Mahabharata · Chapter 4.60

taṃ pārthaḥ pratijagrāha vāyuvegamivācalaḥ /
śarajālena mahatā varṣamāṇa ivāmbudaḥ //

tayordevāsurasamaḥ sannipāto mahānabhūt /
kiratoḥ śarajālāni vṛtravāsavayoriva //

na sma sūryastadā bhāti na ca vāti samīraṇaḥ /
śaragāḍhe kṛte vyomni chāyābhūtamivābhavat //

mahāṃścaṭacaṭāśabdo yodhayoryudhyamānayoḥ /
dahyatāmiva veṇūnāmāsītparamadāruṇaḥ //

hayāṃstasyārjunaḥ saṅkhye kṛtavānalpatejasāḥ /
te rājanna prajānanti diśaṃ kāñcana mohitāḥ //

tato drauṇirmahāvīryaḥ pārthasya vicariṣyataḥ /
vivaraṃ sūkṣmamālokya jyāṃ nunoda kṣureṇa saḥ //

tadasyāpūjayandevāḥ karma dṛṣṭvā'timānuṣam /
na śakto'nyaḥ pumānsthātumṛte drauṇerdhanañjayam //

tato drauṇirdhanurvyasya vyapakramya nararṣabhaḥ . punarapyabhyahanpārthaṃ hṛdaye kaṅkapatribhiḥ /

tataḥ pārtho mahābāhuḥ prahasansvanavattadā /
yojayāmāsa ca tadā maurvyā gāṇḍīvamojasā //

taṃ dṛṣṭvā ṛddhamāyāntaṃ prabhinnamiva kuñjaram /
ṛddhaḥ samāhvayāmāsa drauṇiryuddhāya bhārata //

tato'rdhacandrapāhṛtya tena pārthaḥ samāhataḥ . ciccheda tasya cāpaṃ ca sūtaṃ cāśvaṃ ca tejasā /
vivyādha niśitaiścāpi śarairāśīvipopamaiḥ //

so'nyaṃ rathaṃ samāsthāya pratyāyādrathipuṅgavaḥ /
vāraṇeneva mattena matto vāraṇayūthapaḥ //

tataḥ pravavṛte yuddhaṃ pṛthivyāmekavīrayoḥ /
raṇamadhye dvayoreva sumahadromaharṣaṇam //

tau vīrau kuravaḥ sarve dadṛśurvismayānvitāḥ /
yudhyamānau mahātmānau dviradāviva sangatau //

tau samājaghnaturvīrau parasparajayaiṣiṇau /
śarai rāśīviṣākārairjvaladbhiriva pāvakaiḥ //

akṣayāviṣudhī divyau pāṇḍavasya mahātmanaḥ /
tena pārtho raṇe śūrastasthau giririvācalaḥ //

aśvatthāmnaḥ punarbāṇāḥ kṣipramabhyasyato raṇe /
jagmuḥ parikṣayaṃ śīghramabhūttenādhiko'rjunaḥ //