Mahabharata · Chapter 4.44

tataḥ pārthaṃ sa vairāṭiḥ prāñjalistvabhyavādayat /
ahaṃ bhūmiñjayo nāma praṇatosmi dhanañjaya //

diṣṭyā tvāṃ pārtha paśyāmi svāgataṃ te dhanañjaya /
lohitākṣa mahābāho nāgarājavaropama //

yadajñānādavocaṃ tvāṃ pramādena narottama /
akṛtvā hṛdaye sarvaṃ kṣantumarhasi tanmama //

yatastvayā kṛtaṃ pūrvaṃ citraṃ karma suduṣkaram /
ato bhayaṃ vyapetaṃ me prītiśca paramā tvayi //

dāso'haṃ te bhaviṣyāmi paśya māmanukampayā //

yā pratijñā kṛtā pūrvaṃ tava sārathyakāraṇāt /
seyaṃ pratijñā pūrṇā me harṣaścārjuna jāyate //

devendratanayasyeha sārathiḥ syāṃ mahāmṛdhe /
iti pūrvaṃ kṛtā'smābhiḥ pratijñā yuddhadurmada //

pratijñā mama sampūrṇā tava sārathyakāraṇāt /
manassvāsthyaṃ ca me jātaṃ jātaṃ bhāgyaṃ ca me mahat //

āsthāya vipulaṃ vīra rathaṃ sārathinā mayā /
duryodhanaṃ ca jitvā'jau nivartaya paśūnmama //
arjuna uvāca /

prītosmi rājaputrādya na bhayaṃ vidyate tava /
sarvānnudāmi te śatrūnraṇe raṇaviśārada //

svastho bhava mahānyuddhe paśya māṃ śatrubhiḥ saha /
yudhyamānaṃ vimarde'sminkurvāṇaṃ bhairavaṃ ravam //

gāṇḍīvaṃ devadattaṃ ca śarānkanakabhūṣaṇān / etānsarvānupāsaṅgānkṣipraṃ badhnīhi me rathe /
ekaṃ cāhara nistriṃśaṃ jātarūpapariṣkṛtam //

ahaṃ vai kurubhiryotsye mokṣayiṣyāmi te paśūn /
toṣayiṣyāmi rājānaṃ pravekṣyāmi puraṃ punaḥ //

sankalpāgādhaparidhaṃ bāhuprākāratoraṇam /
tridaṇḍatūṇasambādhaṃ naikadhvajasamākulam //

jyākṣepaninadārāvaṃ nemīninadadundubhiḥ . śarajālavitānāḍhyamākṣveḍitamahāsvanam /
nagaraṃ te mayā guptaṃ rathopasthaṃ bhaviṣyati //

adhiṣṭhito mayā saṅkhye ratho gāṇḍīvadhanvinā /
ajayyaḥ śatrusainyānāṃ vairāṭe vyetu te bhayam //
uttara uvāca /

bahunā kiṃ pralāpena śṛṇu me paramaṃ vacaḥ /
nāhaṃ bibhemi kaunteya sākṣādapi śatakratoḥ //

yamavāyukuberebhyo droṇabhīṣmaśatādapi . bibhemi nāhametebhyo jānāmi tvāṃ sthiraṃ yudhi /
keśavenāpi sangrāme sākṣādindreṇa vā samam //

idaṃ tu cintayanneva parimuhyāmi kevalam /
niścayaṃ nādhigacchāmi nāvagacchāmi kiñcana //

evaṃ varāṅgarūpasya lakṣaṇaiḥ sūcitasya ca /
kena karmavipākena klībatvaṃ tvāmupāgatam //

manye tvāṃ klībarūpeṇa carantaṃ śūlapāṇinam /
gandharvarājapratimaṃ devaṃ vā'pi śatakratum //
arjuna uvāca /

bhrāturniyogāñjyeṣṭhasya saṃvatsaramidaṃ vratam /
carāmi brahmacaryaṃ vai satyametadbravīmi te //

nāsmi klībo mahābāho paravāndharmasaṃyutaḥ /
urvaśīśāpasambhūtaṃ klaibyaṃ samupasaṃsthitam //

purā'hamājñayā bhrāturjyeṣṭhasyāsmi surālayam /
prāptavānurvaśī dṛṣṭā sudharmāyāṃ mayā tadā //

nṛtyantīṃ paramaṃ rūpaṃ bibhratīṃ vajrisannidhau /
apaśyaṃ tāmanimiṣaṃ kūṭasthāmanvayasya me //

rātrau samāgatā mahyaṃ śayanaṃ rantumicchayā /
ahaṃ tāmabhivādyaiva mātṛsatkāramācaram //

sā ca māmaśapatkruddhā śikhaṇḍī tvaṃ bhaveti vai /
śrutvā tamindro māmāha mā bhaistvaṃ pārtha ṣaṇḍatā //

upakāro bhavettubhyamajñātavasatau purā /
itīndro māmanugrāhya tataḥ preṣitavānvṛṣā //

tadidaṃ samanuprāptaṃ vrataṃ cīrṇaṃ mayā'nagha /
samāptavratamuttīrṇaṃ viddhi māṃ tvaṃ nṛpātmaja //
uttara uvāca /

