Mahabharata · Chapter 5.157

āpageyaṃ mahātmānaṃ bhīṣmaṃ śastrabhṛtāṃ varam /
pitāmahaṃ bhāratānāṃ dhvajaṃ sarvamahīkṣitām //

bṛhaspatisaṃ buddhyā kṣamayā pṛthivīsamam /
samudramiva gāmbhīrye himavantamiva sthiram //

prajāpatimivaudārye tejasā bhāskaropamam /
mahendramiva śatrūṇāṃ dhvaṃsanaṃ śaravṛṣṭibhiḥ //

raṇayajñe pravitate subhīme lomaharṣaṇe /
dīkṣitaṃ cirarātrāya śrutvā tatra yudhiṣṭhiraḥ //

kimabravīnmahābāhuḥ sarvaśastrabhṛtāṃ varaḥ /
bhīmasenārjunau vāpi kṛṣṇo vā pratyabhāṣata //
vaiśampāyana uvāca /

āpaddharmārthakuśalo mahābuddhiryudhiṣṭhiraḥ /
sarvānbhrātṝnsamānīya vāsudevaṃ ca śāśvatam //

uvāca vadatāṃ śreṣṭhaḥ sāntvapūrvamidaṃ vacaḥ /
paryākrāmata sainyāni yattāstiṣṭhata daṃśitāḥ //

pitāmahena vo yuddhaṃ pūrvameva bhaviṣyati /
tasmātsaptasu senāsu praṇetṝnmama paśyata //
kṛṣṇa uvāca /

yathārhati bhavānvaktumasminkāle hyupasthite /
tathedamarthavadvākyamuktaṃ te bharatarṣabha //

rocate me mahābāho kriyatāṃ yadanantaram /
nāyakāstava senāyāṃ kriyantāmiha sapta vai //
vaiśampāyana uvāca /

tato drupadamānāyya virāṭaṃ śinipuṅgavam . dhṛṣṭadyumnaṃ ca pāñcālyaṃ dhṛṣṭaketuṃ ca pārthiva /
śikhaṇḍinaṃ ca pāñcālyaṃ sahadevaṃ ca māgadham //

etānsapta mahābhāgānvīrānyuddhābhikāṅkṣiṇaḥ /
senāpraṇetṝnvidhivadabhyaṣiñcadyudhiṣṭhiraḥ //

sarvasenāpatiṃ cātra dhṛṣṭadyumnaṃ cakāra ha /
droṇāntahetorutpanno ya iddhāñjātavedasaḥ //

sarveṣāmeva teṣāṃ tu samastānāṃ mahātmanām /
senāpatipatiṃ cakre gaḍākeśaṃ dhanañjayam //

arjunasyāpi netā ca saṃyantā caiva vājinām /
saṅkarṇaṇānujaḥ śrīmānmahābuddhirjanārdanaḥ //

taddṛṣṭvopasthitaṃ yuddhaṃ samāsannaṃ mahātyayam /
prāviśadbhavanaṃ rājñaḥ pāṇḍavānāṃ halāyudhaḥ //

sahākrūraprabhṛtibhirdadasāmboddhavādibhiḥ /
raukmiṇeyāhukasutaiścārudeṣṇapurogamaiḥ //

vṛṣṇimukhyairadhigatairvyāghrairiva balotkaṭaiḥ /
abhigupto mahābāhurmarudbhiriva vāsavaḥ //

nīlakauśeyavasanaḥ kailāsaśikharopamaḥ /
siṃhakhelagatiḥ śrīmānmadaraktāntalocanaḥ //

taṃ dṛṣṭvā dharmarājaśca keśavaśca mahādyutiḥ /
udatiṣṭhattataḥ pārtho bhīmakarmā vṛkodaraḥ //

gāṇḍīvadhanvā ye cānye rājānastatra kecana /
pūjayāñcakrire te vai samāyāntaṃ halāyudham //

tatastaṃ pāṇḍavo rājā kare pasparśa pāṇinā /
vāsudevapurogāstaṃ sarva evābhyavādayan //

virāṭadrupadau vṛddhāvabhivādya halāyudhaḥ /
yudhiṣṭhireṇa sahita upāviśadarindamaḥ //

tatasteṣūpaviṣṭeṣu pārthiveṣu samantataḥ /
vāsudevamabhiprekṣya rauhiṇeyo'bhyabhāṣata //

bhavitāyaṃ mahāraudro dāruṇaḥ puruṣakṣayaḥ /
diṣṭametaddhruvaṃ manye na śakyamativartitum //

tasmādyuddhātsamuttīrṇānapi vaḥ samuhṛñjānān /
arogānakṣatairdehairdraṣṭāsmīti matirmama //

sametaṃ pārthivaṃ kṣatraṃ kālapakvamasaṃśayam /
vimardaśca mahānbhāvī māṃsaśoṇitakadardamaḥ //

ukto mayā vāsudevaḥ punaḥ punarupahvare /
sambandhiṣu samāṃ vṛttiṃ vartasva madhusūdana //

pāṇḍavā hi yathāsmākaṃ tathā duryodhano nṛpaḥ /
tasyāpi kriyatāṃ sāhyaṃ sa paryeti punaḥpunaḥ //

tacca me nākarodvākyaṃ tvadarthe madhusūdanaḥ /
nirviṣṭaḥ sarvabhāvena dhanañjayamavekṣya ha //

dhruvo jayaḥ pāṇḍavānāmiti me niścitā matiḥ /
tathā hyabhiniveśo'yaṃ vāsudevasya bhārata //

na cāhamṛtsahe kṛṣṇamṛte lokamudīkṣitum /
tato'hamanuvartāmi keśavasya cikīrṣitam //

ubhau śiṣyau hi me vīrau gadāyaddhaviśāradau /
tulyasneho'smyato bhīte tathā duryodhane nṛpe //

tasmādyāsyāmi tīrthāni sarasvatyā niṣevitum /
na hi śakṣyāmi kauravyānnaśyamānānavekṣitum //
vaiśampāyana uvāca /

evamuktvā mahābāhuranujñātaśca pāṇḍavaiḥ /
tīrthayātrāṃ yayau rāmo nivartya madhusūdanam //