Mahabharata · Chapter 4.78

tatastrayodaśe varṣe nivṛtte pañca pāṇḍavāḥ /
upaplāvye virāṭasya vāsaṃ cakruḥ purottame //

dūtānmitreṣu sarveṣu jñātisambandhikeṣvapi /
preṣayāmāsa kaunteyo virāṭaśca mahīpatiḥ //

teṣu tatropaviṣṭeṣu preṣiteṣu tatastataḥ /
tatrāgamanmahābāhurvanamālī balānujaḥ //

tasminkāle niśamyātha dūtavākyaṃ janārdanaḥ / dayitaṃ svastriyaṃ putraṃ subhadrāyāḥ sumānitam /
abhimanyuṃ samādāya rāmeṇa sahitastadā //

sarvayādavamukhyaiśca saṃvṛtaḥ paravīrahā /
śaṅkhadundubhinirghoṣairvirāṭanagaraṃ yayau //

kṛtavarmā ca hārdikyo yuyudhānaśca sātyakiḥ / anādhṛṣṭistathā'krūraḥ sāmbo niśaṭha eva ca /
pradyumnaśca mahābāhurulmukaśca mahābalaḥ //

abhimanyumupādāya saha mātrā parantapāḥ /
kṛṣṇena sahitāḥ sarve pāṇḍavāndraṣṭumāgatāḥ //

indrasenādayaścaiva rathaistaiḥ susamāhitaiḥ /
upeyuḥ sahitāḥ sarve parisaṃvatsaroṣitāḥ //

daśanāgasahasrāṇi hayānāṃ dviguṇaṃ tathā /
rathānāṃ niyutaṃ pūrṇaṃ nikharvaṃ ca padātayaḥ //

vṛṣṇyandhakāśca śataśo bhojāśca paramaujasaḥ /
anyurvṛṣṇiśārdūlaṃ vāsudevaṃ mahābalam //

vāsudevaṃ tathā'yāntaṃ śrutvā pāṇḍusutāstadā /
mātsyena sahitāḥ sarve pratyudyātā janārdanam //

śaṅkhadundubhinirghoṣairmaṅgalaiśca janārdanam . vavandurmuditāḥ sarve pādayostasya pāṇḍavāḥ /
mātsyena sahitāḥ sarve ānandāśrupariplutāḥ //
pāṇḍavā ūcuḥ /

tava kṛṣṇa prasādādvai varṣāṇyetāni sarvaśaḥ /
trayodaśopi dāśārha yathā sa samayaḥ kṛtaḥ //

uṣitāḥ smo jagannātha tvaṃ nātho no janārdana /
rakṣasva devadeveśa tvāmārya śaraṇaṃ gatāḥ //
vaiśampāyana uvāca /

tānvandūmānānsahasā pariṣvajya janārdanaḥ /
virāṭasya sahāyāṃstānsarvayādavasaṃvṛtaḥ //

yathārhaṃ pūjayāmāsa mudā paramayā yutaḥ /
vṛṣṇivīrāśca tānsarvānyathārhaṃ pratipedire //

kṛṣṇā ca devakīputraṃ vavande pādayostathā / tāmudyamya sukeśāntāṃ nayane parimṛjya ca /
uvāca vākyaṃ deveśaḥ sarvayādavasannidhau //

mā śokaṃ kuru kalyāṇi dhārtarāṣṭrānsamāhitān /
acirāddhātayitvā'haṃ pārthena sahitaḥ kṣitim //

yudhiṣṭhirāya dāsyāmi yātu te mānaso jvaraḥ /
abhimanyunā ca pārthenaraukmiṇeyena te śape //

satyametadvaco mahyamavaihi tvamanindite / ityuktvā tāṃ visṛjyātha prīyamāṇo yudhiṣṭhiram /
anvāsta vṛṣṇiśārdūlaḥ saha vṛṣṇyandhakaistathā //

kāśirājaśca śaibyaśca bhajamānau yudhiṣṭhiram /
akṣauhiṇībhyāṃ sahitāvāgatau pṛthivīpatī //

akṣauhiṇībhiḥ pāñcālastisṛbhiśca mahābalaḥ /
draupadyāśca sutā vīrāḥ śikhaṇḍī cāparājitaḥ //

dhṛṣṭadyumnaśca durdharṣaḥ sarvaśastrabhṛtāṃvaraḥ /
upaplāvyaṃ yayuḥ śīghraṃ pāṇḍavārthe mahābalāḥ //

tataḥ śatasahasrāṇi prayutānyarbudāni ca /
samīpamabhivartante yodhā yaudhiṣṭhiraṃ balam //

samudramiva dharmānte srotaḥśreṣṭhāḥ pṛthakpṛthak / āpūrayanmahīpālā yajvāno bhūridakṣiṇaiḥ /
vedāvabhṛthasampannāḥ śūrāḥ sarve tanutyajaḥ //

tānāgatānabhiprekṣya pārtho jñānabhṛtāṃ varaḥ /
pūjayāmāsa vidhivadyathārhaṃ rājasattamān //

