Mahabharata · Chapter 5.10

sarvaṃ vyāptamidaṃ devā vṛtreṇa jagadavyayam /
na hyasya sadṛśaṃ kiñcitpratighātāya yadbhavet //

samartho hyabhavaṃ pūrvamasamartho'smi sāmpratam /
kathaṃ nu kāryaṃ bhadraṃ vo durdharṣaḥ sa hi me mataḥ //

tejasvī ca mahātmā ca yuddhe cāmitavikramaḥ /
grasetribhuvanaṃ sarvaṃ sadevāsuramānuṣam //

tasmādviniścayamimaṃ śṛṇudhvaṃ tridivaukasaḥ /
viṣṇoḥ kṣayamupāgamya sametya ca mahātmanā //

tena sammantrya vetsyāmo vadhopāyaṃ durātmanaḥ /
śalya uvāca /
evamukte maghavatā devāḥ śarṣigaṇāstadā /
śaraṇyaṃ śaramaṃ devaṃ jagmurviṣṇuṃ mahābalam //

ūcuśca sarve deveśaṃ viṣṇuṃ vṛtrabhayārditāḥ /
trayo lokāstvayā krāntāstribhirvikramaṇaiḥ purā //

amṛtaṃ cāhṛtaṃ viṣṇo daityāśca nihatā raṇe /
baliṃ baddhvā mahādaityaṃ śakro devādhipaḥ kṛtaḥ //

tvaṃ prabhuḥ sarvadevānāṃ tvayā sarvamidaṃ tatam /
tvaṃ hi devo mahādeva sarvalokanamaskṛtaḥ //

gatirbhava tvaṃ devānāṃ sendrāṇāmamarottama /
jagadvyāptamidaṃ sarvaṃ vṛtreṇāsurasūdana //
viṣṇuruvāca /

avaśyaṃ karaṇīyaṃ me bhavatāṃ hitamuttamam /
tasmādupāyaṃ vakṣyāmi yathā'sau nabhaviṣyati //

gacchadhvaṃ sarṣigandharvā yatrāsau viśvarūpadhṛk /
sāma tasya prayuñjadhvaṃ tata enaṃ vijeṣyatha //

bhaviṣyati jayo devāḥ śakrasya mama tejasā /
adṛśyaśca pravekṣyāmi vajre hyasyāyudhottame //

gacchadhvamṛṣibhiḥ sārdhaṃ gandharvaiśca surottamāḥ /
vṛtrasya saha śakreṇa sandhiṃ kuruta māciram //
śalya uvāca /

evamukte tu devena ṛṣayastridaśāstathā /
yayuḥ sametya sahitāḥ śakraṃ kṛtvā puraḥsaram //

samīpametya ca yadā sarva eva mahaujasaḥ /
taṃ tejasā prajvalitaṃ pratapantaṃ diśo daśa //

grasantamiva lokāṃstrīnsūryācandramasau yathā /
dadṛśuste tato vṛtraṃ śakreṇa saha devatāḥ //

ṛṣayo'tha tato'bhyetya vṛtramūcuḥ priyaṃ vacaḥ /
vyāptaṃ jagadidaṃ sarvaṃ tejasā tava durjaya //

na ca śaknoṣi nirjeṣuṃ vāsavaṃ balināṃ vara /
yudhyatoścāpi vāṃ kālo vyatītaḥ sumahāniha //

pīḍyante ca prajāḥ sarvāḥ sadevāsuramānuṣāḥ /
sakhyaṃ bhavatu te vṛtra śakreṇa saha nityadā //

avāpsyasi sukhaṃ tvaṃ ca śakralokāṃśca śāśvatān /
ṛṣivākyaṃ niśamyātha vṛtraḥsa tu mahābalaḥ //

uvāca tānṛṣīnsarvānpraṇamya śirasā'suraḥ /
sarve yūyaṃ mahābhāgā gandharvāścaiva sarvaśaḥ //

yadbrūtha tacchrutaṃ sarvaṃ mamāpi śrṛṇutānaghāḥ / sandhiḥ kathaṃ vai bhavitā mama śakrasya cobhayoḥ /
tejasorhi dvayordevāḥ sakhyaṃ vai bhavitā katham //
ṛṣaya ūcuḥ /

sakṛtsatāṃ saṅgatamīpsitavyaṃ tataḥ paraṃ bhavitā bhavyameva /
nātikrāmetsatpuruṣeṇa saṅgataṃ tasmātsatāṃ sangatamīpsitavyam //

dṛḍhaṃ satāṃ saṅgataṃ cāpi nityaṃ brūyāccārthaṃ hyarthakṛcchreṣu dhīrāḥ /
mahārthavatsatpuruṣeṇa saṅgataṃ tasmātsantaṃ na jighāṃseta dhīraḥ //

