Mahabharata · Chapter 4.43

etasminnantare pārthaṃ na mūḍhātmā vyajānata /
virāṭaputraḥ prabhukhe papraccha punareva tam //

suvarṇarucirāṇyeṣāmāyudhāni mahātmanām /
rucirāṇi prakāśante pārthānāmāśukāriṇām //

kvanu te pāṇḍavāḥ śūrāḥ sangrāmeṣvaparājitāḥ / yeṣāmimāni dīptāni śriyā dīpyanti bhānti ca /

kasminvasanti deśe ca dharmajñā bandhuvatsalāḥ /
kva dharmarājaḥ kaunteyo dharmaputro yudhiṣṭhiraḥ //

dharmaśīlaśca dharmātmā dharmavāndharmavitsudhīḥ /
dharmādhyakṣo dharmaputro dharmajño dharmamūrtimān //

dharmaniṣṭho dharmakartā dharmagoptā sudharmakṛt /
satyārjavakṣamādhāro ghṛṇī dharmaparāyaṇaḥ //

bhīmasenārjunau cāpi sarve te mātulā mama /
nakulaḥ sahadevo vā sarvāstrakuśalau raṇe //

sarva eva mahātmānaḥ sarvāmitravināśanāḥ /
rājyamakṣaiḥ parājitya naḥ śrūyante vanaṃ gatāḥ //

draupadī cāpi pāñcālī strīratnamiti me śrutā /
jitā cākṣaistadā kṛṣṇā tānevānvagamadvane //

utsṛjya rājyaṃ dharmyaṃ te naḥ śrūyante vanaṃ gatāḥ //

pāṇḍavānyadi jānīṣe kvanu te dharmacāriṇaḥ /
kvanu vā nivasantīti satyaṃ brūhi bṛhannale //

kimarthamāgatānyatra śastrāstrāṇi mahātmanām /
kathaṃ jñātāni bhavatā tathā me brūhi śobhane //
vaiśampāyana uvāca /

tataḥ prahasya bībhatsuḥ kaunteyaḥ śvetavāhanaḥ /
uvāca rājaputraṃ tamuttaraṃ śṛṇu me vacaḥ //

mā bhaistvaṃ rājaśārdūla sarvaṃ te varṇayāmyaham /
nātra bhetavyamadyāpi rājaputra yathātathā //

vayaṃ te pāṇḍavā nāma vanavāsasya pāragāḥ / atīte dvādaśe varṣe cchannavāsamihoṣitāḥ /
tasmādaśaṅkitamanāḥ śṛṇuṣvāvahitottara //

ahamasmyarjuno nāma kaṅko nāma yudhiṣṭhiraḥ / bhīmasenastu valalaḥ pituste rasapācakaḥ /
aśvabandhastu nakulaḥ sahadevastu gopatiḥ //

sairandhrīṃ draupadīṃ viddhi yadarthe kīcako hataḥ /
bhīmasenena durvṛttaḥ sahabhrātṛbhirāhave //

śrutvaitadvacanaṃ jiṣṇorvismayasphāritekṣaṇaḥ /
paśyannanimiṣaḥ pārthaṃ śanairvācamuvāca ha //
uttara uvāca /

daśa pārthasya nāmāni śrūyante me kathāsu ca /
prabrūyāstāni yadi me śraddadhyāṃ sarvameva te //
arjuna uvāca /

ahaṃ tarhi tavācakṣe daśa nāmāni tāni me / vairāṭe śṛṇu tāni tvaṃ yāni pūrvaṃ śrutāni te /
īśāno vidadhe devastridivasyeśvaro divi //

arjunaḥ phalguno jiṣṇuḥ kirīṭī śvetavāhanaḥ / bībhatsurvijayaḥ pārthaḥ savyasācī dhanañjayaḥ /
etāni mama nāmāni sthāpitāni surottamaiḥ //
uttara uvāca /

guṇato daśa nāmāni samavetāni pāṇḍave /
caranti loke khyātāni viditāni mamāvagha //

kenāsi vijayo nāma kenāsi śvetavāhanaḥ /
savyasācī ca kenāsi jiṣṇurbībhatsureva ca //

arjunaḥ phalgunaḥ pārthaḥ kirīṭī kena sārathe /
dhanañjayaśca kenāsi śīghraṃ vada bṛhannale //

śrutā me tasya vīrasya kevalā nāmahetavaḥ / itastataścalatyetanmano me cañcalaṃ tvayi /
arjuno vā bhavānneti vada śīghraṃ bṛhannale //
arjuna uvāca /

sarvāñjitvā janapadāndhanaṃ cācchidya sarvaśaḥ /
madhye dhanasya tiṣṭhantaṃ tanmāmāhurdhanañjayam //

abhiprayāmi sangrāme yadā'haṃ yuddhadurmadān /
ajitvā na nivirteyaṃ tena vai vijayaṃ viduḥ //