pāribarhaṃ dadau kṛṣṇaḥ pāṇḍavānāṃ mahātmanām /
striyo vāsāṃsi ratnāni pṛthakpṛthaganekaśaḥ //

rājāno rājaputrāśca nivṛtte samaye tathā / yathāṃrha pāṇḍavaśreṣṭhairavartantābhipūjitāḥ /
āsanprahṛṣṭamanasaḥ pāribarhaṃ dadustadā //

sarveṣu samaveteṣu rājabhirvṛṣṇibhiḥ saha /
vivāho vidhavadrājanvavṛdhe kurumātsyayoḥ //

tataḥ śaṅkhā mṛdaṅgāśca gomukhā ḍiṇḍimāstadā /
abhimanyorvivāhe tu nedurmātsyasya veśmani //

uccāvacānmṛgāñjaghnurmedhyāṃśca śataśastathā /
bhakṣyānnabhojyapānāni prabhūtānyabhyahārayan //

gāyanākhyānaśīlāśca naṭā vaitālikāstathā /
stuvantastānupātiṣṭhansūtāśca saha māgadhaiḥ //

striyo vṛddhāstaruṇyaśca utsave tasya maṅgale /
draupadyantaḥpure caiva virāṭasya gṛhe striyaḥ //

sudeṣṇāṃ tu puraskṛtya matsyānāmapi ca striyaḥ /
ājagmuścārupīnāṅgyaḥ sumṛṣṭamaṇikuṇḍalāḥ //

varṇopapannāstā nāryo rūpavantayaḥ svalankṛtāḥ /
sarvāsāmabhavatkṛṣṇā rūpeṇa vapuṣā'dhikā //

parivāryottarāṃ ślāghyāṃ rājaputrīmalankṛtām /
sutāmiva mahendrasya puraskṛtyopatasthire //

bhṛṅgāruṃ tu samādāya sauvarṇaṃ jalapūritam / pārthasya haste sahasā sutāmindīvarekṣaṇām /
snuṣārthaṃ prākṣipadvāri virāṭo vāhinīpatiḥ //

tāṃ pratyagṛhṇākaunteyaḥ sutasyārthe mahāmanāḥ /
saubhadrāścānavadyāṅgo virāṭatanayāṃ tadā //

tatrātiṣṭhadgṛhītvā tu rūpamindrāsya dhārayan /
snuṣāṃ tāṃ parigṛhṇānaḥ kuntīputro yudhiṣṭhiraḥ //

drupadaśca virāṭaśca śikhaṇḍī ca mahābalaḥ /
yuyudhānaśca śaibyaśca dhṛṣṭadyumnaśca sātyakiḥ //

saptaite'kṣauhiṇīpālā yajvāno bhūridakṣiṇāḥ /
pāṇḍavaṃ parivāryaite niveśaṃ cakrire tadā //

tatrasthāyāṃ tu senāyāṃ mātsyo dharmabhṛtāṃvaraḥ /
prīto duhitaraṃ gṛhya pradadāvabhimanyave //

pratigṛhyottarāṃ pārthaḥ puraskṛtya janārdanam /
vivāhaṃ kārayāmāsa saubhadrasya mahātmanaḥ //

tato vivāho vavṛdhe sphītaḥ sarvaguṇānvitaḥ /
saubhadrasyādbhutaṃ karma pitustava pitustadā //

dhaumyaḥ śiṣyaiḥ parivṛto juhāvāgnau vidhānataḥ /
agniṃ pradakṣiṇīkurvansaubhadraḥ pāṇimagrahīt //

tataḥ pārthāya saṃhṛṣṭo mātsyarājo dhanaṃ mahat /
tasmai śatasahasrāṇi hayānāṃ vātaraṃhasām //

dve ca nāgaśate mukhye dhanaṃ bahuvidhaṃ tadā /
prādānmātsyapatirhṛṣṭaḥ kanyādhanamanuttamam //

pāribarhaṃ ca pārthebhyaḥ pradadau matsyapuṅgavaḥ /
kṛṣṇena saha kaunteyaḥ pratyagṛhṇātprabhūtavat //

kṛte vivāhe tu tadā dharmaputro yudhiṣṭhiraḥ /
brāhmaṇebhyo dadau vittaṃ yadupāharadacyutaḥ //

gosahasrāṇi vastrāṇi ratnāni vividhāni ca /
bhūṣaṇāni ca sarvāṇi yānāni śayanāni ca //

nāgarānprītibhirdivyaistarpayāmāsa bhūpatiḥ //

tanmahotsavasankāśaṃ hṛṣṭapuṣṭajanākulam /
nagaraṃ matsyarājasya śuśubhe bharatarṣabha //

purohitairamātyaiśca paurairjānapadaiḥ saha / virāṭo nṛpatiḥ śrīmānsaubhadrāyābhimanyave /
tāṃ sutāmuttarāṃ dattvā mumude paramaṃ tadā //
janamejaya uvāca /

vṛtte vivāhe hṛṣṭātmā yaduvāca yudhiṣṭhiraḥ /
tatsarvaṃ kathayasveha kṛtavanto yaduttaram //