Mahabharata · Chapter 5.12

kruddhaṃ tu nahuṣaṃ dṛṣṭvā devā ṛṣipurogamāḥ /
abruvandevarājānaṃ nahuṣaṃ ghoradarśanam //

devarāja jahi krodhaṃ tvayi kruddhe jagadvibho /
trastaṃ sāsuragandharvaṃ sakinnaramahoragam //

jahi krodhamimaṃ sādho na kupyanti bhavadvidhāḥ /
parasya patnī sā devī prasīdasva sureśvara //

nivartaya manaḥ pāpātparadārābhimarśanāt /
devarājo'si bhadraṃ te prajā dharmeṇa pālaya //

evamukto na jagrāha tadvacaḥ kāmamohitaḥ /
atha devānuvācedamindraṃ prati surādhipaḥ //

ahalyā dharṣitā pūrvamṛṣipatnī yaśasvinī /
jīvato bharturindreṇa sa vaḥ kiṃ na nivāritaḥ //

bahūni ca nṛśaṃsāni kṛtānīndreṇa vai purā /
vaidharmyāṇyupadhāścaiva sa vaḥ kiṃ na nivāritaḥ //

upatiṣṭhatu devī māmetadasyā hitaṃ param /
yuṣmākaṃ ca sadā devāḥ śivamevaṃ bhaviṣyati //
devā ūcuḥ /

indrāṇīmānayiṣyāmo yathecchasi divaspate /
jahi krodhamimaṃ vīra prīto bhava sureśvara //
śalya uvāca /

ityuktvā taṃ tadā devā ṛṣibhiḥ saha bhārata /
tagmurbṛhaspatiṃ vaktumindrāṇīṃ cāśubhaṃ vacaḥ //

jānīmaḥ śaraṇaṃ prāptāmindrāṇīṃ tava veśmani /
dattābhayāṃ ca viprendra tvayā devarṣisattama //

te tvāṃ devāḥ sagandharvā ṛṣayaśca mahādyute /
prasādayanti cendrāṇī nahuṣāya pradīyatām //

indrādviśiṣṭo nahuṣo devarājo mahādyutiḥ /
vṛṇotvimaṃ varārohā bhartṛtve varavarṇinī //

evamukte tu sā devī bāṣpamutsṛjya sasvanam /
uvāca rudatī dīnā bṛhaspatimidaṃ vacaḥ //

nāhamicchāmi nahuṣaṃ patiṃ devarṣisattama /
śaraṇāgatāsmi te brahaṃstrāyasva mahato bhayāt //
bṛhaspatiruvāca /

śaraṇāgataṃ na tyajeyamindrāṇi mama niścayaḥ /
dharmajñāṃ satyaśīlāṃ ca na tyajeyamanindite //

nākāryaṃ kartumicchāmi brāhmaṇaḥ sanviśeṣataḥ /
śrutadharmā satyaśīlo jānandharmānuśāsanam //

nāhametatkariṣyāmi gacchadhvaṃ vai surottamāḥ /
asmiṃścārthe purā gītaṃ brahmaṇā śrūyatāmidam //

na tasya bījaṃ rohati rohakāle na tasya varṣaṃ varṣati varṣakāle /
bhītaṃ prapannaṃ pradadāti śatrave na sa trātāraṃ labhate trāṇamicchan //

moghamannaṃ vindati cāpyacetāḥ svargāllokāddhaśyati naṣṭaceṣṭaḥ /
bhītaṃ prapannaṃ pradadāti yo vai na tasya havyaṃ pratigṛhṇanti devāḥ //

pramīyate cāsya prajā hyakāle sadā vivāsaṃ pitaro'sya kurvate /
bhītaṃ prapannaṃ pradadāti śatrave sendrā devāḥ praharantyasya vajram //

etadevaṃ vijānanvai na dāsyāmi śacīmimām /
indrāṇīṃ viśrutāṃ loke śakrasya mahiṣīṃ priyāṃ //

asyā hitaṃ bhavedyacca mama cāpi hitaṃ bhavet /
kriyatāṃ tatsuraśreṣṭhā nahi dāsyāmyahaṃ śacīm //
śalya uvāca /

atha devāḥ sagandharvā gurumāhuridaṃ vacaḥ /
kathaṃ sunītaṃ nu bhavenmantrayasva bṛhaspate //
bṛhaspatiruvāca /

nahuṣaṃ yācatāṃ devī kiñcitkālāntaraṃ śubhā /
indrāṇi hitametaddhi tathā'smākaṃ bhaviṣyati //

bahuvighnaḥ surāḥ kālaḥ kālaḥ kālaṃ nayiṣyati /
garvito balavāṃścāpi nahuṣo varasaṃśrayāt //
śalya uvāca /

tatastena tathokte tu prītā devāstathābruvan /
brahmansādhvidamuktaṃ te hitaṃ sarvaṃ divaukasām //

evametaddvijaśreṣṭha devī ceyaṃ prasādyatām /
tataḥ samastā indrāṇīṃ devāścāgnipurogamāḥ //

ūcurvacanamavyagrā lokānāṃ hitakāmyayā /
devā ūcuḥ /
tvayā jagadidaṃ sarvaṃ dhṛtaṃ sthāvarajaṅgamam /
ekapatnyasi satyā ca gacchasva nahuṣaṃ prati //

kṣipraṃ tvāmabhikāmaśca vinaśiṣyati pāpakṛt /
nahuṣo devi śakraśca suraiśvaryamavāpsyati //

evaṃ viniścayaṃ kṛtvā indrāṇī kāryasiddhaye /
abhyagacchata savrīḍā nahuṣaṃ ghoradarśanam //

dṛṣṭvā tāṃ nahuṣaścāpi vayorūpasamanvitām /
samahṛṣyata duṣṭātmā kāmopahatacetanaḥ //