Mahabharata · Chapter 5.142

karṇasya vacanaṃ śrutvā keśavaḥ paravīrahā /
uvāca prahasanvākyaṃ smitapūrvamidaṃ yathā //
śrībhagavānuvāca /

api tvāṃ na labhetkarṇa rājyalambhopapādanam /
mayā dattāṃ hi pṛthivīṃ na praśāsitumicchasi //

dhruvo jayaḥ pāṇḍavānāmitīdaṃ na saṃśayaḥ kaścana vidyate'tra /
jayadhvajo dṛśyate pāṇḍavasya samucchrito vānararāja ugraḥ /

divyā māyā vihitā bhaumanena samucchritā indraketuprakāśāḥ /
divyāni bhūtāni jayāvahāni dṛśyanti caivātra bhayānakāni //

na sañjate śailavanaspatibhya ūrdhvaṃ tiryagyojanamātrarūpaḥ /
śrīmāndhvajaḥ karṇa dhanañjayasya samucchritaḥ pāvakatulyarūpaḥ //

yadā drakṣyasi saṅgrāme śvetāśvaṃ kṛṣṇasārathim /
aindramastraṃ vikurvāṇamubhe cāpyagnimārute //

gāṇḍīvasya ca nirghoṣaṃ visphūrjitamivāśaneḥ /
na tadā bhavitā tretā na kṛtaṃ dvāparaṃ na ca //

yadā drakṣyasi saṅgrāme kuntīputraṃ yudhiṣṭhiram /
japahomasamāyuktaṃ svāṃ rakṣantaṃ mahācamūm //

ādityamiva durdharṣaṃ tapantaṃ śatruvāhinīm /
na tadā bhavitā tretā na kṛtaṃ dvāparaṃ na ca //

yadā drakṣyasi saṅgrāme bhīmasenaṃ mahābalam /
duḥśāsanasya rudhiraṃ pītvā nṛtyantamāhave //

prabhinnamiva mātaṅgaṃ pratidviradaghātinam /
na tadā bhavitā tretā na kṛtaṃ dvāparaṃ na ca //

yadā drakṣyasi saṅgrāme droṇaṃ śāntanavaṃ kṛpam /
suyodhanañca rājānaṃ saindhavaṃ ca jayadratham //

yuddhāyāpatatastūrṇaṃ vāritānsavyasācinā /
na tadā bhavitā tretā na kṛtaṃ dvāparaṃ na ca //

yadā drakṣyasi saṅ्grāme mādrīputrau mahābalau /
vāhinīṃ dhārtarāṣṭrāṇāṃ kṣobhayantau gajāviva //

vigāḍhe śastrasampāte paravīrarathārujau /
na tadā bhavitā tretā na kṛtaṃ dvāparaṃ na ca //

brūyāḥ karṇa ito gatvā droṇaṃ śāntanavaṃ kṛpam /
saumyo'yaṃ vartate māsaḥ suprāpayavasendhanaḥ //

sarvauṣadhivanasphītaḥ phalavānalpamakṣikaḥ /
niṣpaṅko rasavattoyo nātyuṣṇaśiśiraḥ sukhaḥ //

saptamāccāpi divasādamāvāsyā bhaviṣyati /
saṅgrāmo yujyatāṃ tasyāṃ tāmāhuḥ śakradevatām //

tathā rājño vadeḥ sarvānye yuddhāyābhyupāgatāḥ /
yadvo manīṣitaṃ tadvai sarvaṃ sampādayāmyaham //

rājāno rājaputrāśca duryodhanavaśānugāḥ /
prāpya śastreṇa nidhanaṃ prāpsyanti gatimuttamām //