Mahabharata · Chapter 4.28

te dṛṣṭvā nihatānsūtānbhīmasenena bhārata / paurāśca sahitāḥ sarve rājñe gatvā nyavedayan /
gandharveṇa hatā rājansūtaputrāḥ paraśśatam // 1 //

yathā vajreṇa dīrṇaṃ vai parvatasya mahacchiraḥ /
vinikārṇāḥ pradṛśyante tathā sūtā mahītale // 2 //

sairandhrī cāpi muktā sā punarāyāti te gṛham /
sarvaṃ saṃśayitaṃ rājannagaraṃ te bhaviṣyati // 3 //

tathārūpā hi sairandhrī gandharvāśca mahābalāḥ /
puṃsāmiṣṭaśca viṣayo maithunāya na saṃśayaḥ // 4 //

yathā sairandhridoṣeṇa nedaṃ rājanpuraṃ tava /
vināśameti vai kṣipraṃ tathā sādhu vidhīyatām // 5 //

sarvāṅgasauṣṭhavayutāṃ rūpalāvaṇyaśālinīm . paśyatāmanimeṣeṇa cakṣuṣā vanitāṃ śubhām /
manasaścakṣuṣaścaiva pratibandho na vidyate // 6 //

tasmāttāṃ yaḥ pumāndṛṣṭvā rūpeṇāpratimāṃ bhuvi /
gacchetkāmavaśaṃ mūḍho gandharvaiḥ sa nihanyate // 7 //

niṣkāsayaināṃ bhavanātpurāccaiva viśeṣataḥ /
kālaḥ praviśya sairandhrīṃ puraṃ nāśayate dhruvam // 8 //
vaiśampāyana uvāca /

teṣāṃ tadvacanaṃ śrutvā virāṭo vāhinīpatiḥ /
abravītkriyatāmeṣāṃ sūtānāmaparakriyā // 9 //

ekasminneva te sarve susamiddhe hutāśane /
dahyantāṃ kīcakāḥ sarve sarvagandhaiśca sarvaśaḥ // 10 //

ityuktvā paramodvagniḥ praviśyāntaḥpuraṃ śubham /
sudeṣṇāṃ cābravīdrājā mahiṣīṃ jātasādhvasaḥ // 11 //

sairandhrīmāgatāṃ brūyā mamaiva vacanādiha . gaccha sairandhri bhadraṃ te yathākāmaṃ carādhunā /
bibheti rājā sairandhi gandharvebhyaḥ parābhavāt // 12 //

na hi tāmutsahe vaktuṃ svayaṃ gandharvarakṣitām /
striyāstvadoṣastāṃ vaktumatastvāṃ prabravīmyaham // 13 //
vaiśampāyana uvāca /

ekasminneva te sarve susamiddhe hutāśane /
adahankīcakānsarvānsaṃskāraiścaiva sarvaśaḥ // 14 //

atha muktā bhayātkṛṣṇā sūtaputrānnirasya ca /
mokṣitā bhīmasenena jagāma nagaraṃ prati // 15 //

trāsiteva mṛgī bālā śārdūlena manasvinī /
sā tu gātrāṇi vāsaśca prakṣālya praviveśa ha // 16 //

tāṃ dṛṣṭvā puruṣā rājanprādravanta diśo daśa /
gandharvāṇāṃ bhayatrastāḥ keciddṛṣṭiṃ nyamīlayan // 17 //

pradudruvuścāpyapare tathā janā hastaiśca cakṣūṃṣi pidhāya mohitāḥ /
mā paśyata smeti ca tāṃ bruvantastathā janāścukruśurārtarūpāḥ // 18 //

tāmadya yaḥ paśyati rūpaśālinīṃ śayīta bhagno'tra yathaiva kīcakāḥ /
iti bruvanto bhayavignacetaso bhayena gandharvagatena mohitāḥ // 19 //

tato mahānasadvāre bhīmasenamavasthitam /
dadarśa rājanpāñcālī yathā mattaṃ mahādvipam // 20 //

sopahāsaṃ tu śanakaiḥ sañjñābhiridamabravīt /
namo gandharvarājāya yenāsmi parimokṣitā // 21 //

kīcakebhyo vinirdoṣāmanāthāṃ vasatīṃ gṛhe /
yo māṃ rakṣati santrastāṃ gandharvāya namostu te // 22 //
bhīma uvāca /

ye yasyā vicarantīha puruṣā vaśavartinaḥ /
teṣāṃ ca vaśagā nityaṃ vicara tvaṃ yatheṣṭataḥ // 23 //

ye purā vicarantīha puruṣā vaśavartinaḥ /
tasyāste vacanaṃ śrutvā hyanṛṇā viharantvitaḥ // 24 //
vaiśampāyana uvāca /

