Mahabharata · Chapter 5.143

keśavasya tu tadvākyaṃ karṇaḥ śrutvā hitaṃ śubham /
abravīdabhisampūjya kṛṣṇaṃ taṃ madhusūdanam //

jānanmāṃ kiṃ mahābāho sammohayitumicchasi /
yoyaṃ pṛthivyāḥ kārtsnyena vināśaḥ samupasthitaḥ //

nimittaṃ tatra śakunirahaṃ duḥśāsanastathā /
duryodhanaśca nṛpatirdhṛtarāṣṭrasuto'bhavat //

asaṃśayamidaṃ kṛṣṇa mahadyuddhamupasthitam /
pāṇḍavānāṃ kurūṇāṃ ca ghoraṃ rudhirakardamam //

rājāno rājaputrāśca duryodhanavaśānugāḥ /
raṇe śastrāgninā dagdhāḥ prāpsyanti yamasādanam //

svapnā hi bahavo ghorā dṛśyante madhusūdana /
nimittāni ca ghorāṇi tathotpātāḥ sudāruṇāḥ //

parājayaṃ dhārtarāṣṭre vijayaṃ ca yudhiṣṭhire /
saṃsanta iva vārṣṇeya vividhā romaharṣaṇāḥ //

prājāpatyaṃ hi nakṣatraṃ grahastīkṣṇo mahādyutiḥ /
śanaiścaraḥ pīḍayati pīḍayanprāṇino'dhikam //

kṛtvā cāṅgārako vakraṃ jyoṣṭhāyāṃ madhusūdana / anurādhāṃ prārthayate maitraṃ sangamayanniva /

nūnaṃ mahadbhayaṃ kṛṣṇa kurūṇāṃ samupasthitam /
viśeṣeṇa hi vārṣṇeya citrāṃ pīḍayate grahaḥ //

somasya lakṣma vyāvṛttaṃ rāhurarkamupaiti ca /
divaścolkāḥ patantyetāḥ sanirghātāḥ sakampanāḥ //

niṣṭananti ca mātaṅgā muñcantyaśrūṇi vājinaḥ /
pānīyaṃ yavasaṃ cāpi nābhinandanti mādhava //

prādurbhūteṣu caiteṣu bhayamāhurupāsthitam /
nimitteṣu mahābāho dāruṇaṃ prāṇināśanam //

alpe bhukte purīṣaṃ ca prabhūtamiha dṛśyate /
vājināṃ vāraṇānāṃ ca manuṣyāṇāṃ ca keśava //

dhārtarāṣṭrasya sainyeṣu sarveṣu madhusūdana /
parābhavasya talliṅgamiti prāhurmanīṣiṇaḥ //

prahṛṣṭaṃ vāhanaṃ kṛṣṇa pāṇḍavānāṃ pracakṣate /
pradakṣiṇā mṛgāścaiva tatteṣāṃ jayalakṣaṇam //

apasavyā mṛgāḥ sarve dhārtarāṣṭrasya keśava /
vācaścāpyaśarīriṇyastakatparābhavalakṣaṇam //

mayūrāḥ puṇyaśakunā haṃsasārasacātakāḥ /
jīvañjīvakasaṅghāścāpyanugacchanti pāṇḍavān //

gṛdhrāḥ kaṅkā bakāḥ śyenā yātudhānāstathā vṛkāḥ /
makṣikāṇāṃ ca saṅghātā anudhāvanti kauravān //

dhārtarāṣṭrasya sainyeṣu bherīṇāṃ nāsti niḥsvanaḥ /
anāhatāḥ pāṇḍavānāṃ nadanti paṭahāḥ kila //

udapānāśca nardanti yathā govṛṣabhāstathā /
dhārtarāṣṭrasya sainyeṣu tatparābhavalakṣaṇam //

māṃsaśoṇitavarṣaṃ ca vṛṣṭaṃ devena mādhava /
tathā gandharvanagaraṃ bhānumatsamupasthitam //

saprākāraṃ saparikhaṃ savapraṃ cārutoraṇam /
kṛṣṇaśca parighastatra bhānumāvṛtya tiṣṭhati //

udayāstamane sandhye vedayantī mahadbhayam /
śivā ca vāśate ghoraṃ tatparābhavalakṣaṇam //

ekapakṣākṣicaraṇāḥ pakṣiṇo madhusūdana /
utsṛjanti mahaddhoraṃ tatparābhavalakṣaṇam //

kṛṣṇagrīvāśca śakunā raktapādā bhayānakāḥ /
sandhyāmimukhā yānti tatparābhavalakṣaṇam //

