મહાભારત · અધ્યાય 4.48

સર્વાનાયુષ્મતો ભીતાન્સન્ત્રસ્તાનિવ લક્ષયે ।
અયુદ્ધમનસશ્ચૈવ સર્વાંશ્ચૈવાનવસ્થિતાન્ ॥

યદ્યેષ જામદગ્ન્યો વા યદિ વેન્દ્રઃ પુરન્દરઃ . વાસુદેવેન સહિતો યદિ બીભત્સુરાગતઃ ।
અહમેનં નિરોત્સ્યામિ વેલેવ વરુણાલયમ્ ॥

રુક્મપુઙ્ખાઃ પ્રસન્નાગ્રા મુક્તા હસ્તવતા મયા ।
છાદયન્તુ શારઃ સૂર્યં પાર્થસ્યાયુર્નિરોધકાઃ ॥

મમ ચાપપ્રમુક્તાનાં શરાણાં નતપર્વણામ્ ।
નિવૃત્તિર્ગચ્છતાં નાસ્તિ સર્પાણાં શ્વસતામિવ ॥

શરાણાં પુઙ્ખસક્તાનાં મૌર્વ્યાઽભિહતયોર્ભૃશમ્ ।
શ્રૂયતે તલયોઃ શબ્દો ભેર્યોરાહતયોરિવ ॥

એકૈકં ચતુરઃ પઞ્ચ ક્વચિત્પષ્ટિં ક્વચિચ્છતમ્ ।
હતાન્પશ્યત માત્સ્યાનામિષુભિર્નિહતાન્રથાન્ ॥

મદ્બાહુમુક્તૈરિષુભિસ્તૈલધૌતૈઃ પતત્રિભિઃ ।
ખદ્યોતૈરિવ સમ્પૃક્તમન્તરિક્ષં વિરાજતામ્ ॥

ધ્વજાગ્રાદ્વાનરસ્તસ્ય ભલ્લેનાભિહતો મયા ।
અદ્યૈવ પતતાં ભૂમૌ વિનદન્ભૈરવાન્રવાન્ ॥

શત્રોર્મયાભિપન્નાનાં ભૂતાનાં ધ્વજવાસિનામ્ ।
દિશઃ પ્રતિષ્ઠમાનાનામસ્તુ શબ્દો દિવં ગતઃ ॥

ક્રુદ્ધેનાસ્ત્રં મયા મુક્તં નિર્દહેત્પૃથિવીમિમામ્ ।
સ્થિતં સન્ગ્રામશિરસિ પાર્થમેકાકિનં કિમુ ॥

સમાહિતશ્ચ બીભત્સુર્વર્ષાણ્યષ્ટૌ ચ પઞ્ચ ચ ।
જાતસ્નેહશ્ચ યુદ્ધસ્ય મયિ સન્દર્શયિષ્યતિ ॥

પાત્રીભૂતસ્તુ કૌન્તેયો બ્રાહ્મણો ગુણવાનિવ ।
શરમાલાં સ ગૃહ્ણાતુ મત્પ્રસૃષ્ટાં સ્વધામિવ ॥

એષ ચાપિ મહેષ્વાસસ્ત્રિષુ લોકેષુ વિશ્રુતઃ ।
અહં ચાપિ નરશ્રેષ્ઠાદર્જુનાન્નાવમઃ ક્વચિત્ ॥

મમ હસ્તપ્રમુક્તાનાં શરાણાં નતપર્વણામ્ ।
નિવૃત્તિર્ગચ્છતાં નાસ્તિ વૈશ્વાનરશિખાર્ચિષામ્ ॥

ઇતશ્ચેતશ્ચ મુક્તાનાં શરાણાં નતપર્વણામ્ ।
તુગુલઃ શ્રૂયતાં નાદઃ ષટ્પદાં ગાયતામિવ ॥

અન્તરા સમ્પતદ્ભિસ્તુ ગૃધ્રપત્રૈઃ શિલાશિતૈઃ ।
શલભાનામિવાકાશે છાયા સમ્પ્રતિ દૃશ્યતામ્ ॥

અદ્ય મત્કાર્મુકોત્સૃષ્ટાઃ શિતાઃ પાર્થસ્ય મર્મગાઃ ।
શરીરમુપસર્પન્તુ વલ્મીકમિવ પન્નગાઃ ॥

બર્હિબર્હિણરાજાનાં બર્હિણાં બર્હિણામિવ ।
પતતાં પતતાં ઘોષઃ પતતાં પતતામિવ ॥

અદ્ય ત્વહમૃણાન્મોક્ષ્યે યન્મયા તત્પ્રતિશ્રુતમ્ ।
ધાર્તરાષ્ટ્રસ્ય તત્કાલે નિહત્ય સમરેઽર્જુનમ્ ॥

ઇન્દ્રાશનિસમસ્પર્શં મહેન્દ્રસમવિક્રમમ્ ।
અર્દયિષ્યામ્યહં પાર્થમુલ્કાભિરિવ કુઞ્જરમ્ ॥

શરજાલમહાજ્વાલમસિશક્તિગદેન્ધનમ્ ।
નિર્દહન્તમનીકાનિ શમયિષ્યેઽર્જુનાનલમ્ ॥

રથાદતિરથં લોકે સર્વશસ્ત્રભૃતાંવરમ્ ।
વિવશં પાર્થમાદાસ્યે ગરુત્માનિવ પન્નગમ્ ॥

ક્ષુદ્રકૈર્વિવિધૈર્ભલ્લૈર્નિપતદ્ભિશ્ચ મામકૈઃ ।
સમ્મૂઢચેતાઃ કૌન્તેયઃ કર્તવ્યં નાભિપદ્યતામ્ ॥

અદ્ય દુર્યોધનસ્યાહં શોકં હૃદિ ચિરં સ્થિતમ્ ।
સમૂલમપનેષ્યામિ હરન્પાર્થશિરઃ શરૈઃ ॥

અદ્ય મત્કાર્મુકોત્સૃષ્ટૈર્ભલ્લૈશ્ચ નતપર્વભિઃ । હતાશ્વં વિરથં પાર્થં પૌરુષે પર્યવસ્થિતમ્ ।
નિશ્વસન્તં યથા નાગમદ્ય પશ્યન્તુ કૌરવાઃ ॥

જામદગ્ન્યાન્મયા લબ્ધં દિવ્યાસ્રમૃષિસત્તમાત્ ।
તદુપાશ્રિત્ય વીર્યં ચ યુધ્યેયમપિ વાસવમ્ ॥

ધ્વજાગ્રે વાનરસ્તિષ્ઠન્ભલ્લેન નિહતો મયા ।
અદ્યૈવ પતતાં ભૂમૌ વિનદન્ભૈરવાન્રવાન્ ॥

કામં ગચ્છન્તુ કુરવો ગાઃ પ્રગૃહ્ય પરન્તપાઃ ।
રથેષુ વાઽપિ તિષ્ઠન્તો યુદ્ધં પશ્યન્તુ મામકમ્ ॥