Mahabharata · Chapter 5.144

asiddhānunaye kṛṣṇe kurubhyaḥ pāṇḍavāngate /
abhigamya pṛthāṃ kṣattā śanaiḥ śocannivābravīt //

jānāsi me jīvaputrī bhāvaṃ nityamavigrahe /
krośato naca gṛhṇīte vacanaṃ me suyodhanaḥ //

upapanno hyasau rājā cedipāñcālakekayaiḥ /
bhīmārjunābhyāṃ kṛṣṇena yuyudhānayamairapi //

upaplāvye niviṣṭo'pi dharmameva yudhiṣṭhiraḥ /
kāṅkṣate jñātisauhārdādbalavāndurbalo yathā //

rājā tu dhṛtarāṣṭro'yaṃ vayovṛddho na śāmyati /
mattaḥ putramadenaiva vidharme pathi vartate //

jayadrathasya karṇasya tathā duḥśāsanasya ca / saubalasya ca durbuddhyā mitho bhedaḥ prapatsyate /

adharmema hi dharmiṣṭhaṃ hriyate rājyamīdṛśam /
yeṣāṃ teṣāmayaṃ dharmaḥ sānubandho bhaviṣyati //

kriyamāṇe balāddharme kurubhiḥ ko na sañjvaret /
asāmnā keśave yāte samudyokṣyanti pāṇḍavāḥ //

tataḥ kurūṇāmanayo bhavitā vīranāśanaḥ /
cintayanna labhe nidrāmahaḥsu ca niśāsu ca //

śrutvā tu kuntī tadvākyamarthakāmena bhāṣitam /
sā niḥśvasantī duḥkhārtā manasā vimamarśa ha //

dhigastvarthaṃ yatkṛteyaṃ sumahāñjñātisankṣayaḥ /
vartsyate suhṛdāṃ caiva yuddhe'sminvai parābhavaḥ //

pāṇḍavāścedipañcālā yādavāśca samāgatāḥ /
bhārataiḥ saha yotsyanti kiṃ nu duḥkhamataḥparam //

paśye doṣaṃ dhruvaṃ yuddhe tathā'yuddhe parābhavam . adhanasya mṛtaṃ śreyo na hi jñātikṣayo jayaḥ /
iti me cintayantyā vai hṛdi duḥkhaṃ pravartate //

pitāmahaḥ śāntanava ācāryaśca yudhāṃ patiḥ /
karṇaśca dhārtarāṣṭrārthaṃ vardhayanti bhayaṃ mama //

nācāryaḥ kāmavāñśiṣyaidrauṇoyuddhyeta jātucit / pāṇḍaveṣu kathaṃ hārdaṃ kuryānna ca pitāmahaḥ /

ayaṃ tveko vṛthādṛṣṭirdhārtarāṣṭrasya durmateḥ /
mohānuvartī satataṃ pāpo dveṣṭi ca pāṇḍavān //

mahatyanarthe nirbandhī balavāṃśca viśeṣataḥ /
karṇaḥ sadā pāṇḍavānāṃ tanme dahati samprati //

āśaṃse tvadya karṇasya mano'haṃ pāṇḍavānprati /
grasādayitumāsādya darśayantī yathātatham //

toṣito bhagavānyatra durvāsā me varaṃ dadau /
āhvānaṃ mantrasaṃyuktaṃ vasantyāḥ pitṛveśmani //

sāhamantaḥpure rājñaḥ kuntibhojapuraskṛtā /
cintayantī bahuvidhaṃ hṛdayena vidūyatā //

balābalaṃ ca mantrāṇāṃ brāhmaṇasya ca vāgbalam /
strībhāvādbālabhāvācca cintayantī punaḥ punaḥ //

dhātryā visrabdhayā guptā sakhījanavṛtā tadā /
doṣaṃ pariharantī ca pituścāritryarakṣiṇī //

kathaṃ nu sukṛtaṃ me syānnāparādhavatī katham /
bhaveyamiti sañcintya brāhmaṇaṃ taṃ namasya ca //

kautūhalāttu taṃ labdhā bāliśyādācaraṃ tadā /
kanyā satī devamarkamāsādayamahaṃ tataḥ //

yo'sau kānīnagarbho me putravatparirakṣitaḥ /
kasmānna kuryādvacanaṃ pathyaṃ bhrātṛhitaṃ tathā //

iti kuntī viniścitya kāryaniścayamuttamam /
kāryārthamabhiniścitya yayau bhāgīrathīṃ prati //

ātmajasya tatastasya ghṛṇinaḥ satyasaṅginaḥ /
gaṅgātīre pṛthāpaśyañjapasthānamanuttamam //

prāṅmukhasyordhvabāhoḥ sā paryatiṣṭhata pṛṣṭhataḥ /
japyāvasānaṃ kāryārthaṃ pratīkṣantī tapasvinī //

atiṣṭhatsūryatāpārtā karṇasyottaravāsasi /
kauravyapatnī vārṣṇeyī madmamāleva śuṣyatī //

āpṛṣṭhatāpāñjaptvā sa parivṛttya yatavrataḥ /
dṛṣṭvā kuntīmupātiṣṭhadabhivādya kṛtāñjaliḥ //

yathānyāyaṃ mahātejā mānī dharmabhṛtāṃ varaḥ /
utsmayanpraṇataḥ prāha kuntīṃ vaikartano vṛṣaḥ //