Mahabharata · Chapter 4.49

tasya tadvacanaṃ śrutvā nītiśāstraviśāradaḥ /
ācāryaḥ kuruvīrāṇāṃ kṛpaḥ śāradvato'bravīt //

sadaiva tava rādheya yuddhe krūratarā matiḥ /
nārthānāṃ prakṛtiṃ vetsi nānubandhamavekṣase //

nayā hi bahavaḥ santi śāstrāṇyāśritya cintitāḥ /
teṣāṃ yuddhaṃ supāpiṣṭhaṃ vedayanti purāvidaḥ //

deśakālena saṃyuktaṃ yuddhaṃ vijayadaṃ bhavet /
hīnakālaṃ tadeveha anarthāyopakalpate //

deśe kāle ca vikrāntaṃ kalyāṇāya vidhīyate /
ānukūlyena kāryāṇāmuttaraṃ tu vidhīyate //

bhāraṃ hi rathakārasya na vyavasyanti paṇḍitāḥ /
paricintya tu pārthena sannipāto na naḥ kṣamaḥ //

eko hi śatrūnsamare samarthaḥ pratibādhitum /
ekaḥ kurūnabhyarakṣadekaścāgnimatarpayat //

ekaśca pañca varṣāṇi brahmacaryamadhārayat /
ekaḥ subhadrāmāropya dvairathe kṛṣṇamāhvayam //

saindhavaṃ vanavāse tu jitvā kṛṣṇāmathānayat /
ekaśca pañca varṣāṇi śakrādasrāṇyaśikṣata //

ekaḥ sapatnāñjitvā tu kurūṇāmakarodyaśaḥ . eko gandharvarājānaṃ citrasenamarindamaḥ /
vijigye tarasā saṅkhye senāṃ cāsya sudurjayām //

pāñcālī śrīmatī prāptā kṣatraṃ jitvā svayaṃvare /
ādāya gatavānpārtho bhavānkvanu gatastadā //

tathā nivātakavacāḥ kālakeyāśca dānavāḥ /
daivatairapyavadhyāste ekena yudhi pātitāḥ //

ekena hi tvayā karṇa kiṃ nāmeha kṛtaṃ purā /
ekaikena yathā teṣāṃ bhūmipālā vaśe kṛtāḥ //

indropi hi na pārthena saṃyuge yoddhumarhati /
yastenāśaṃsate yoddhuṃ kartavyaṃ tasya bheṣajam //

āśīviṣasya kruddhasya pāṇimudyamya dakṣiṇam /
avamucya pradeśinyā daṃṣṭrāmādātumicchasi //

athavā kuñjaraṃ mattamekamekacaraṃ vane /
niraṅkuśaṃ samāruhya nagaraṃ yātumicchasi //

samiddhaṃ pāvakaṃ cāpi ghṛtamedovasāhutam /
ghṛtāktaścīravāsāstvaṃ madhyenotsartumicchasi //

ātmānaṃ yaḥ samābadhya kaṇṭhe baddhvā tathā śilām /
samudraṃ pratareddorbhyāṃ tatra kiṃ karṇa pauruṣam //

akṛtāstraḥ kṛtāstraṃ vai balavantaṃ sudurbalaḥ /
tādṛśaṃ karṇa yaḥ pārthaṃ yoddhumicchetsa durmatiḥ //

asmābhireva nikṛto varṣāṇīha trayodaśa /
siṃhaḥ pāśavinirmukto na naḥ śeṣaṃ kariṣyati //

ekānte pārthamāsīnaṃ kūpe'gnimiva saṃvṛtam /
ajñānādabhyavaskandya prāptāḥ smo bhayamuttamam //

utsṛṣṭaṃ tūlarāśau tu eko'gniṃ śamayetkatham /
saha yuddhyāmahe pārthamāgataṃ yuddhadurmadam //

yattā vayaṃ parākrāntā vyūḍhānīkāḥ prahāriṇaḥ /
yuddhāyāvasthitaṃ pārthamāgataṃ pākaśāsanim //

yattāḥ sarve rathaśreṣṭhaṃ parivārya samantataḥ /
ṣaḍrathāḥ parikīryantāṃ vajrapāṇimivāsurāḥ //

droṇo duryodhano bhīṣmo bhavāndrauṇistathā vayam /
sarve yuddhyāmahe pārthaṃ karṇa mā sāhasaṃ kṛthāḥ //

na hyasangatya samare pārthaṃ jeṣyāmahe vayam /
sangatya samare pārthaṃ sarve jeṣyamāhe vayam // 26 //