābalaiḥ /
sahāyo ghoṣayātrāyāṃ kastadāsītsakhā mama //

tathā pratibhaye tasmindevadānavasankule /
khāṇḍave yudhyamānasya kaḥ sahāyastadāvabhavat //

nivātakavacairyuddhe kālakeyaiśca dānavaiḥ /
tatra me yudhyamānasya kaḥ sahāyastadābhavat //

tathā virāṭanagare kurubhiḥ saha saṅgare /
yudhyato bahubhistatra kaḥ sahāyo'bhavanmama //

upajīvya raṇe rudraṃ śakraṃ vaiśravaṇaṃ yamam /
varuṇaṃ pāvakaṃ caiva kṛpaṃ droṇaṃ ca mādhavam //

dhārayangāṇḍivaṃ divyaṃ dhanustejomayaṃ dṛḍham /
akṣayyaśarasaṃyukto divyāstraparibṛṃhitaḥ //

kauravāmāṃ kule jātaḥ pāṇḍoḥ putro viśeṣataḥ /
droṇaṃ vyapadiśañchiṣyo vāsudevasahāyavān //

kathamasmadvidho brūyādbhīto'smīti yaśoharam /
vacanaṃ naraśārdūla vajrāyudhasamasvanam //

nāsmi bhīto mahābāho sahāyārthaśca nāsti me /
yathākāmaṃ yathāyogaṃ gaccha vātraiva tiṣṭha vā //
vaiśampāyana uvāca

tacchrutvā vacanaṃ tasya vijayasya ca dhīmataḥ . vinivartya tato rukmī senāṃ sāgarasannibhām /
duryodhanamupāgacchattathaiva bharatarṣabha //

tathaiva cābhigamyainamuvāca vasudhādhipaḥ /
pratyākhyātaśca tenāpi sa tadā śūramāninā //

dvāveva tu mahārāja tasmādyuddhādapeyatuḥ /
rauhiṇeyaśca vārṣṇeyo rukmī ca vasudhādhipa //

gate rāme tīrthayātrāṃ bhīṣmakasya sute tathā /
upāviśanpāṇḍaveyā mantrāya punareva ca //

samitirdharmarājasya sā pārthivasamākulā /
śuśubhe tārakaiścitrā dyauścandreṇeva bhārata //