Mahabharata · Chapter 5.11

ṛṣayo'thābruvansarve devāśca tridiveśvarāḥ /
ayaṃ vai nahupaḥ śrīmāndevarājye'bhiṣicyatām //

tejasvī ca yaśasvī ca dhārmikaścaiva nityadā /
te gatvā tvabruvansarve rājā no bhava pārthiva //

sa tānuvāca nahuṣo devānṛpigaṇāṃstathā /
pitṛbhiḥ sahitānrājanparipsanhitamātmanaḥ //

durbalo'haṃ na me śaktirbhavatāṃ paripālane /
balavāñjñāyatāṃ kaścidbalaṃ śakre hi nityadā //

tamabruvanpunaḥ sarve devā ṛṣipurogamāḥ /
asmākaṃ tapasā yuktaḥ pāhi rājyaṃ triviṣṭape //

parasparabhayaṃ ghoramasmākaṃ hi na saṃśayaḥ /
abhiṣicyasva rājendra bhava rājā triviṣṭape //

devadānavayakṣāṇāmṛṣīṇāṃ rakṣasāṃ tathā / pitṛgandharvabhūtānāṃ cakṣurviṣayavartinām /

teja ādāsyase paśyanbalavāṃśca bhaviṣyasi /
dharmaṃ puraskṛtya sadā saravalokādhipo bhava //

brahmarṣīścāpi devāṃśca gopāyasva triviṣṭape /
śalya uvāca /
abhiṣiktaḥ sa rājendra tato rājā triviṣṭape //

dharmaṃ puraskṛtya tadā sarvalokādhipo'bhavat /
sudurlabhaṃ varaṃ labdhvā prāpya rājyaṃ triviṣṭape //

dharmātmā satataṃ bhūtvā kāmātmā samapadyata /
devodyāneṣu sarveṣu nandanopavaneṣu ca //

kailāse himavatpṛṣṭhe mandare śvetaparvate /
sahye mahendre malaye samudreṣu saritsu ca //

apsarobhiḥ parivṛto devakanyāsamāvṛtaḥ /
nahuṣo devarājo'tha krīḍanbahuvidhaṃ tadā //

śrṛṇvandivyā bahuvidhāḥ kathāḥ śrutimanoharāḥ /
vāditrāṇi ca sarvāṇi gītaṃ ca madhurasvanam //

viśvāvasurnāradaśca gandharvāpsarasāṃ gaṇāḥ /
ṛtavaḥ ṣaṭca devendraṃ mūrtimanta upasthitāḥ //

mārutaḥ surabhirvāti manojñaḥ satvaśītalaḥ /
evaṃ vikrīḍatastasya nahuṣasya durātmanaḥ //

samprāptā darśanaṃ devī śakrasya mahiṣī priyā /
sa tāṃ sandṛśya duṣṭātmā prāha sarvānsabhāsadaḥ //

indrasya mahiṣī devī kasmānmāṃ nopatiṣṭhati /
ahamindro'smi devānāṃ lokānāṃ ca tatheśvaraḥ //

āgacchatu śacī mahyaṃ kṣipramadya niveśanam /
tacchrutvā durmanā devī bṛhaspatimuvāca ha //

rakṣa māṃ nahuṣādbrahmaṃstvāmasmi śaraṇaṃ gatā /
sarvalakṣaṇasampannāṃ brahmaṃstvaṃ māṃ prabhāṣase //

devarājasya dayitāmatyantaṃ sukhabhāginīm /
avaidhavyena yuktāṃ cāpyekapatnīṃ pativradām //

uktavānasi māṃ pūrvamṛtāṃ tāṃ kuru vai giram /
noktapūrvaṃ ca bhagavanmṛṣā te kiñcidīśvara //

tasmādetadbhavetsatyaṃ tvayoktaṃ dvijasattama /
bṛhaspatirathovāca indrāṇīṃ bhayamohitām //

yaduktāsi mayā devi satyaṃ tadbhavitā dhruvam /
drakṣyase devarājaṃ tamindraṃ śīghramihāgatam //

na bhetavyaṃ ca nahuṣātsatyametadbravīmi te /
samānayiṣye śakreṇa nacirādbhavatīmaham //

atha śuśrāva nahuṣa indrāṇīṃ śaraṇīṃ gatām /
bṛhaspateraṅgirasaśrukrodha sa nṛpastadā //