Mahabharata · Chapter 5.1

nārāyaṇaṃ namaskṛtya naraṃ caiva narottamam /
devīṃ sarasvatīṃ caiva tato jayamudīrayet //
vaiśampāyana uvāca /

kṛtvā vivāhaṃ tu kurupravīrā- stadā'bhimanyormuditāḥ sapakṣāḥ /
viśramya rātrāvuṣasi pratītāḥ sabhāṃ virāṭasya tato'bhijagmuḥ //

sabhā tu sā matsyapateḥ samṛddhā maṇipravekottamaratnacitrā /
nyastāsanā mālyavatī sugandhā tāmabhyayuste nararājavaryāḥ //

athāsanānyāviśatāṃ purastā- dubhau virāṭadrupadau narendrau /
vṛddhau ca mānyau pṛthivīpatīnāṃ pitrā samaṃ tamajanārdanau ca //

pāñcālarājasya samīpatastu śinipravīraḥ saharauhiṇeyaḥ
matsyasya rājñastu susannikṛṣṭau janārdanaścaiva yudhiṣṭhiraśca //

sutāśca sarve drupadasya rājño bhīmārjunau mādravatīsutau ca /
pradyumnasāmbau ca yudhi pravīrau virāṭaputraiśca sahābhimanyuḥ //

sarve ca śūrāḥ pitṛbhiḥ samānā vīryeṇa rūpeṇa balena caiva /
upāviśandraupadeyāḥ kumārāḥ suvarṇacitreṣu varāsaneṣu //

tathopaviṣṭeṣu mahāratheṣu virājamānābharaṇāmbareṣu
rarāja sā rājavatī samṛddhā grahairiva dyaurvimalairupetā //

tataḥ kathāste samavāyayuktāḥ kṛtvā vicitrāḥ puruṣapravīrāḥ /
tasthurmuhūrtaṃ paricintayantaḥ kṛṣṇaṃ nṛpāste samudīkṣamāṇāḥ //

kathāntamāsādya ca mādhavena sanghaṭṭitāḥ pāṇḍavakāryahetoḥ /
te rājasiṃhāḥ sahitā hyaśrṛṇva- nvākyaṃ mahārthaṃ sumahodayaṃ ca //
śrīkṛṣṇa uvāca /

sarvairbhavadbhirviditaṃ yathā'yaṃ yudhiṣṭhiraḥ saubalenākṣavatyām /
jito nikṛtyā'pahṛtaṃ ca rājyaṃ vanapravāse samayaḥ kṛtaśca //

śaktairvijetuṃ tarasā mahīṃ ca satye sthitaiḥ satyarathairyathāvat /
pāṇḍoḥ sutaistradrutamugrarūpaṃ varṣāṇi ṣaṭ sapta ca cīrṇamagryaiḥ //

trayodaśaścaiva sudustaro'ya- majñāyamānairbhavatāṃ samīpe /
kleśānasahyānvividhānsahadbhi- rmahātmabhiścāpi vane niviṣṭam / etaiḥ parapreṣyaniyogayuktai- ricchadbhirāptaṃ svakulena rājyam //

evaṃ gate dharmasutasya rājño duryodhanasyāpi ca yaddhitaṃ syāt /
taccintayadhvaṃ kurupāṇḍavānāṃ dharmyaṃ ca yuktaṃ ca yaśaskaraṃ ca //

adharmayuktaṃ na ca kāmayeta rājyaṃ surāṇāmapi dharmarājaḥ /
dharmārthayuktaṃ tu mahīpatitvaṃ grome'pi kasmiṃścidayaṃ bubhūṣet //

pitryaṃ hi rājyaṃ viditaṃ nṛpāṇāṃ yathā'pakṛṣṭaṃ dhṛtarāṣṭraputraiḥ /
mithyopacāreṇa yathā hyanena kṛcchraṃ mahatprāptamasahyarūpam //

na cāpi pārtho vijito raṇe taiḥ svatejasā dhṛtarāṣṭrasya putraiḥ /
tathā'pi rājā sahitaḥ suhṛdbhi- rabhīpsate'nāmayameva teṣām //

yattu svayaṃ pāṇḍusutairvijitya samāhṛtaṃ bhūmipatīnprapīḍya
tatprārthayante puruṣapravīrāḥ kuntīsutā mādravatīsutau ca //

balābhiyuktairvividhairupāyaiḥ samprārthitā hantumamitrasaṅghaiḥ /
rājyaṃ jihīrṣadbhirasadbhirugraiḥ sarvaṃ ca tadvo viditaṃ yathāvat //

teṣāṃ ca lobhaṃ prasamīkṣya vṛddhaṃ dharmajñatāṃ cāpi yudhiṣṭhirasya /
sambandhitāṃ cāpi samīkṣya teṣāṃ matiṃ kurudhvaṃ sahitāḥ pṛthakva /

ime ca satye'bhiratāḥ sadaiva taṃ pālayitvā samayaṃ yathāvat /
ato'nyathā tairupacaryamāṇā hanyuḥ sametāndhṛtarāṣṭraputrān //

tairviprakāraṃ ca niśamya kārye suhṛjjanāstānparivārayeyuḥ /
yuddhena bādheyurimāṃstathaivaṃ tairbādhyamānā yudhi tāṃśca hanyuḥ //

tathā'pi neme'lpatayā'samarthā- steṣāṃ jayāyeti bhavenmatirvaḥ /
sametya sarve sahitāḥ suhṛdbhi- steṣāṃ vināśāya yateyureva //

duryodhanasyāpi mataṃ yathāva- nna jñāyate kiṃ nu kariṣyatīti
ajñāyamāne ca mate parasya mantrasya pāraṃ kathamabhyupemaḥ //

tasmādito gacchatu dharmaśīlaḥ śuciḥ kulīnaḥ puruṣo'pramattaḥ /
dūtaḥ samarthaḥ praśamāya teṣāṃ rājyārdhadānāya yudhiṣṭhirasya //

niśamya vākyaṃ tu janārdanasya dharmārthayuktaṃ madhuraṃ samaṃ ca /
samādade vākyamathāgrajo'sya sampūjya vākyaṃ tadatīva rājan //