Mahabharata · Chapter 4.45

uttaraṃ sāṃrathiṃ kṛtvā śamīṃ kṛtvā pradakṣiṇam /
āyudhaṃ sarvamādāya tataḥ prāyāddhanañjayaḥ //

dhvajaṃ ca siṃhaṃ mātsyasya bhrātṝṇāmāyudhāni ca /
praṇidhāya śamīmadhye prayātumupacakrame //

tataḥ kāñcanalāṅgūlaṃ dhvajaṃ vānaralakṣaṇam . divyaṃ māyāmayaṃ yuktaṃ vihitaṃ viśvakarmaṇā /
manasā cintayāmāsa prasādaṃ pāvakasya ca //

sa ca taccintitaṃ jñātvā dhvaje bhūtānyayojayat /
rathe vānaramucchritya gāṇḍīvaṃ vyākṣipaddhanuḥ //

sapatākaṃ vicitrāṅgaṃ sopāsaṅgaṃ mahābalam /
khātpapāta rathe tūrṇaṃ divyarūpaṃ manoramam //

rathamāsthāya bībhatsuḥ kaunteyaḥ śvetavāhanaḥ / baddhāsiḥ satalatrāṇaḥ pragṛhītaśarāsanaḥ /
tataḥ prāyādudīcīṃ sa kapipravaraketanaḥ //

sainyābhyāśaṃ sa samprāpya gṛhītvā śaṅkhamuttamam . svanavantaṃ mahāśabdaṃ devadattaṃ dhanañjayaḥ /
śaśāṅkarūpaṃ bībhatsuḥ prādhmāpayadarindamaḥ //

[ śaśāṅkakundadhavalaṃ mukhe nikṣipya vāsaviḥ /
ucchvasadgaṇḍayugalaṃ sirālyācitaphālakam //

āraktanimnanayanaṃ hrasvasthūlaśirodharam /
atiśliṣṭodaroraskaṃ tiryagānanaśobhitam //

yāvatsvaśaktisāmagryaṃ trailokyaṃ kṣobhayanniva /
marudbhirdaśabhiścaiva prādhmāpayadarindamaḥ ] //

śaṅkhaśabdosya sotyarthaṃ śrūyate kālameghavat //

tasya śaṅkhasya śabdena dhanupo nisvanena ca / vānarasya ninādena rathanemisvanena ca /
jaṅgamasya bhayaṃ ghoramakarotpākaśāsaniḥ //

śaṅkhaśabdena pārthasya mukhenāśvāḥ patankṣitau /
uttaraścāpi santrastho rathopastha upāviśat //

athāśvānraśmibhiḥ pārthaḥ samudyamya parantapaḥ /
abhrājata rathopasthe bhānurmerāvivottare //

śaṅkhaghoṣeṇa vitrastaṃ jyāghātena ca mūrchitam /
uttaraṃ sampariṣvajya samāśvāsayadarjunaḥ //

mā bhaistvaṃ rājaputrāgrya kṣatriyosi parantapa /
kathaṃ puruṣaśārdūla śatrumadhye viṣīdasi //

śrutāste śaṅkhaśabdāśca bherīśabdāśca sarvaśaḥ /
kuñjarāṇāṃ ca ninadā vyūḍhānīkeṣu nityaśaḥ //

sa tvaṃ kathamivānena śaṅkhaśabdena bhīṣitaḥ /
vipaṇṇarūpo vitrastaḥ puruṣaḥ prākṛto yathā //
uttara uvāca /

śrutā me śaṅkhaśabdāśca bherīśabdāśca nityaśaḥ /
kuñjarāṇāṃ ca ninadā vyūḍhānīkeṣu tiṣṭhataḥ //

naivaṃvidhāḥ śaṅkhaśabdāḥ purā jātu mayā śrutāḥ / dhvajasya cāpi rūpaṃ me dṛṣṭapūrvaṃ nahīdṛśam /
dhanuṣaścāpi ghoṣaśca śrutapūrvo na me kvacit //

asya śaṅkhasya śabdena dhanuṣo nisvanena ca / amānuṣāṇāṃ śabdena bhūtānāṃ nisvasena ca /
rathanemipraṇādena mano kame muhyate bhṛśam //

vyākulāśca diśaḥ sarvā hṛdayaṃ vyathatīva ca / dhvajena pihitāḥ sarvā diśo na pratibhānti me /
gāṇḍīvasya ca śabdena karṇau me badhirīkṛtau //
vaiśampāyana uvāca /

punardhvajaṃ punaḥ śaṅkhaṃ dhanuścaiva punaḥ punaḥ /
sa mūḍhacetā vairāṭirarjunaṃ samudaikṣata //

sa muhūrtaṃ prayātaṃ tu pārtho vairāṭimabravīt //

sthiro bhava mahābāho sañjñāṃ cātmānamānaya / ekānte rathamāsthāya padbhyāṃ tvamavapīḍya ca /
dṛḍhaṃ ca raśmīnsaṃyaccha śaṅkhaṃ dhmāsyāmyahaṃ punaḥ //

evamuktvā mahābāhuḥ savyasācī parantapaḥ / tataḥ śaṅkhamupādhmāsīddārayanniva parvatān /
guhā girīṇāṃ ca tadā diśaḥ śailāṃstathaiva ca //

jyāghoṣaṃ talaghoṣaṃ ca kṛtvā bhūtānyamohayat / uttaraścāpi saṃlīno rathopastha upāviśat /
taṃ samāśvāsayāmāsa punareva dhanañjayaḥ /

tasya śaṅkhasya śabdena rathanemisvanena ca /
gāṇḍīvasya ca śabdena pṛthivī samakampata //