Mahabharata · Chapter 4.69

sa vijitya dhanaṃ cāpi virāṭo vāhinīpatiḥ /
prāviśannagaraṃ hṛṣṭaścaturbhiḥ saha pāṇḍavaiḥ //

jitvā trigartānsangrāme gāścaivānāyya kevalāḥ /
aśobhata mahārājaḥ saha pārthaiḥ śriyā vṛtaḥ //

tamāsanagata vīraṃ suhṛdāṃ prītivardhanam /
tapatasthuḥ prakṛtayaḥ samantādbrāhmaṇaiḥ saha //

sabhājitaḥ sabhāsadbhiḥ pratinandya sa matsyarāṭ /
visarjayāmāsa tadā dvijāṃśca prakṛtīstathā //

tataḥ sa rājā mātsyānāṃ virāṭo vāhinīpatiḥ / praviśyāntaḥpuraṃ ramyaṃ strīśatairupaśobhitam /
uttaraṃ tatra nāpaśyatkva yāta iti cābravīt //

ācakhyustatra saṃhṛṣṭāḥ striyaḥ kanyāśca veśmani /
antaḥpuracarāścaiva kurubhirgodhanaṃ hṛtam //

tāñjetumabhisaṃrabdha eka evātisāhasāt /
bṛhannalāsahāyaśca niryātaḥ pṛthivīñjayaḥ //

upayātānatirathāndroṇaṃ śāntanavaṃ kṛpam /
karṇaṃ duryodhanaṃ caiva droṇaputraṃ ca ṣaḍrathān //

tato virāṭaḥ paramābhitaptaḥ putraṃ niśamyaikarathena yātam /
bṛhannalāsārathimājimardanaṃ provāca sarvānatha mantrimukhyān //

gavāṃ śatasahasrāṇi ubhibhūya mamātmajam /
kusvaḥ kālayanti sma sarve yuddhaviśāradāḥ //

tasmādgacchatu me yodhā balena mahatā vṛtāḥ /
uttarasya parīpsārthaṃ ye trigartairavikṣatāḥ //
vaiśampāyana uvāca /

hayāṃśca nāgāṃśca rathāṃśca śīghraṃ vāditrasaṅghāṃśca tataḥ prabhūtān /
prasthāpayāmāsa sutasya heto- rvicitracitrābharaṇopapannān //

evaṃ sa rājā mātsyānāṃ mahānakṣohiṇīpatiḥ /
vyādideśātha sa kṣipraṃ vāhinīṃ caturaṅgiṇīm //

kumāramāśu jānīta yadi jīvati vā navā /
yasya yantā gataḥ ṣaṇḍo manye'haṃ sa na jīvati //

tamabravīddharmasuto virāṭa- mārtaṃ viditvā kurubhiḥ prataptam /
bṛhannalā sārathiścennarendra pare na neṣyanti tavādya gāśca //

sarvānmahīpānsahitānkurūṃśca tathaiva devāsuranāgayakṣān /
alaṃ vijetuṃ samare sutaste anuṣṭhitaḥ sārathinā hi tena //

sarvathā kuravaścāpi ye cānye vasudhādhipāḥ /
trigartānnirjitāñśrutvā na sthāsyanti kathañcana //
vaiśampāyana uvāca /

athottareṇa prahitā dūtāste śīghragāminaḥ /
virāṭanagaraṃ prāpya jayaṃ prāvedayaṃstadā //

rājānaṃ vṛtamācakhyurmantribhirjayamuttamam /
parājayaṃ kurūṇāṃ ca upāyāntaṃ tathottaram //

sarvā vinirjitā gāvaḥ kuravaśca parājitāḥ /
uttaraḥ saha sūtena kuśalī ca parantapaḥ //
kaṅka uvāca /

diṣṭyā te nirjitā gāvaḥ kuravaśca parājitāḥ /
diṣṭyā te vijayī putraḥ śrūyate pārthivarṣabhaḥ //

nādbhutaṃ tviha manye'haṃ yatte putro'jayatkurūn /
dhruva eva jayastasya yasya yantā bṛhannalā //

devendrasārathiścaiva mātaliḥ khyātavikramaḥ /
kṛṣṇasya sārathiścaiva na bṛhannalayā samau //
vaiśampāyana uvāca /

tato virāṭo nṛpatiḥ samprahṛṣṭatanūruha / śrutvā tu vijayaṃ tasya kumārasyāmitaujasaḥ /
santoṣayitvā dūtāṃstāndhanaratnaiśca sarvaśaḥ //

gate tvanujane tasmindūtavākyaṃ niśamya ca /
uttarasya jayātprīto virāṭaḥ pratyabhāṣata //

rājamārgāḥ kriyantāṃ vai patākābhiralankṛtāḥ /
puṣpopahārairarcyatāṃ devatāścāpi sarvaśaḥ //

kumārā yodhamukhyāśca gaṇikāśca svalankṛtāḥ /
vāditrāṇi ca sarvāṇi pratyudyāntu sutaṃ mama //

bhavantu te labdhajaye sute me paurāśca martyāśca pare ca nāryaḥ /
te śuklavastrāḥ prabhavantu mārge sugandhamālyābharaṇāśca nāryaḥ //

bhajantu sarvā gaṇikāḥ sutaṃ me nāryaśca kanyāḥ sahasainikāśca /
svalankṛtāstāḥ subhagāḥ suveṣāḥ putrasya panthānamanuvrajantu //

ghaṇṭāpaṇavakāḥ śīghraṃ mattamāruhya kuñjaram /
śṛṅgāṭakeṣu sarveṣu samākhyāntu jayaṃ mam //

uttarā ca kumārībhirbahvābharaṇabhūṣitā /
sakhīṃ vijitasangrāmāṃ pratyudyātu bṛhannalām //

śrutvā tu vacanaṃ tasya pārthivasya mahātmana /
tathaiva cakruḥ saṃhṛṣṭāḥ paurāḥ svastikapāṇayaḥ //

mūtāśca sarve sahamāgadhāśca hṛṣṭā virāṭasya pure janaughāḥ /
bheryaśca tūryāṇi ca vārijāśca vepaiḥ parārdhyaiḥ pramadājanāśca //

vandipravādāḥ paṇavādikāśca tathaiva vādyāni ca vaṃśaśabdāḥ /
kāṃsyaṃ satālaṃ madhuraṃ ca gīta- mādāya nāryo nagarānnirīyuḥ //

pratyudyayuḥ putramanantavīryaṃ te brāhmaṇāḥ śāntiparāḥ pradhānāḥ /
svādhyāyavedādhyayanakramajñāḥ svastikriyāgītajapapradhānāḥ //