Mahabharata · Chapter 4.29

kīcake tu hate rājā virāṭaḥ paravīrahā /
śokamāhārayattīvraṃ sāmātyaḥ sapurohitaḥ // 1 //

kīcakasya vadhaṃ ghoraṃ sānujasya viśāmpate /
atyāhitaṃ cintayitvā vyasmayanta pṛthagjanāḥ // 2 //

tasminpure janapade jajalpuścāpi sarvaśaḥ /
vīryavāndayito rājño darpotsiktaśca kīcakaḥ // 3 //

sāmparāye parikruṣṭo balavāndurjayo raṇe / āsītprahartā śatrūṇāṃ dāradarśī ca durmatiḥ /
sa hataḥ kila gandharvaiḥ sairandhrīkāraṇānniśi // 4 //

ityajalpanmahārāja kīcakasya vināśanam /
deśedeśe manuṣyāśca vismitaḥ kīcake hate // 5 //

atha vaiḥ dhārtarāṣṭreṇa prayuktā ye bahiścarāḥ /
mṛgayitvā bahūndeśāngrāmāṃśca nagarāṇi ca // 6 //

saṃvidhāya yathā'diṣṭaṃ yathādeśaṃ pradarśakāḥ /
kṛtasanketanāḥ sarve nyavartanta puraṃ tataḥ // 7 //

āgamya hāstinapuraṃ dhārtarāṣṭramarindamam /
tatra dṛṣṭvā tu rājānaṃ kauravyaṃ dhṛtarāṣṭrajam // 8 //

droṇakarṇakṛpaiḥ sārdhaṃ bhīṣmeṇa ca mahātmanā /
sangataṃ bhrātṛbhiḥ sārdhaṃ trigartaiśca mahārathaiḥ // 9 //

praṇamya śirasā bhūmau vardhayitvā jayāśiṣā /
āsīnaṃ sūryasankāśe kāñcane paramāsane // 10 //

upāsyamānaṃ sacivairmarudbhiriva vāsavam /
vidvadbhirgāyakaiḥ sārdhaṃ kavibhiḥ stutipāṭhakaiḥ // 11 //

anekairapi rājanyaiḥ sevitaṃ saparicchadaiḥ /
duryodhanaṃ sabhāmadhye āsīnamidamabruvan // 12 //

kṛto'smābhiḥ paro yatnasteṣāmanveṣaṇe sadā /
pāṇḍavānāṃ manuṣyendra tasminmahati kānane // 13 //

nirjane vyālasankīrṇe nānābhramarasankule /
latāpratānagahane nānāgulmasamāvṛte // 14 //

na ca vidmo gatā yena pārthāḥ sudṛḍhavikramāḥ /
mārgamāṇāḥ padanyāsamāśrameṣu vaneṣu ca // 15 //

girikūṭeṣu tuṅgeṣu nānājanapadeṣu ca /
janākīrṇeṣu deśeṣu catvareṣu pureṣu ca // 16 //

narendra sahasā naṣṭānnaiva vidma ca pāṇḍavān /
atyantādarśanānnaṣṭā bhadraṃ tubhyaṃ nararṣabha // 17 //

girīṇāṃ kūṭakuñjeṣu kandarodarasānuṣu /
nadīprasravaṇeṣveva hradeṣu ca sarassu ca // 18 //

gahvareṣu ca durgeṣu grāmeṣū pavaneṣu ca /
durvijñeyā gatisteṣāṃ mṛgyate'smābhireva ca //
gajavyāghrasamīpeṣu siṃhānte śarabhāntare // 19 //

vatmanyanvicchamānāstu rathānāṃ rathisattama /
kañcitkālaṃ manuṣyendra sūtānanugatā vayam // 20 //

mṛgayitvā yathānyāyaṃ viditārthāśca tatvataḥ /
prāptā dvāravatīṃ sūtā vinā pārthaiḥ parantapa // 21 //

na tatra kṛṣṇā rājendra pāṇḍavāśca mahāvratāḥ /
naradeva yathoddiṣṭaṃ na ca vidmātra pāṇḍavān // 22 //

nirvṛto bhava naṣṭāste svastho bhava parantapa /
sarvathaiva pranaṣṭāste namaste bharatarṣabha // 23 //

sarvā ca pṛthivī kṛtsnā saśailavanakānanā . sarāṣṭranagaragrāmā pattanaiśca samanvitā /
anveṣitā ca sarvatra na ca paśyāmā pāṇḍavān // 24 //

punaḥ śādhi manuṣyendra ata ūrdhvaṃ viśāmpate /
anveṣaṇe pāṇḍavānāṃ bhūyaḥ kiṃ karavāmahe // 25 //

imāṃ ca naḥ priyāṃ vīra vācaṃ bhadravatīṃ śṛṇu // 26 //

yena trigartā nihatā balena bahuśo nṛpa / sūtena rājño matsyasya kīcakena balīyasā /
sa hataḥ patitaḥ śete gandharvairniśi bhārata // 27 //

syālo rājño virāṭasya senāpatirudāradhīḥ /
sudeṣṇāyānujaḥ krūraḥ śūro vīro gatavyathaḥ // 28 //

utsāhavānmahāvīryo nītimānbalavānapi /
yuddhajño ripuvīryaghnaḥka siṃhatulyaparākramaḥ // 29 //

prajārakṣaṇadakṣaśca śatrugrahaṇaśaktimān /
vijitārirmahāyuddhe pracaṇḍo mānatatparaḥ // 30 //

naranārīmanohlādī dhīro vāgmī raṇapriyaḥ /
puṇyakarmā'rthakāmānāṃ bhājanaṃ manujottamaḥ // 31 //

sa hato niśi gandhairvaḥ strīnimittaṃ narādhipa / amṛṣyamāṇo duṣṭātmā niśīthe saha sodaraiḥ /
suhṛdaścāsya nihatā yodhāśca praharairhatāḥ // 32 //

gandharvāṇāṃ ca mahiṣī kācidasti nitambinī /
sairandhrī nāma tāṃ dṛpto duṣṭātmā'kāmayadbalī // 33 //

ityevaṃ śrutamasmābhirgandharvairnihato niśi // 34 //

bāndhavairbahubhiḥ sārdhaṃ kīcako nihato yataḥ / adyaprabhṛti rājendra pāṇḍavānveṣaṇaṃ prati /
cārāṃśca sarvataścartuṃ preṣayeti matirhi naḥ // 35 //

nihato niśi gandharvairduṣṭātmā bhrātṛbhiḥ saha /
etāvacchrutamasmābhirbhadraṃ te'stu narādhipa // 36 //

priyametadupaśrutya śatrūṇāṃ ca parābhavam /
kṛtakṛtyaśca kauravya vidhatsva yadanantaram // 37 //