Mahabharata · Chapter 4.36

tato virāṭaḥ kaunteyānatimānuṣavikramān / arcayāmāsa vittena mānena ca mahārathān /
vacasā caiva sāntvena snehena ca mudā'nvitaḥ // 1 //
virāṭa uvāca /

yathaiva mama ratnāni yuṣmākaṃ tāni vai tathā /
kāryaṃ kuruta taiḥ sarvairyathākāmaṃ yathāsukham // 2 //

dadāmyalankṛtāḥ kanyā vasūni vividhāni ca /
manasā cāpyabhipretaṃ yadvaḥ śatrunibarhaṇāḥ // 3 //

yuṣmākaṃ vikramādadya mukto'haṃ svastimāniha /
tasmādbhavanto matsyānāmīśvarāḥ sarva eva hi // 4 //
vaiśampāyana uvāca /

taṃ tathāvādinaṃ tatra kauraveyāḥ pṛthakpṛthak /
ūcuḥ prahṛṣṭamanaso yudhiṣṭhirapurogamāḥ // 5 //

pratinandāmahe vācaṃ sarvathaiva viśāmpate /
etāvatā'dya prītāḥsmo yattvaṃ muktosi śatrubhiḥ // 6 //

yattvaṃ muktosi śatrubhyo hyetatkāryaṃ hitaṃ hi naḥ /
na kiñcitkāryamasmākaṃ na dhanaṃ mṛgayāmahe // 7 //

athābravītprītamanā mātsyarājo yudhiṣṭhiram /
nirbharaḥ prītipūreṇa harṣagadgadayā girā // 8 //

punareva mahābāhurvirāṭo rājasattamaḥ /
ehi tvāmabhiṣekṣyāmi matsyarājastu no bhavān // 9 //

manasā cāpyabhipretaṃ yatte śatrunibarhaṇa /
tatte'haṃ sampradāsyāmi sarvamarhati no bhavān // 10 //

ratnāni gāḥ suvarṇaṃ ca maṇimuktamathāpi vā /
vaiyāghrapadya viprendra sarvathaiva namostu te // 11 //

tvatkṛte hyadya paśyāmi rājyamātmānameva ca /
yataśca jātaḥ saṃrambhaḥ sa ca śatrurvaśaṃ gataḥ // 12 //

tato yudhiṣṭhiro mātsyaṃ punarevābravīdvacaḥ /
pratinandāmi te vācaṃ manojñāṃ mātsya bhāṣitāṃ // 13 //

ānṛśaṃsyaparo nityaṃ sumukhaḥ satataṃ bhavān /
punareva virāṭaśca rājā kaṅkamabhāṣata // 14 //

aho śūdrasya karmāṇi valalasya dvijottama /
sohaṃ śūdreṇa sangrāme valalenābhirakṣitaḥ // 15 //

tvatkṛte sarvamevaitadupapannaṃ mamānagha /
varaṃ vṛṣṇīṣva bhadraṃ te brūhi kiṃ karavāṇi te // 16 //

dadāmi te mahāprītyā ratnānyuccāvacānyaham /
śayanāsanayānāni kanyāśca samalankutāḥ // 17 //

hastyaśvarathasaṅghāśca rāṣṭrāṇi vividhāni ca /
etāni ca mama prītyā pratigṛhṇa mamāntike // 18 //
vaiśampāyana uvāca /

taṃ tathāvādinaṃ tatra kauravyaḥ pratyabhāṣata /
eṣaiva tu mama prītiryattvaṃ muktosi śatrubhiḥ // 19 //

pratītaścetpuraṃ tuṣṭaḥ praviśādya parantapa /
dāraiḥ putraiśca saṃśliṣya sā hi prītirmamātulā // 20 //

suśarmāṇaṃ tu rājendra sabhṛtyabalavāhanam /
visarjaya naraśreṣṭhaṃ varametadahaṃ vṛṇe // 21 //
vaiśampāyana uvāca /

evamukte tu kaṅkena virāṭo rājasattamaḥ /
pratyuvāca tataḥ kaṅkaṃ suśarmā yātu ceṣṭataḥ // 22 //
kaṅkha uvāca /

gacchantu dūtāstvaritā nagaraṃ tava pārthiva /
suhṛdāṃ priyamākhyātuṃ ghoṣayantu ca te jayam // 23 //

tatastadvacanānmātsyo dūtānrājā samādiśat /
ācakṣadhvaṃ puraṃ satvā sangrāme vijayaṃ mama // 24 //

kumāryaḥ samalankṛtya prayāgacchantu me purāt . vāditrāṇi ca sarvāṇi gaṇikāśca svalankṛtāḥ /
pratyāyāntu ca me śīghraṃ nāgarāḥ sarva eva te // 25 //

evamuktāstathā dūtā rātrau yātvā tu kevalam /
tato'ntare cānuṣitā dūtāḥ śīghrānuyāyinaḥ // 26 //

nagaraṃ prāviśaṃste vai sūrye samyagathodite / virāṭanagaraṃ prāpya śīghraṃ nāndīmaghoṣayan /
patākocchrayamālyāḍhyaṃ puramapratimaṃ yathā // 27 //