indraḥ satāṃ sammataśca nivāsaśca mahātmanām /
satyavādī hyanindyaśca dharmavitsūkṣmaniścayaḥ //

tena te saha śakreṇa sandhirbhavatu nityadā /
evaṃ viśvāsamāgaccha mā te bhūdbuddhiranyathā //
śalya uvāca /

maharṣivacanaṃ śrutvā tānuvāca mahādyutiḥ /
avaśyaṃ bhagavanto me mānanīyāstapasvinaḥ //

bravīmi yadahaṃ devāstatsarvaṃ kriyate yadi /
tataḥ sarvaṃ kariṣyāmi yadūcurmāṃ divaukasaḥ //

na śuṣkeṇa na cādreṇa nāśmanā na ca dāruṇā /
na śastreṇa na cāstreṇa na divā na tathā niśi //

vadhyo bhaveyaṃ viprendrāḥ śakrasya saha daivataiḥ /
evaṃ me rocate sandhiḥ śakreṇa saha nityadā //

bāḍhamityeva ṛṣayastamūcurbharatarṣabha /
evaṃ vṛtte tu sandhāne vṛtraḥ pramudito'bhavat //

tataḥ sandhiṃ mithaḥ kṛtvā ṛṣayo dīptatejasaḥ /
śakrasya saha vṛtreṇa punarjagmuryathāgatam //

yuktaḥ sadā'bhavaccāpi śakro harṣasamanvitaḥ / vṛtrasya vadhasaṃyuktānupāyānanvacintayat // 5-10-34a abhisandhirmahendrasya sandhikarmaṇi yaḥ kṛtaḥ / ṛṣibhistvīritaṃ yacca mahendrastadanusmaran //

chidrānveṣī samudvignaḥ sadā vasati devarāṭ /
sa kadācinsamudrānte samapaśyanmahāsuram //

sandhyākāla upāvṛtte muhūrte cātidāruṇe /
tataḥ sañcintya bhagavānvaradānaṃ mahātmanaḥ //

sandhyeyaṃ vartate raudrā na rātrirdivasaṃ na ca /
vṛtraścāvaśyavadhyo'yaṃ mama sarvaharo ripuḥ //

yadi vṛtraṃ na hanmyadya vañcayitvā mahāsuram /
mahābalaṃ mahākāyaṃ na me śreyo bhaviṣyati //

evaṃ sañcintayanneva śakro viṣṇumanusmaran /
atha phenaṃ tadā'paśyat samudre parvatopamap //

nāyaṃ yuṣko na cādro'yaṃ na ca śastramidaṃ tathā /
enaṃ kṣepsyāmi vṛtrasya kṣaṇādeva naśiṣyati //

savajramatha phenaṃ taṃ kṣipraṃ vṛtre nisṛṣṭavān /
praviśya phenaṃ taṃ viṣṇuratha vṛtraṃ vyanāśayat //

nihate tu tato vṛtre diśo vitimirā'bhavan /
pravavau ca śivo vāyuḥ prajāśca jahṛṣustathā //

tato devāḥ sagandharvā yakṣarakṣomahoragāḥ /
ṛṣayaśca mahendraṃ tamastuvanvividhaiḥ stavaiḥ //

namaskṛtaḥ sarvabhūtaiḥ sarvabhūtānyasāntvayat /
hatvā śatruṃ prahṛṣṭātmā vāsavaḥ saha daivataiḥ //

viṣṇuṃ tribhuvanaśreṣṭhaṃ pūjayāmāsa dharmavit /
tato hate mahāvīrye vṛtre devabhayaṅkare //

anṛtenābhibhūto'bhūcchakraḥ paramadurmanāḥ /
traiśīrṣayā'bhibhūtaśca sa pūrvaṃ brahmahatyayā //

mahādevasya bhūtaiśca sa punarbrahmahā iti /
ākruṣṭo nirbhayairbhūyo vrīḍito balavṛtrahā //

so'ntamāśritya lokānāṃ naṣṭasañjño vicetanaḥ /
na prājñāyata devendrastvabhibhūtaḥ svakarmabhiḥ //

praticchanno'vasaccāpsu ceṣṭamāna ivoragaḥ /
tataḥ pranaṣṭe devendre brahmahatyā bhayārdite //

bhūmiḥ pradhvastasankāśā nirvṛkṣā śuṣkakānanā /
vicchinnasrotaso nadyaḥ sarāṃsyanudakāni ca //

sankṣobhaścāpi satvānāmanāvṛṣṭikṛto'bhavat /
devāścāpi bhṛśaṃ trastāstathā sarve maharṣayaḥ //

arājakaṃ jagatsarvamabhibhūtamupadravaiḥ /
tato bhītā'bhavandevāḥ ko no rājā bhavediti //

divi devarṣayaścāpi devarājavinākṛtāḥ /
na sma kaścana devānāṃ rājye vai kurute matim //