મહાભારત · અધ્યાય 4.60

તં પાર્થઃ પ્રતિજગ્રાહ વાયુવેગમિવાચલઃ ।
શરજાલેન મહતા વર્ષમાણ ઇવામ્બુદઃ ॥

તયોર્દેવાસુરસમઃ સન્નિપાતો મહાનભૂત્ ।
કિરતોઃ શરજાલાનિ વૃત્રવાસવયોરિવ ॥

ન સ્મ સૂર્યસ્તદા ભાતિ ન ચ વાતિ સમીરણઃ ।
શરગાઢે કૃતે વ્યોમ્નિ છાયાભૂતમિવાભવત્ ॥

મહાંશ્ચટચટાશબ્દો યોધયોર્યુધ્યમાનયોઃ ।
દહ્યતામિવ વેણૂનામાસીત્પરમદારુણઃ ॥

હયાંસ્તસ્યાર્જુનઃ સઙ્ખ્યે કૃતવાનલ્પતેજસાઃ ।
તે રાજન્ન પ્રજાનન્તિ દિશં કાઞ્ચન મોહિતાઃ ॥

તતો દ્રૌણિર્મહાવીર્યઃ પાર્થસ્ય વિચરિષ્યતઃ ।
વિવરં સૂક્ષ્મમાલોક્ય જ્યાં નુનોદ ક્ષુરેણ સઃ ॥

તદસ્યાપૂજયન્દેવાઃ કર્મ દૃષ્ટ્વાઽતિમાનુષમ્ ।
ન શક્તોઽન્યઃ પુમાન્સ્થાતુમૃતે દ્રૌણેર્ધનઞ્જયમ્ ॥

તતો દ્રૌણિર્ધનુર્વ્યસ્ય વ્યપક્રમ્ય નરર્ષભઃ . પુનરપ્યભ્યહન્પાર્થં હૃદયે કઙ્કપત્રિભિઃ ।

તતઃ પાર્થો મહાબાહુઃ પ્રહસન્સ્વનવત્તદા ।
યોજયામાસ ચ તદા મૌર્વ્યા ગાણ્ડીવમોજસા ॥

તં દૃષ્ટ્વા ઋદ્ધમાયાન્તં પ્રભિન્નમિવ કુઞ્જરમ્ ।
ઋદ્ધઃ સમાહ્વયામાસ દ્રૌણિર્યુદ્ધાય ભારત ॥

તતોઽર્ધચન્દ્રપાહૃત્ય તેન પાર્થઃ સમાહતઃ . ચિચ્છેદ તસ્ય ચાપં ચ સૂતં ચાશ્વં ચ તેજસા ।
વિવ્યાધ નિશિતૈશ્ચાપિ શરૈરાશીવિપોપમૈઃ ॥

સોઽન્યં રથં સમાસ્થાય પ્રત્યાયાદ્રથિપુઙ્ગવઃ ।
વારણેનેવ મત્તેન મત્તો વારણયૂથપઃ ॥

તતઃ પ્રવવૃતે યુદ્ધં પૃથિવ્યામેકવીરયોઃ ।
રણમધ્યે દ્વયોરેવ સુમહદ્રોમહર્ષણમ્ ॥

તૌ વીરૌ કુરવઃ સર્વે દદૃશુર્વિસ્મયાન્વિતાઃ ।
યુધ્યમાનૌ મહાત્માનૌ દ્વિરદાવિવ સન્ગતૌ ॥

તૌ સમાજઘ્નતુર્વીરૌ પરસ્પરજયૈષિણૌ ।
શરૈ રાશીવિષાકારૈર્જ્વલદ્ભિરિવ પાવકૈઃ ॥

અક્ષયાવિષુધી દિવ્યૌ પાણ્ડવસ્ય મહાત્મનઃ ।
તેન પાર્થો રણે શૂરસ્તસ્થૌ ગિરિરિવાચલઃ ॥

અશ્વત્થામ્નઃ પુનર્બાણાઃ ક્ષિપ્રમભ્યસ્યતો રણે ।
જગ્મુઃ પરિક્ષયં શીઘ્રમભૂત્તેનાધિકોઽર્જુનઃ ॥