Mahabharata · Chapter 4.48

sarvānāyuṣmato bhītānsantrastāniva lakṣaye /
ayuddhamanasaścaiva sarvāṃścaivānavasthitān //

yadyeṣa jāmadagnyo vā yadi vendraḥ purandaraḥ . vāsudevena sahito yadi bībhatsurāgataḥ /
ahamenaṃ nirotsyāmi veleva varuṇālayam //

rukmapuṅkhāḥ prasannāgrā muktā hastavatā mayā /
chādayantu śāraḥ sūryaṃ pārthasyāyurnirodhakāḥ //

mama cāpapramuktānāṃ śarāṇāṃ nataparvaṇām /
nivṛttirgacchatāṃ nāsti sarpāṇāṃ śvasatāmiva //

śarāṇāṃ puṅkhasaktānāṃ maurvyā'bhihatayorbhṛśam /
śrūyate talayoḥ śabdo bheryorāhatayoriva //

ekaikaṃ caturaḥ pañca kvacitpaṣṭiṃ kvacicchatam /
hatānpaśyata mātsyānāmiṣubhirnihatānrathān //

madbāhumuktairiṣubhistailadhautaiḥ patatribhiḥ /
khadyotairiva sampṛktamantarikṣaṃ virājatām //

dhvajāgrādvānarastasya bhallenābhihato mayā /
adyaiva patatāṃ bhūmau vinadanbhairavānravān //

śatrormayābhipannānāṃ bhūtānāṃ dhvajavāsinām /
diśaḥ pratiṣṭhamānānāmastu śabdo divaṃ gataḥ //

kruddhenāstraṃ mayā muktaṃ nirdahetpṛthivīmimām /
sthitaṃ sangrāmaśirasi pārthamekākinaṃ kimu //

samāhitaśca bībhatsurvarṣāṇyaṣṭau ca pañca ca /
jātasnehaśca yuddhasya mayi sandarśayiṣyati //

pātrībhūtastu kaunteyo brāhmaṇo guṇavāniva /
śaramālāṃ sa gṛhṇātu matprasṛṣṭāṃ svadhāmiva //

eṣa cāpi maheṣvāsastriṣu lokeṣu viśrutaḥ /
ahaṃ cāpi naraśreṣṭhādarjunānnāvamaḥ kvacit //

mama hastapramuktānāṃ śarāṇāṃ nataparvaṇām /
nivṛttirgacchatāṃ nāsti vaiśvānaraśikhārciṣām //

itaścetaśca muktānāṃ śarāṇāṃ nataparvaṇām /
tugulaḥ śrūyatāṃ nādaḥ ṣaṭpadāṃ gāyatāmiva //

antarā sampatadbhistu gṛdhrapatraiḥ śilāśitaiḥ /
śalabhānāmivākāśe chāyā samprati dṛśyatām //

adya matkārmukotsṛṣṭāḥ śitāḥ pārthasya marmagāḥ /
śarīramupasarpantu valmīkamiva pannagāḥ //

barhibarhiṇarājānāṃ barhiṇāṃ barhiṇāmiva /
patatāṃ patatāṃ ghoṣaḥ patatāṃ patatāmiva //

adya tvahamṛṇānmokṣye yanmayā tatpratiśrutam /
dhārtarāṣṭrasya tatkāle nihatya samare'rjunam //

indrāśanisamasparśaṃ mahendrasamavikramam /
ardayiṣyāmyahaṃ pārthamulkābhiriva kuñjaram //

śarajālamahājvālamasiśaktigadendhanam /
nirdahantamanīkāni śamayiṣye'rjunānalam //

rathādatirathaṃ loke sarvaśastrabhṛtāṃvaram /
vivaśaṃ pārthamādāsye garutmāniva pannagam //

kṣudrakairvividhairbhallairnipatadbhiśca māmakaiḥ /
sammūḍhacetāḥ kaunteyaḥ kartavyaṃ nābhipadyatām //

adya duryodhanasyāhaṃ śokaṃ hṛdi ciraṃ sthitam /
samūlamapaneṣyāmi haranpārthaśiraḥ śaraiḥ //

adya matkārmukotsṛṣṭairbhallaiśca nataparvabhiḥ / hatāśvaṃ virathaṃ pārthaṃ pauruṣe paryavasthitam /
niśvasantaṃ yathā nāgamadya paśyantu kauravāḥ //

jāmadagnyānmayā labdhaṃ divyāsramṛṣisattamāt /
tadupāśritya vīryaṃ ca yudhyeyamapi vāsavam //

dhvajāgre vānarastiṣṭhanbhallena nihato mayā /
adyaiva patatāṃ bhūmau vinadanbhairavānravān //

kāmaṃ gacchantu kuravo gāḥ pragṛhya parantapāḥ /
ratheṣu vā'pi tiṣṭhanto yuddhaṃ paśyantu māmakam //