Mahabharata · Chapter 4.77

yacca vakṣyāmyahaṃ te'dya mā śaṅkethā yudhiṣṭhira / idaṃ sanagaraṃ rāṣṭraṃ sajanaṃ savadhūjanam /
yuṣyabhyaṃ sampradāsyāmi bhokṣyāmyucchiṣṭameva ca //

ahaṃ vaddhaściraṃ rājanbhuktabhogaściraṃ sukham /
rājyaṃ dattvā tu yuṣmabhyaṃ pravrajiṣyāmi kānanam //

uttarāṃ pratigṛhṇātu savyasācī dhanañjayaḥ /
ayaṃ hyaupayiko bhartā tasyāḥ puruṣasattamaḥ //
vaiśampāyana uvāca /

evamukto dharmarājaḥ pārthapaikṣadvanañjayam /
īkṣitaṃ cārjuno jñātvā mātsyaṃ vacanamabravīt //

vayaṃ vanāntarātprāptā na te rājyaṃ gṛhāmahe /
kintu duryodhanādīnāṃ rājñāṃ rājyaṃ gṛhāmahe //

pratigṛhṇāmyahaṃ rājansruṣaṃ duhitaraṃ tava /
yukto hyāvāṃ hi sambandho mātsyabhāratavaṃśayoḥ //
virāṭa uvāca /

kimarthaṃ pāṇḍavaśreṣṭha bhāryāṃ duhitaraṃ mama /
pratigrahītuṃ nemāṃ tvaṃ mayā dattamihecchasi //
arjuna uvāca /

antaḥpure'hamuṣitaḥ sadā paśyansutāṃ tava /
sahasyaṃ ca prakāśaṃ ca viśvastā pitṛvanmayi //

priyo bahumataścāhaṃ nartane gītavādite /
ācāryavacca māṃ nityaṃ manyate duhitā tava //

vayasyayā tayā rājansaha saṃvatsaroṣitaḥ /
atiśaṅkā tato'sthāne tava lokasya ca prabho //

tasmādāmantraye tvā'dya putrārthaṃ me viśāmpate /
suddhaṃ jitendriyaṃ manye tasyāḥ śuddhiḥ kṛtā mayā //

snuṣāyāṃ duhiturvāpi putre cātmani vā punaḥ /
atiśaṅkāṃ na paśyāmi tena śuddhirbhaviṣyati //

abhiṣaṅgādahaṃ bhīto mithyācārātparantapa /
sruṣārthamuttarāṃ rājanpratigṛhṇāmi te sutām //

svastrīyo vāsudevasya sākṣāddevasuto yathā /
dayitaścakrahastasya balavānastrakovidaḥ //

abhimanyurgahābāhuḥ putro mama viśāmpate /
jāmātā tava yukto vai bhartā ca duhitustava //
virāṭa uvāca /

upapannaṃ kuruśreṣṭhe kuntīputre dhanañjaye /
sadaiva dharmanityaśca jñātajñānaśca pāṇḍavaḥ //

yatkṛtyaṃ manyase pārtha kriyatāṃ tadanantaram /
sarve kāmāḥ samṛddhā me sambandhī yasya me'rjunaḥ //
vaiśampāyana uvāca /

evaṃ bruvati rājendre kuntīputro yudhiṣṭhiraḥ /
anvajānata sambandhaṃ samaye kṛṣṇamātsyayoḥ //

dūtānsarveṣu mitreṣu vāsudeve ca bhārata / preṣayāmāsa kaunteyo virāṭaśca mahīpatiḥ /

pratigṛhya snuṣārthaṃ vai darśayanvratamātmanaḥ /
śīlaśaucasamācāraṃ lokasyāvedya phalgunaḥ //

loke vikhyāpya māhātmyaṃ yaśaśca sa parantapaḥ /
kṛtārthaḥ śuciravyagrastuṣṭimānabhavattadā //
yudhiṣṭhira uvāca /