brāhmaṇānprathamaṃ dveṣṭi gurūṃśca madhusūdana /
bhṛtyānbhaktimataścāpi tatparābhavalakṣaṇam //

pūrvā diglohitākārā śastravarṇā ca dakṣiṇā . āmapātrapratīkāśā paścimā madhusūdana /

uttarā śaṅkhavarṇābhā diśāṃ varṇā udāhṛtāḥ // pradīptāśca diśaḥ sarvā dhārtarāṣṭrasya mādhava /

mahadbhayaṃ vedayanti tasminnutpātadarśane // sahasrapādaṃ prāsādaṃ svapnānte sma yudhiṣṭhiraḥ /

adhirohanmayā dṛṣṭaḥ saha bhrātṛbhiracyuta // śvetoṣṇīṣāśca dṛśyante sarve vai śuklavāsasaḥ /

āsanāni ca śubhrāṇi sarveṣāmupalakṣaye // tava cāpi mayā kṛṣṇa svapnānte rudhirāvilā /

āntreṇa pṛthivī dṛṣṭā parikṣiptā janārdana // asthisañcayamārūḍhaścāmitaujā yadhiṣṭhiraḥ /

suvarṇapātryāṃ saṃhṛṣṭo bhuktavānghṛtapāyasam // yudhiṣṭhiro mayā dṛṣṭo grasamāno vasundharām /

uccaṃ parvatamārūḍho bhīmakarmā vṛkodaraḥ /
gadāpāṇirnaravyāghro grasanniva mahīmimām //

kṣapayiṣyati naḥ sarvānsa suvyaktaṃ mahāraṇe /
viditaṃ me hṛṣīkeśa śriyā paramayā jvalan //

pāṇḍuraṃ gajamārūḍho gāṇḍīvī sa dhanañjayaḥ /
tvayā sārdhaṃ hṛṣīkeśa śriyā paramayā jvalan //

yūyaṃ sarve vadhiṣyadhvaṃ tatra me nāsti saṃśayaḥ /
pārthivānsamare kṛṣṇa duryodhanapurogamān //

nakulaḥ sahadevaśca sātyakiśca mahārathaḥ /
śuklakeyūrakaṇṭhatrāḥ śuklamālyāmbarāvṛtāḥ //

adhirūḍhā naravyāghrā naravāhanamuttamam /
traya ete mayā dṛṣṭāḥ pāṇḍuracchatravāsasaḥ //

śvetoṣṇīṣāśca dṛśyante traya ete janārdana /
dhārtarāṣṭreṣu sainyeṣu tānvijānīhi keśava //

aśvatthāmā kṛpaścaiva kṛtavarmā ca sātvataḥ /
raktoṣṇīṣāśca dṛśyante sarve mādhava pārthivāḥ //

uṣṭraprayuktamārūḍhau bhīṣmadroṇau mahārathau /
mayā sārdhaṃ mahābāho dhārtarāṣṭreṇa vā vibho //

agastyaśāstāṃ ca diśaṃ prayātāḥ sma janārdana /
acireṇaiva kālena prāpsyāmo yamasādanam //

ahaṃ cānye ca rājāno yacca tatkṣatramaṇḍalam /
gāṇḍivāgniṃ pravekṣyāma iti me nāsti saṃśayaḥ //
kṛṣṇa uvāca /

apasthitavināśeyaṃ nūnamadya vasundharā /
yathā hi me vacaḥ karṇa nopaiti hṛdayaṃ tava //

sarveṣāṃ tāta bhūtānāṃ vināśe pratyupasthite /
anayo nayasaṅkāśo hṛdayānnāpasarpati //
karṇa uvāca /

api tvāṃ kṛṣṇa paśyāmo jīvanto'smānmahāraṇāt /
samuttīrṇā mahābāho vīrakṣatravināśanāt //

athavā saṅgamaḥ kṛṣṇa svarge no bhavitā dhruvam /
tatredānīṃ sameṣyāmaḥ punaḥ sārdhaṃ tvayānagha //
vaiśampāyana uvāca /

ityuktvā mādhavaṃ karṇaḥ pariṣvajya ca pīḍitam /
visarjitaḥ keśavena rathopasthādavātarat //

tataḥ svarathāmasthāya jāmbūnadavibhūṣitam /
mahātmā vai nivavṛte rādheyo dīnamānasaḥ //

tataḥ śīghrataraṃ prāyātkeśavaḥ sahasātyakiḥ /
punaruccārayanvāṇīṃ yāhi yāhīti sārathim //