paramo'nugraho me'dya yatpratarko na me vṛthā /
na hīdṛśāḥ klībarūpā bhavanti tu narottamāḥ //

sahāyavānasmi raṇe yuddhyeyamamarairapi /
sādhvasaṃ tatpranaṣṭaṃ me kiṃ karomi bravīhi me //

ahaṃ te sangrahīṣyāmi hayāñśatrunirbahaṇa /
śikṣito hyasmi sārathye niṣṭhitaḥ puruṣarṣabha //

dāruko vāsudevasya yathā śakrasya mātaliḥ /
tathā māṃ viddhi sārathye śikṣitaṃ narapuṅgava //

aśvā hyete mahābāho tavaivāhavadurjayāḥ /
yogyā rathavare yuktāḥ prāṇavanto jitaśramāḥ //

yasya yātena paśyanti bhūmau kṣiptaṃ padampadam /
dakṣiṇāṃ yo dhuraṃ voḍhā sugrīvoṇa samo hayaḥ //

yo'yaṃ hayo dhuryavaro vāmāṃ vahati śobhanaḥ /
taṃ manye meghapuṣpasya javena sadṛśaṃ hayam //

yo'yaṃ vahati vai pārṣṇiṃ dakṣiṇāmañcitodyataḥ /
valāhakādabhimatastejasā vīryavattaraḥ //

yo'yaṃ kāñcanasannāho vāmaṃ vahati śobhanaḥ /
dhuryaṃ śaibyasya taṃ manye javena balavattaram //

tvāmevāyaṃ ratho voḍhuṃ sangrāme'rhati dhanvinam . tvaṃ ce // rathamāsthāya yoddhumarho mato mama /
śarvaśatrubhirāyāto devarāja ivāsuraiḥ //
vaiśampāyana uvāca /

tato rathādavaskandya vīryavānarimardanaḥ /
praṇamya devāngāṇḍīvamādāya ruruce śriyā //

tato vimucya bāhubhyāṃ saṅkhacūḍāni pāṇḍavaḥ /
tau ca dundubhisannādau pratibaddhya talāvubhau //

indradatte ca te divye uddhṛtyāmucya kuṇḍale /
ślakṣṇānkeśānmṛdūnsnigdhāñśvetenodgrathya vāsasā //

athāsau prāṅmukho bhūtvā śuciḥ prayatamānasaḥ /
abhidadhyau mahābāhuḥ sarvāstrāṇi rathottame //

ūcuśca pārthaṃ sarvāṇi prāñjalīni nṛpātmajam /
imāni smo mahodāra kiṅkarāṇīndranandana //

praṇipatya tataḥ pārthaḥ samālabhya ca pāṇinā /
sarvāṇi mānasānīha bhavatetyabhyabhāṣata //

pratigṛhya tato'strāṇi prahlaṣṭavadano'bhavat /
adhijyaṃ tarasā kṛtvā gāṇḍīvaṃ vyākṣipaddhanuḥ //

tasya vikṣipyamāṇasya dhanuṣo'bhūnmahāsvanaḥ /
yathā śailasya mahataḥ śailānākṣipya jaghruṣaḥ //

sanirghātā'bhavadbhūmirdikṣu vāyurvavau bhṛśam /
bhrāntadvijaṃ khamabhavatprākampanta mahādrumāḥ //

taṃ śabdaṃ kuravo rājanvisphoṭamaśaneriva /
tārkṣyaṃ śabdamiva śrutvā vitresurdīnamānasāḥ //

yathendro vyākṣipadbhīmaṃ visphoṭamaśanerbhuvi /
tathā'rjuno dhanuḥśreṣṭhaṃ bāhubhyāmākṣipadbalī //

mahāśanimahāśabdasadṛśo jyāsvano mahān /
śatrūnvīrāṃśca santarjya nigrahastho rathe sthitaḥ //
uttara uvāca /

ekastvaṃ pāṇḍavaśreṣṭha bahūnotānmahārathān /
kathaṃ jeṣyasi sangrāme sarvaśastrāstrapāragān //

asahāyo.si konteya sasahāyāśca kauravāḥ /
ata eva mahābāho bhītastiṣṭhāmi te'grataḥ //
vaiśampāyana uvāca /

uvāca pārtho mā bhaiṣīḥ prahasya svanavattadā //

yudhyamānasya me vīra gandharvaiḥ sumahābalaiḥ /
sahāyo ghoṣayātrāyāṃ kastadāsītsakhā mama //

tathā pratibhaye tasmindevadānavasankule /
khāṇḍave yudhyamānasya kastadāsītsakhā mama //

nivātakavacaiḥ sārdhaṃ paulomaiśca mahābalaiḥ /
yudhyato devarājārthe kaḥ sahāyastadā'bhavat //

svayaṃvare tu pāñcālyā rājabhiḥ saha saṃyuge /
yudhyato bahubhistāta kaḥ sahāyastadā'bhavat //

upajīvya guruṃ droṇaṃ śukraṃ vaiśravaṇaṃ yamam / varuṇaṃ pāvakaṃ caiva kṛpaṃ kṛṣṇaṃ ca mādhavam /
pinākapāṇinaṃ caiva kathametānna yodhaye //

rathaṃ vāhaya me śīghraṃ vyetu te mānaso jvaraḥ //