śvetāḥ kāñcanasannāhā rathe yujyanti me hayāḥ /
śatrubhiryudhyamānasya tenāhaṃ śvetavāhanaḥ //

kirīṭaṃ sūryasankāśaṃ bhrājate me śirogatam /
raṇamadhye rathasthasya sūryapāvakasannibham //

acchedyaṃ ruciraṃ citraṃ jāmbūnadapariṣkṛtam /
indradattamanāhāryaṃ tenāhurmāṃ kirīṭinam //

na kuryāṃ karma bībhatsaṃ yudhyamānaḥ kadācana /
tena devamanuṣyeṣu bībhatsuriti māṃ viduḥ //

ubhau me tulyakarmāṇau gāṇḍīvasya vikarṣaṇe / bhujau me bhavataḥ saṅkhye parasainyavināśinau /
tayoḥ savyo'dhikastasmātsavyasācīti māṃ viduḥ //

pṛthivyāṃ sāgarāntāyāṃ varṇo me durlabhaḥ samaḥ /
śuddhatvādrupavattvācca tena māmārjunaṃ viduḥ //

uttarābhyāṃ tu pūrvābhyāṃ phalgunībhyāmahaṃ divā /
jāto himavataḥ pṛṣṭhe tena māṃ phalgunaṃ viduḥ //

yo mamāṅge vraṇaṃ kuryāddhāturjyeṣṭhasya paśyataḥ / yudhiṣṭhirasya rudhiraṃ darśayedvā kadācana /
parābhavamahaṃ tasya kule kuryāṃ na saṃśayaḥ //

yotsyāmi tairahaṃ sarvairna me tebhyaḥ parābhavaḥ /
tena devamanuṣyeṣu jiṣṇurnāmāsmi viśrutaḥ //

mātā mama pṛthā nāma tena māṃ pārthamabruvan //

devadānavagandharvapiśācoragarākṣasān /
ahaṃ purā raṇe jitvā khāṇḍave'gnimatarpayam //

hutāśanaṃ tarpayitvā sahitaḥ śārṅgadhanvanā /
[ triviṣṭapagatau* dṛṣṭvā pitāmahamaheśvarau //

mūrcchayā patitaṃ bhūmāvāgatau devasattamau /
dṛṣṭvā tau varadau devau sañjñāṃ labdhvotthitaḥ punaḥ //

mūrdhnā hi praṇataṃ bhūmau tau devau varadau varau / kṛṣṇetyekādaśaṃ nāma prītyā me cakratustadā /
tuṣṭau ca mama vīryeṇa karmaṇā cābhirādhitau //

sarvadevaiḥ parivṛtau bhūyo māṃ svayamūcatuḥ /
varaṃ tāta vṛṇīṣveti yaṃ prārthayasi pāṇḍava //

tato'hamastrāṇyalabhaṃ divyāni ca dṛḍhāni ca / brāhmaṃ pāśupataṃ caiva sthūṇākarṇaṃ ca durjayam /
aindraṃ vāruṇamāgneyaṃ vāyavyamatha vaiṣṇavam //

tato'hamajayaṃ bhūyo rathenaindreṇa durjayān / mātaliṃ sārathiṃ kṛtvā nivātakavacānraṇe /
avadhyakavacānndevairvaradṛptānmahāsurān //

tisraḥ koṭīrdānavānāṃ saṃyugeṣvanivartinām /
eko nirjitya sangrāme bhūyo devānatoṣayam //

tato me bhagavānindraḥ kirīṭamadadātsvayam /
devāśca śaṅkhamadaduḥ śatrusainyanivāraṇam //

ahaṃ pāre samudrasya hiraṇyapuravāsinām /
hatvā ṣaṣṭiṃ sahasrāṇi jayaṃ samprāptavānraṇe //

asambhrānto rathe tiṣṭhansahasreṣu śateṣu ca /
śatrumadhye durādharṣo na muhyanti ca me diśaḥ //

ahaṃ gandharvarājena hriyamāṇaṃ suyodhanam / bhrātṛbhiḥ sahitaṃ tāta gandharvaiḥ samare jitam /
caturdaśa sahasrāṇi hatvā cainamamocayam //

etāni mama nāmāni yo'hanyahani kīrtayet /
taṃ na paśyanti sattvāni na taṃ nighnanti śatravaḥ //

adya paśya mahābāho mama vīryaṃ suduḥsaham /
mā bhairvigatasantrāsaḥ kurūnetānsamāgatān //

suyodhanasya miṣataḥ karṇasya ca kṛpasya ca / pitāmahasya bhīṣmasya drauṇerdroṇasya ca svayam /
sarvāneva kurūñjitvā pratyāneṣyāmi te paśūn़] //