Mahabharata · Chapter 4.42

attareṇaivamuktastu pārtho vairāṭimabravīt /
mṛdvyā pratyāyayanvācā bhītaṃ śaṅkāvaśaṃ gatam //
arjuna uvāca /

attvayā prathamaṃ pṛṣṭaṃ śatrusenāṅgamardanam /
pārthasyedaṃ dhanurdivyaṃ gāṇḍīvamiti viśrutam //

abhedyamabhayaṃ śrīmaddivyamacchedyamavraṇam /
sarvāyudhamahāmātraṃ śātakumbhamayaṃ dhanuḥ //

etacchatasahasreṇa sammitaṃ rāṣṭravardhanam /
devadānavagandharvaiḥ pūjitaṃ śāśvatīḥ samāḥ //

yena devāsurānpārthaḥ sarvānviṣahate raṇe /
etadvarṣasahasraṃ tu brahmā pūrvamadhārayat //

umāpatiścatuḥṣaṣṭiṃ śakro'śītiṃ ca pañca ca /
somaḥ pañcasahasrāṇi tathā ca varuṇaḥ śatam //

tasmācca varuṇādagniḥ premṇā prāhṛtya tacchubham / agninā prātibhāvyena dattaṃ pārthāya gāṇḍivam /
pañcaṣaṣṭiṃ ca varṣāṇi kaunteyo dhārayiṣyati //

evaṃvīryaṃ mahāvetetacca dhanuruttamam /
nīlotpalasamaṃ rājñaḥ kauravyasya mahātmanaḥ //

bindavaścātra sauvarṇāḥ pṛṣṭhe sādhuniyojitāḥ /
viśrutaṃ bhīmasenasya jātarūpagrahaṃ dṛḍham //

sahasragodhāḥ sauvarṇā dvīpinaśca caturdaśa /
ṛṣabhā yatra sauvarṇāḥ pṛṣṭhe tiṣṭhanti śṛṅgiṇaḥ //

yena bhīmo'jayatkṛtsnāṃ diśaṃ prācīṃ parantapaḥ /
pṛṣṭhe vibhaktāḥ śobhante kuśāgnipratidīpitāḥ //

pūjitaṃ suramartyeṣu prathitaṃ dhanuruttamam /
tālapramāṇaṃ bhīmasya ratnarukmavibhūṣitam //

durānamaṃ mahaddīrghaṃ surūpaṃ duṣpradharṣaṇam /
barhiṇaścātra sauvarṇāḥ śatacandrakabhūṣaṇāḥ //

nakulasya dhanustvetanmādrīputrasya dhīmataḥ / etena sadṛśaṃ citraṃ dhanuretadyavīyasaḥ /
hāridravarṇaṃ rājñastu kauravyasya mahātmanaḥ //

vipāṭhā bhīmasenasya girīṇāmapi dāraṇāḥ . suprabhāḥ sumahākāyāstīkṣṇāgrāḥ sutarāṃ dṛḍhāḥ /
bhīmena prahitā hyete vāraṇānāṃ nivāraṇāḥ //

suvarṇadaṇḍarucirāḥ kāladaṇḍopamāḥ śubhāḥ /
nakulasya śarā hyete vajrāśanisamaprabhāḥ //

yāṃśca tvaṃ pṛcchase dīptānsamadhārānsamāhitān /
varāhakarṇāstīkṣṇāgrāḥ sahadevasya te śarāḥ //

yastvayaṃ sāyako dīrgho gavye kośe ca daṃśitaḥ /
pārthasyāyaṃ mahāghoraḥ sarvabhārasaho mahān //

yastvayaṃ nirmalaḥ khaṅgo dvīpicarmaṇi daṃśitaḥ / rājño yudhiṣṭhirasyāyaṃ kuntīputrasya dhīmataḥ /

vaiyāghakośo bhīmasya pañcaśārdūlalakṣaṇaḥ /
vāraṇānāṃ sudṛptānāṃ śikṣitaḥ skandhaśātane //

nīlotpalasavarṇābhaḥ khaṅgaḥ pārthasya dhīmataḥ /
mṛgendracarmapihitastīkṣṇadhāraḥ sunirmalaḥ //

darśanīyaḥ sutīkṣṇāgraḥ kuntīputrasya dhīmataḥ /
arjunasyaiṣa nistriṃśaḥ parasainyāgradūṣaṇaḥ //

yastvayaṃ pārṣate kośe nikṣipto ruciratsaruḥ //
nakulasyaiṣa nistriṃśo vaiśvānarasamaprabhaḥ //

yastvayaṃ piṅgalaḥ khaṅgaścitro maṇimayatsaruḥ / sahadevasya khaṅgo'yaṃ bhārasāho'tidaṃśitaḥka /
bhīmasyāyaṃ mahādaṇḍaḥ sarvāmitravināśanaḥ //
vaiśampāyana uvāca /

bhedato hyarjunastūrṇaṃ kathayāmāsa tattvataḥ /
āyudhāni kalāpāṃśca nistriṃśāṃścātulaprabhān //