Mahabharata · Chapter 4.41

sārathe kimidaṃ divyaṃ nāgo vā yadi vā dhanuḥ / sauvarṇānyatra padmāni śatapatrāṇi bhāgaśaḥ /
kuśāgnipratitaptāni bhānumanti bṛhanti ca //

bindavaścātra sauvarṇā maṇiprotāḥ samantataḥ /
śaśisūryaprabhāḥ pṛṣṭhe bhānti rukmapariṣkṛtāḥ //

puṣpāṇyatra suvarṇāni śatapatrāṇi bhāgaśaḥ /
vismāpanīyarūpaṃ ca bhīmaṃ bhīmapradarśanam //

nīlotpalanibhaṃ kasya śātakumbhapariṣkṛtam /
ṛṣabhā yasya sauvarṇāḥ pṛṣṭhe tiṣṭhanti śṛṅgiṇaḥ //

tālapramāṇaṃ kasyedaṃ maṇirukmavibhūṣitam hāṭakasya suvarṇasya yasmiñśākhāmṛgā daśa //

durānamaṃ mahādīrghaṃ surūpaṃ duṣpradharṣaṇam /
kasyedamīdṛśaṃ citraṃ dhanuḥ sarve ca daṃśitāḥ //

candrārkavimalābhāsaḥ surūpāḥ supradarśanāḥ . haṃsāḥ pṛṣṭhaṃ śritā yasya kuśāgnipratimārciṣaḥ /
śārṅgagāṇḍīvasadṛśaṃ kasyedaṃ sārathe dhanuḥ //

caturtaṃ kāñcanavapurbhāti vidyudgaṇopamam / nīlopaliptamacchidaṃ jātarūpamayaṃ dhanuḥ /
matsyaścāsya hiraṇyasya pṛṣṭhe tiṣṭhanti daṃśitāḥ //

śakracāpopamaṃ divyaṃ kasyedaṃ sārathe dhanuḥ /
ucchritaṃ phaṇivaddivyaṃ sāravattvāddurānamam //

sahasragodhāḥ sauvarṇā dvīpinaśca caturdaśa . barhiṇaścātra sauvarṇāḥ śatacandrārkabhūṣitāḥ /
jāmbūnadavicitrāṅgaṃ kasyedaṃ pañcamaṃ dhanuḥ //

kasyeme kṣuranārācāḥ sahasraṃ lomavāpinaḥ /
prakṣiptāstīkṣṇatuṇḍāgrā upāsaṅge hiraṇmaye //

hāridravarṇāḥ kasyeme śitā pañcaśataṃ śarāḥ /
āśīviṣasamasparśāḥ śitāścājiṃhagā dṛḍhāḥ //

vipāṭhāḥ pṛthavaḥ kasya gṛdhrapatrārdhavājitāḥ /
varāhakarṇāstīkṣṇāgrāḥ kasyeme rucirāḥ śarāḥ //

vajrāśanisamasparśā vaiśvānaraśikhārciṣaḥ /
suvarṇapuṅkhāstīkṣṇāgrāḥ kasya saptaśataṃ śarāḥ //

kasyāyaṃ sāyako dīrgho gavye kośe ca daṃśitaḥ /
kasya daṇḍo dṛḍhaḥ ślakṣṇo ruciro'yaṃ prakāśate //

vaiyāghrakośaḥ kasyāyaṃ divyaḥ śaṅkho mahāprabhaḥ /
kasyārthamasayaścaite pañca śārdūlalakṣaṇāḥ //

kasyāyaṃ nirmalaḥ khaṅgo dvīpicarmanivāsitaḥ /
nīlotpalasavarṇo'yaṃ kasya khaṅgaḥ pṛthurmahān //

mṛgendracarmāvasitastīkṣṇadhāraḥ sunirmalaḥ /
ṛṣabhājinakośastu kasya khaṅgo mahānayam //

yasyāpidhāne dṛśyante sūryāḥ pañca pariṣkṛtāḥ /
kasyāyaṃ vipulaḥ khaṅgaḥ śṛṅgatsarumanoharaḥ //

nihitaḥ pārṣate kośe tailadhautaḥ samāhitaḥ / pramāṇavarṇayuktaśca kasya khaṅgo mahānayam /
etena pratividdhaḥ sañjīvetkaścinna kuñjaraḥ //

nirdiśasva yathāmārgaṃ mayā pṛṣṭā bṛhannale /
vismayo me paro jāto dṛṣṭvā sarvamidaṃ mahat //