rājanprītosmi bhadraṃ te sakhā me'si parantapa /
sukhamadhyuṣitāḥ sarve ajñātāstvayi pārthiva //
vaiśampāyana uvāca /

virāṭanagare rājā dharmātmā saṃśitavrataḥ /
pūjitaścābhiṣiktaśca ratnaiśca śataśorcitaḥ //

tathā bruvantaṃ prasamīkṣya rājā paraṃ prahṛṣṭaḥ svajanena tena /
snehātpariṣvajya nṛpo bhujābhyāṃ dadau mahārthaṃ kurupāṇḍavānām //

yuddhātprayātāḥ kuravo hi mārge sametya sarve hitameva tatra /
ācāryaputraḥ śakuniśca rājā duryodhanaḥ sūtaputraśca karṇaḥ / sammantrya rājansahitāḥ samarthāḥ samādiśandūtamatho samagrāḥ //

yudhiṣṭhiraścāpi susangrahṛṣṭo duryodhanāddūtamapaśyadāgatam /
sa cābravīddharmarājaṃ sametya yudhiṣṭhiraṃ pāṇḍavamugravīryam //

dhanañjayenāsi punarvanāya pravrājitaḥ samaye tiṣṭha pārthaḥ /
trayodaśe hyeva kirīṭamālī saṃvatsare pāṇḍaveyo'dya dṛṣṭaḥ //
vaiśampāyana uvāca /

tato'bravīddharmasutaḥ prahasya kṣipraṃ gatvā brūhi suyodhanaṃ tam /
pitāmahaḥ śāntanavo bravītu pūrṇo na pūrṇo'dya trayodaśo naḥ //

saṃvatsarātte tu dhanañjayena viṣphāritaṃ gāṇḍivamājimadhye /
pūrṇo na pūrṇo na iti bravītu yadasya satyaṃ mama tatpramāṇam //

tenaivamuktaḥ sa nivṛtya dūto duryodhanaṃ prāpya śaśaṃsa tattvam //

sametya dūtena sa rājaputro duryodhano mantrayāmāsa tatra /
bhīṣmeṇa karṇena kṛpeṇa caiva droṇena bhūriśravasā ca sārdham //

sammantrya rātrau bahubhiḥ suhṛdbhi- rbhīṣmo'bravīddhārtarāṣṭraṃ mahātmā /
tīrṇapratijñena dhanañjayena viṣphāritaṃ gāṇḍivamājimadhye //
vaiśampāyana uvāca /

necchantyasatyena surendralokaṃ pāṇḍoḥ sutā brahmaṇaścāpi lokam /
tathyaṃ ca te pathyamahaṃ bravīmi svargyaṃ yaśasyaṃ paralokapathyam //

kuntīsutaistvaṃ samupaihi sandhiṃ bhuṅkṣva svarājyaṃ saha pāṇḍaveyaiḥ /
yudhyasva nocetsthirabuddhirājau kuntīsutairyadyapi rājyamiccheḥ //

āntaṃ na śakyaṃ kapaṭena bhoktuṃ rājyaṃ pareṣāṃ mahatāṃ balīnām /
jitvā śatrūnbhuṅkṣva rājyaṃ samagraṃ hato bhavānbhokṣyati vajrilokam //
vaiśampāyana uvāca /

tataḥ sa bhāgīrathisūnuvākyaṃ niśamya gāndhāritanūdbhavo nṛpaḥ /
uvāca bhīṣmaṃ pramukhe ca pitro- rmahīṃ na dadyāmaṇumātrikāmapi / nihanmi pāṇḍūdarasambhavānvā hatosmi tairvā suralokamemi //

te dhārtarāṣṭrāḥ samayaṃ niśamya tīrṇapratijñasya dhanañjayasya
sañcintya sarve sahitāḥ suhṛdbhiḥ sapārthivāḥ svāni gṛhāṇi jagmuḥ //