Mahabharata · Chapter 5.131

vidureṇaivamuktastu keśavaḥ śatrupūgahā /
duryodhanaṃ dhārtarāṣṭramabhyabhāṣata vīryavān //

eko'hamiti yanmohānmanyase māṃ suyodhana /
paribhūya sudurbuddhe grahītuṃ māṃ cikīrṣasi //

ihaiva pāṇḍavāḥ sarve tathaivāndhakavṛṣṇayaḥ /
ihādityāśca rudrāśca vasavaśca maharṣibhiḥ //

evamuktvā jāhāsoccaiḥ keśavaḥ paravīrahā . tasya saṃsmayataḥ śaurervidyudrūpā mahātmanaḥ /
yugapacca viniṣpetuḥ sākṣātsarvāstu devatāḥ //

aṅguṣṭhamātrāstridaśā babhūvuḥ pāvakārciṣaḥ /
tasya brahmā lalāṭastho rudro vakṣasi cābhavat //

lokapālā bhujeṣvāsannagnirāsyādajāyata /
ādityāścaiva sādhyāśca vasavo'thāśvināvapi //

marutaśca sahendreṇa viśvedevāstathaiva ca /
babhūvuścaiva yakṣāśca gandharvoragarākṣasāḥ //

prādurāstāṃ tathā dorbhyāṃ saṅkarṣaṇadhanañjayau /
dakṣiṇe'thārjuno dhanvī halī rāmaśca savyataḥ //

bhīmo yudhiṣṭhiraścaiva mādrīputrau ca pṛṣṭhataḥ /
andhakā vṛṣṇayaścaiva pradyumnaparamukhāstataḥ //

agre babhūvuḥ kṛṣṇasya samudyatamahāyudhāḥ /
śaṅkhacakragadāśaktiśārṅgalāṅgalanandakāḥ //

adṛśyantodyatānyeva sarvapraharaṇāni ca /
nānābāhuṣu kṛṣṇasya dīpyamānāni sarvaśaḥ //

netrābhyāṃ nāsikābhyāṃ ca śrotrābhyāṃ ca samantataḥ /
prādurāsanmahāraudrāḥ sadhūmāḥ pāvakārciṣaḥ //

romakūpeṣu ca tathā sūryasyeva marīcayaḥ . sahasracaraṇaḥ śrīmāñśatabāhuḥ sahasradṛk //

tasya vai nāgalokaśca gulphādho dadṛśe tadā /
candrasūryau tathā netre grahaḥ vai sarvataḥ sthitāḥ //

ūrdhvalokāśca sarve'pi kukṣau tasya vyavasthitāḥ /
saritaḥ sāgarāścaiva svedastasya mahātmanaḥ //

asthīni parvatāḥ sarve vṛkṣā romāṇi tasya hi / nimeṣaṇaṃ rātryahanī jihvāyāṃ śāradā tathā //

taṃ dṛṣṭvā ghoramātmānaṃ keśavasya mahātmanaḥ /
nyamīlayanta netrāṇi rājānastrastacetasaḥ //

ṛta droṇaṃ ca bhīṣmaṃ ca viduraṃ ca mahāmatim /
sañjayaṃ dhṛtarāṣṭraṃ ca ṛṣīṃścaiva tapodhanān //

prādātteṣāṃ sa bhagavāndivyaṃ cakṣurjanārdanaḥ //

dhṛtarāṣṭrāya pradadau bhagavāndivyacakṣuṣī /
dadarśa paramaṃ rūpaṃ dhṛtarāṣṭro'mbikāsutaḥ //

tato devāḥ sagandharvāḥ kinnarāśca mahoragāḥ . ṛṣayaśca mahābhāgā lokapālaiḥ samanvitāḥ /
praṇamya śirasā devaṃ tuṣṭuvuḥ prāñjalisthitāḥ //

krodhaṃ prabho saṃhara saṃhara svaṃ rūpaṃ ca yaddarśitamātmasaṃstham /
yāvattvime devagaṇaiḥ sametā lokāḥ samastā bhuvi nāśamīyuḥ //

tvaṃ ca kartā vikartā ca tvameva parirakṣase /
tvayā vyāptamidaṃ sarvaṃ jagatsthāvarajaṅgamam //

kiyanmātrā mahīpālāḥ kiṃvīryāḥ kimparākramāḥ . teṣāmarthe mahābāho divyaṃ rūpaṃ pradarśivān /
evamuccāritā vācaḥ saha devārvibhuṃ tadā //

