Mahabharata · Chapter 4.71

yuddhaṃ tu mānuṣaṃ draṣṭumāgatāstridaśāḥ purā /
kimakurvanta te paścātkathayasva mamānagha //
vaiśampāyana uvāca /

vāsavapramukhāḥ sarve devāḥ sarṣipurogamāḥ /
yakṣagandharvasaṅghāśca gaṇā apsarasāṃ tathā //

yuddhaṃ tu mānuṣaṃ dṛṣṭvā kurūṇāṃ phalgunasya ca /
ekasya ca bahūnāṃ ca raudramatyugradarśanam //

astrāṇāmatha divyānāṃ prayogānatha sangrahān /
laghu suṣṭhu ca citraṃ ca kṛtīnāṃ ca prayatnataḥ //

bhīṣmaṃ śāradvataṃ droṇaṃ karṇaṃ gāṇḍīvadhanvanā /
jitānanyānbhūmipālāndṛṣṭvā jagmurdivaukasaḥ //

sarve te parituṣṭāśca praśasya ca muhurmuhuḥ / asaṅgatinā tena vimānenāśugāminā /
pratijagmurasaṅgāste tridivaṃ ca divaukasaḥ //

[*kuravo nirjitāḥ sarve bhīṣmadroṇakṛpādayaḥ / ajayyāstridaśaiḥ sarvaiḥ sendraiḥ sarvaiḥ surāsuraiḥ /
pārthenaikena sangrāme vismayo no mahānaho //

kasminmuhūrte sañjātaḥ kasya dharmasya vā phalam //

kimāścaryaṃ phalgune'sminyo rudreṇa nyayodhayat /
nivātakavacānājau yastriṃśatkoṭisammitān //

tasya caitatkimāścaryaṃ stuvanta iti te surāḥ . jagmuḥ surālayaṃ hṛṣṭā vismayāviṣṭacetasaḥ // ]

kuravo'rjunabāṇaiśca tāḍitāḥ śaravikṣatāḥ /
kurūnabhimukhāṃ yātāḥ samagrabalavāhanāḥ //

virāṭanagarāccaiva gajāśvarathasankulāḥ /
yodhaiḥ kṣatriyadāyādairbalavadbhiradhiṣṭhitāḥ //

virāṭaprahitā senā nagarācchīghrayāyinī /
uttaraṃ saha sūtena pratyayāttamarindamam //

tasmiṃstūryaśatākīrṇe hastyaścarathasankule /
praharṣaḥ strīkumārāṇāṃ tumulaḥ samapadyata //

arjunastu tato dṛṣṭvā sainyareṇuṃ samutthitam /
sainyadhvajaṃ niśamyātha vairāṭiṃ samabhāṣata //

nagare tumulaḥ śabdo reṇuścākramate nabhaḥ /
kinnu khalvapayātāste kuravo nagaraṃ gatāḥ //

te caiva nirjitā'smābhirmaheṣvāsāḥ sutejasaḥ . āmuñca kavacaṃ vīra codayasva ca vājinaḥ /
javenābhiprapadyasva virāṭanagaraṃ prati //

na tāvattalanirghoṣaṃ gāṇḍīvasya ca nisvanam /
dhvajaṃ vā darśayiṣyāmi athavā svajano bhavet //
uttara uvāca /

senāgrametanmātsyānāṃ gaṇikāśca svalankṛtāḥ /
kanyā ratheṣu dṛśyante yodhā vividhavāsasaḥ //

uttarāmatra paśyāmi sakhībhiḥ parivāritām /
anīkinyaḥ pradṛśyante hastinośvāśca varmitāḥ //

rathinaśca padātāśca bahavo na ca śastriṇaḥ / virāṭavacanātsarve saṃhṛṣṭāḥ pratibhānti me /
na ca me'tra pratīghātaścittasya svajane yathā //
vaiśampāyana uvāca /

tataḥ śīghraṃ samāsādya uttaraṃ svajano bahu /
parasparamamitraghnaṃ sasvaje taṃ samāgatam //
janā ūcuḥ /

prītimānpuruṣavyāghro harṣayuktaḥ punaḥ punaḥ . diṣṭyā jayasi bhadraṃ te diṣṭyā sūto bṛhannalāḥ /
diṣṭyā sangrāmamāgamya bhayaṃ tava na kiñcana //
uttara uvāca /

ajaiṣīdeṣa jāñjiṣṇuḥ kurūnekaratho raṇe / etasyaka bāhuvīryaṃ tadyena gāvo jitā mayā /
kuravo nirjitā yasmātsagrāme'mitatejasaḥ //

akārṣīdeṣa tatkarma devaputropamo yuvā / eṣa tatpuruṣavyāghro vikṣobhya kurumaṇḍalam /
gāvaḥ prasahya vijitā raṇe māṃ cābhyapālayat //
vaiśampāyana uvāca /

uttarasya vacaḥ śrutvā śaṃsamānasya cārjunam /
coditā rājaputreṇa jayaṃ maṅgalavādinaḥ //

tato gandhaiśca mālyaiśca dhūpaiśca vasusambhṛtaiḥ /
kanyāḥ pārthamamitraghnaṃ kirantyaḥ samapūjayan //

āpūryamāṇo mālyaiśca gandhaiśca vividhaiḥ śubhaiḥ /
sampūjyamāno lokena nagaradvāramāgamat //

bheryaśca tūryāṇi ca veṇavaśca vicitraveṣāḥ pramadājanāśca /
puro virāṭasya mahābalasya niṣkramya bhūmiñjayamabhyanandanam //

praśasyamānastu jayena tatra putro virāṭasya na hṛṣyati sma /
sambhāṣyamāṇastu jayena tatra so'ntarmanāḥ pāṇḍavamīkṣamāṇaḥ //

putryai virāṭasya tato varāṇi vastrāṇyadātpāṇḍusutaḥ sakhībhyaḥ /
sabhājayaṃścāpi samāgatāstā dṛṣṭvā jayaṃ tacca balaṃ kumāryaḥ //