tayostadvacanaṃ śrutvā jajhire netare janāḥ /
tataḥ pāñcālarājasya sutā cāpi jagāma ha // 25 //

tataḥ sā nartanāgāre dhanañjayamapaśyata /
rājñaḥ kanyā virāṭasya nartayantaṃ mahābhujam // 26 //

tatastā nartanāgārādviniṣkramya sahārjunāḥ /
kanyā dadṛśurāyāntīṃ kṛṣṇāṃ kliṣṭāmanāgasam // 27 //
kānyā ūcuḥ /

diṣṭyā sairandhri muktā'si diṣṭyā'si punarāgatā /
diṣṭyā ca nihatāḥ sūtā ye tvāṃ kliśyantyanāgasam // 28 //
bṛhannalovāca /

kathaṃ sairandhri muktā'si kathaṃ pāpāśca te hatāḥ /
icchāmi te kathāṃ śrotuṃ kathayasva yathātatham // 29 //
sairandhyuvāca /

bṛhannale kinnu tava sairandhryā kāryamadya vai /
yā tvaṃ raṃsyasi kalyāṇi sadā kanyāpure sukhaṃ // 30 //

na hi duḥkha samāpnoṣi sairandhrī yadupāśrute / sukhena vartase yeha na tadduḥkhamavāpyate /
tena māṃ duḥkhitāmevaṃ pṛcchasi prahasantyapi // 31 //
bṛhannalovāca /

bṛhannalā'pi kalyāṇi duḥkhamāpnotyanantakam /
tiryagyonigateveyaṃ na caināmavabudhyase // 32 //

tvayā sahoṣitā cāsmi tvaṃ ca sarvaiḥ sahoṣitā / tvattaḥ kṛcchrataraṃ vāsaṃ vaseyamahamaṅgane /
kliśyantyāṃ tvayi suśroṇi konu duḥkhaṃ na cintayet / // 33 //

na tu kenacidanyantaṃ kasyaciddhṛdayaṃ kvacit /
vedituṃ śakyate nūnaṃ tena māṃ nāvabudhyase // 34 //
vaiśampāyana uvāca /

tataḥ sahaiva kanyābhirdraupadī rājaveśma tat /
praviveśa sudeṣṇāyāḥ samīpamanasūyinī // 35 //

tāmabravīdrājapatnī virāṭavacanādidam . sairandhri gamyatāṃ śīghraṃ yatra kāmayase gatim /
rājā bibheti sairandhri gandharvebhyaḥ parābhavāt // 36 //

tvaṃ cāpi taruṇī subhrū rūpeṇāpratimā bhuvi /
cittāni ca nṛṇāṃ bhadre raktāni sparśaje sukhe // 37 //

tasmāttvatto bhayaṃ mahyaṃ rāṣṭrasya nagarasya ca /
gacchādyaiva yatheṣṭaṃ tvaṃ nagarādyatra raṃsyase // 38 //

tvannimittaṃ śubhe mahyaṃ sarvo bandhujano hataḥ /
nṛśaṃsā khalu te buddhirbhrātṝṇāṃ me kṛto vadhaḥ // 39 //

tasmādgandharvarājebhyo bhayamadya pravartate /
yatheṣṭaṃ gaccha sairandhri svasti ceha yathā bhavet // 40 //
vaiśampāyana uvāca /

sudeṣṇāyā vacaḥ śrutvā sairandhrī cedamabravīt /
trayodaśāhamātraṃ tu rājā kṣāmyatu bhāmini // 41 //

kṛtakṛtyā aviṣyanti gandharvāste na saṃśayaḥ /
tato māmupaneṣyanti kariṣyanti ca te priyam // 42 //

dhruvaṃ ca śreyasā rājā yokṣyate saha bāndhavaiḥ . rājñaḥ kṛtopakārāśca kṛtajñāśca sadā śubhe /
sādhavaśca balotsiktāḥ kṛtapratikṛtepsavaḥ // 43 //

arthinī mā bravītyeṣā yadvātadveti cintaya /
bharasva tadaharmātraṃ tatte śreyo bhaviṣyati // 44 //
vaiśampāyana uvāca /

tasyāstadvacanaṃ śrutvā kaikeyī duḥkhamohitā /
uvāca draupadīmārtā bhrātṛvyasanakarśitā // 45 //

vasa bhadre yatheṣṭaṃ tvaṃ tvāmahaṃ śaraṇaṃ gatā /
trāyasva mama bhartāraṃ putrāṃścaiva viśeṣataḥ // 46 //

ityuktavā rājaśārdūla rājñe sarvaṃ nyavedayat . triṃśadrātrimimāṃ bhīruḥ kṛtakṛtyā nivāsaye // 47 //