taddṛṣṭvā mahadāścaryaṃ mādhavasya sabhātale /
devadundubhayo neduḥ puṣpavarṣaṃ papāta ca //
dhṛtarāṣṭra uvāca /

tvameva puṇḍarīkākṣa sarvasya jagato hitaḥ /
tasmānme yādavaśreṣṭha prasādaṃ kartumarhasi //

bhagavanmama netrābhyāmantardhānaṃ vṛṇe punaḥ /
bhavantaṃ dṛṣṭavānasmi nānyaṃ draṣṭumihotsahe //

tato'bravīnmahābāhurdhṛtarāṣṭraṃ janārdanaḥ /
adṛśyamāne netre dve bhavetāṃ kurunandana //

tatrādbhutaṃ mahārāja dhṛtarāṣṭraśca cakṣuṣī /
labdhavānvāsudevācca viśvarūpadidṛkṣayā //

labdhacakṣuṣamāsīnaṃ dhṛtarāṣṭraṃ narādhipāḥ /
vismitā ṛṣibhiḥ sārdhaṃ tuṣṭuvurmadhusūdanam //

cacāla ca mahī kṛtsnā sāgaraścāpi cukṣubhe /
vismayaṃ paramaṃ jagmuḥ pārthivā bharatarṣabha //

tataḥ sa puruṣavyāghraḥ sañjahāra vapuḥ svakam /
tāṃ divyāmadbhutāṃ citrāmṛddhimattāmarindamaḥ //

tataḥ sātyakimādāya pāṇau vidurameva ca /
ṛṣibhistairanujñāto niryayau madhusūdanaḥ //

ṛṣayo'ntarhitā jagmustataste nāradādayaḥ /
tasminkolāhale vṛtte tadadbhutamivābhavat //

taṃ prasthitamabhiprekṣya kauravāḥ saha rājabhiḥ /
anujagmurnaravyāghraṃ devā iva śatakratam //

acintayannameyātmā sarvaṃ tadrājamaṇḍalam /
niścakrāma tataḥ śauriḥ sadhūma iva pāvakaḥ //

tato rathena śubhreṇa mahatā kiṅkiṇīkinā /
hemajālavicitreṇa laghunā meghanādinā //

sūpaskareṇa śubhreṇa vaiyāghreṇa varūthinā . śaibyasugrīvayuktena pratyadṛśyata dārukaḥ // 5-131-39atathaiva rathamāsthāya kṛtavarmā mahārathaḥ . vṛṣṇīnāṃ sammato vīro hārdikyaḥ samadṛśyata //

upasthitarathaṃ śauriṃ prayāsyantamarindamam /
dhṛtarāṣṭro mahārājaḥ punarevābhyabhāṣata //

yāvadbalaṃ me putreṣu paśyataste janārdana /
pratyakṣaṃ te na te kiñcitparokṣaṃ śatrukarśana //

kurūṇāṃ śamamicchantaṃ yatamānaṃ ca keśava /
viditvaitāmavasthāṃ me nātiśaṅkitumarhasi //

na me pāpo'styabhiprāyaḥ pāṇḍavānprati keśava /
jñātameva hitaṃ vākyaṃ yanmayoktaḥ suyodhanaḥ //

jānanti kuravaḥ sarve rājānaścaiva pārthivāḥ /
śame prayatamānaṃ māṃ sarvayatnena mādhava //
vaiśampāyana uvāca /

tato'bravīnmahābāhurdhṛtarāṣṭraṃ janārdanaḥ /
droṇaṃ pitāmahaṃ bhīṣmaṃ kṣattāraṃ bāhlikaṃ kṛpam //

pratyakṣametadbhavatāṃ yadvṛttaṃ kurusaṃsadi /
yathā cāśiṣṭavanmando roṣādadya samutthitaḥ //

vadatyanīśamātmānaṃ dhṛtarāṣṭro mahīpatiḥ /
āpṛcche bhavataḥ sarvāngamiṣyāmi yudhiṣṭhiram //

āmantrya prasthitaṃ śauriṃ rathasthaṃ puruṣarṣabha /
anujagmurmaheṣvāsāḥ pravīrā bharatarṣabhāḥ //

bhīṣmo droṇaḥ kṛpaḥ kṣattā dhṛtarāṣṭro'tha bāhlikaḥ /
aśvatthāmā vikarṇaśca yuyutsuśca mahārathaḥ //

tato rathena śubhreṇa mahatā kiṅkiṇīkinā /
kurūṇāṃ paśyatāṃ draṣṭuṃ svasāraṃ sa pituryayau //